O NSEDIA kelendanga kuyitanina ko. Vava twawutuka, mase meto batukebanga muna mawonso. Vava twayantika diata, twawanananga yo wantu katuzeye ko ana twabadikilanga vo anene-nene. Wantu awaya wonga batumwesanga, kansi ntim’eto wavuvamanga vava mase meto bakalanga va ndambu, musungula vava twasimbininanga koko kwau.

Muna kileke, zola yo lukasakeso lwa mase meto twavuanga o mfunu. Vava mase meto batusonganga o zola, luvuvamu diatutwasilanga. Vava batusanisinanga, diatukumikanga yo kutusadisa muna nungunuka.

Vava twakolanga, akundi eto mpe batusadisa. Vava twakalanga yau kuna sikola, diatusadisanga mu lembi mona o wonga.

E mvovo miami miyikanga awana basansuka e nsansuka yambote. Aleke akaka ke bakalanga ye akundi ayingi ko, akaka ke basongwa nzola ko kwa mase mau. Melissa * wavova vo: “Konso fulu yamwenanga foto dia esi nzo bakalanga entwadi yo vangila mambu kumosi yavovanga: ‘Ekwe kele vo yakala ye lau dia mpila yayi vava yakala dumbelele!’” Nanga i diau mpe omonanga.

Mase maku nanga ke basonga zola ko ngatu kuvana mana aleke bevuanga o mfunu. Nanga osungamenanga vava mase maku batantananga. Ediadi diabafila mu vonda longo lwau yo kufila mu yindula vo ngeye i nkwa kuma. Dilenda kala vo mosi muna mase maku wafinganga yovo kuwanda.

Nkia mambu bevanganga ulolo wa aleke besansukanga e nsasuk’a mbi? Akaka bekuyivananga muna fomo zangolo ye malavu ma nkolwa. Akaka mpe bekukikotesanga mu buka ya yimpumbulu muna vava kala ye akundi. Aleke akaka bebandanga kimakangu kimana bazolwa. Kansi, nkumbu miayingi e nzola yayi ke izingilanga ko. Ediadi diwokesanga e ntokani zau.

Aleke besansukanga e nsasuk’a mbi kansi ke bekuyivananga mu mambu mayikilu ko, kuna kulandanga bekuyibadikilanga vo ke bena mfunu ko.  Ana wavova vo: “Yakwikilanga vo kina mfunu ko, kadi i wau kampovesanga o ngudi ame ntangwa zawonso. Ngudi ame kansanisinanga ko ngatu kunsonga o zola.”

E mpila twasansilwa ke diau kaka ko ditwasanga wonga. Tulenda mona wonga mu kuma kia vambana kwa longo, mpasi za kinunu yovo tokana mu kuma kia mpw’eto. Mawonso mama ye mankaka mpe, malenda kutukatula e kiese yo fwasa e ngwizani eto ye akaka. Adieyi tulenda vanga muna sunda mambu mama?

Zaya wo vo vena yo nsadisi. Nzambi ozolele sadisa wantu awonso.

Nzambi wavova muna Yesaya wa ngunza vo: “Kuvengozioka ko, kadi omono i Nzambi aku; ikuvamisa; elo, ikusadisa; elo, ikusikidisa muna koko kwalunene kwa unsongi wame.” (Yesaya 41:10, 13) Diakiese mu zaya vo Nzambi ozolele simbinina koko kweto muna kutusadisa. Ozevo, ke tuna ye kuma ko kia telamwa moyo.

Nkand’a Nzambi uyikanga asambidi a Yave ana batokananga, kansi ntima miau miavuvama vava Nzambi kabasadisa. O Kana wa ngudi a Samuele wakimwenanga vo kena mfunu ko wau vo sita kakala. Nkumbu miayingi kavezuanga. Muna kuma kiaki, wadilanga yo lembi dia. (1 Samuele 1:6, 8) Kansi, vava kaziula ntima yo zayisa ntokani zandi kwa Nzambi, kayimwenanga diaka ko vo kena mfunu ko.—1 Samuele 1:18.

Davidi wa ntozi a nkunga mpe watokananga. Mu mvu miayingi, Saulu wa ntinu wavava vonda Davidi. Nkumbu miayingi kavuluka vana moko ma Saulu. Ezak’e ntangwa wakendalalanga mu kuma kia mpasi kanuananga zau. (Nkunga 55:3-5; 69:1) Kana una vo i wau, Davidi wasoneka vo: ‘Kuna luvuvamu nlavalela yo leka, kadi nge Yave kaka okumvuvikanga ntima.’​—Nkunga 4:8.

O Kana yo Davidi bazayisa e ntokani zau kwa Yave, kuna kwalanda bamona vo Yave wabasadisa. (Nkunga 55:22) Aweyi tulenda landila e mbandu au?

1. Bunda vuvu kwa Yave wa Se dieto.

Yesu watuwondelela vo twazaya Se diandi wa “Nzambi mosi kaka aludi.” (Yoane 17:3) Paulu wa ntumwa wavova vo Nzambi “kavavukidi konso muntu omu yeto ko.” (Mavangu 17:27) Yakobo wasoneka vo: “Nufinama Nzambi, oyandi mpe okunufinama.”​—Yakobo 4:8.

Ozaya vo Se dieto dia zulu okutuzolanga yo kutuvua o mfunu, dikutusadisa mu sunda o ntelekw’a moyo. Kieleka vo ntangwa divavanga muna yima e vuvu kiaki, kansi ayingi babaka nluta muna wo vanga. Carolina wavova vo: “Vava Yave kakituka se Se diame, yaziulanga ntim’ame yo kunzayisa mawonso yamonanga. Ediadi luvuvamu lwayingi diantwasilanga.”

Raquel wavova vo: “Yave wansadisa mu sunda wonga vava yakalanga mono mosi. Yamokenanga yandi yo kunlomba lusadisu. Yave wampana lusadisu yavuanga o mfunu.” *

2. Kala kumosi ye awana bevanganga luzolo lwa Nzambi.

Yesu walonga alongoki andi bakibadikilanga vo ampangi. Wabazayisa vo: “Yeno awonso nu ampangi.” (Matai 23:8) Wazola vo alongoki andi bazolaziananga yo kala nze wan’angudi.​—Matai 12:48-50; Yoane 13:35.

E nkutakani za Mbangi za Yave zisadisanga wantu mu vua lufiaulwisu lwakieleka luna bavuidi o mfunu. (Ayibere 10:24, 25) Wantu ayingi bemonanga vo okwenda mu tukutakanu dikubasadisanga mu vua luvuvamu lwa ntima.

Eva wavova vo: “Yakala yo nkundi muna nkutakani ona wabakulanga e mpasi zame. Wavaulanga e ntangwa muna kungwa, wantangilanga e sono yo samba yame. Wavanganga mawonso kimana yalembi mona kinsona. E mvovo miandi miamfiaulwisanga kibeni. Ediadi diansadisa mu sunda lukendalalu.” Raquel wakudikila vo: “Yasolola ‘ngudi ye mase’ muna nkutakani. Bansadisa mu zaya vo mfunu ngina, bansadisa mpe mu sunda wonga.”

 3. Songa o zola ye ngemba kwa akaka.

O songa o zola ye ngemba kwa akaka disadisanga mu vanga yikundi yasikila. Yesu wavova vo: “Edi disundidi e kiese dia vana, ke mu tambula ko.” (Mavangu 20:35) Avo tusongele zola kwa akaka, yau mpe bekutuzola. Yesu wavovesa alongoki andi vo: “Nukayanga, ozevo nukayilwa.”​—Luka 6:38.

O zola akaka yo songwa o zola, dikutusadisa mu sunda wonga. Nkand’a Nzambi uvovanga vo: “O zola ke kusuka nkutu ko.” (1 Korinto 13:8) Maria wavova vo: “Nzeye wo vo e ngindu zabendomoka ikalanga zau mu kuma kiame ke zaludi ko. O sadisa akaka dikunsadisanga mu venga ngindu zazi. Kiese kiayingi imonanga vava isadisanga akaka.”

O sadila mambu mayikilu ke disongele ko vo kumona diaka mpasi ko, kansi malenda kusadisa. Carolina wavova vo: “Yamu wau yakinu mona o wonga. Kansi, imonanga vo mfunu kikilu ngina. Nzeye wo vo Nzambi mfunu kekumvuanga, ngina mpe ye akundi ayingi bekunsadisanga.” Raquel mpe wavova vo: “Ezak’e ntangwa ikendalalanga. Kansi, ngina ye mpangi z’Akristu ndenda lomba lusadisu kimana yakala ye ngindu zasikila. Vana ntandu, ngina yo Yave wa Se diame ona imokenanga yandi lumbu yawonso. Ediadi dikunsadisanga kibeni.”

Kansi o Nzambi osukisa e mpasi zawonso yakwele mvu. Nkand’a Nzambi uyikanga vo Nzambi otwasa nza yampa, muna nza yayina wantu ke bemona diaka wonga ko. Nzambi osianga nsilu muna Diambu diandi vo: “Bekala konso muntu kunansi a nsing’andi a vinyo yo kunansi a nsand’andi, ke vekala ona okubazakamesa ko.” (Mika 4:4) Muna ntangwa yayina, ke vekala muntu ko okutuvanga e mbi. Kana nkutu mambu mambi mana mekutuvanganga e mpasi, ‘ke meyindulwa diaka ko.’ (Yesaya 65:17, 25) Nzambi yo Mwan’andi Yesu Kristu besikidisa ‘unsongi wakieleka.’ Ozevo, tuzingila kuna luvuvamu yakwele mvu.​—Yesaya 32:17.