Muna vata dia Saxony yawutukila, vava yakala kuna sambu dia República Democrática de Alemanha (RDA). E zingu muna nzo eto kiambote ye kiakiese kiakala, mase mame bandonga fu yambote. E República Democrática de Alemanha, mu luyalu lwa Comunista yakala, muna kuma kiaki, e nsambila ke yakala mfunu ko kwa wantu ayingi muna vata dia Saxony. Kuna kwa mono Nzambi kakala ko. Mambu mole yakwikilanga muna mvu 18 miantete mia zingu kiame: lembi kwikila muna Nzambi ye muna Comunismo.

Ekuma yayangalelanga luyalu lwa Comunismo? Kadi yayangalelanga ngindu za sia vo wantu awonso bafwete kala bafwanana. Vana ntandu, yakwikilanga vo mavua mawonso mafwete kayaneswanga kuna mvevo. Ediadi diadi sukisa nswaswani vana vena mvuama ye asukami. I dianu vo yakivana emvimba muna nkubika y’aleke ya Comunismo. Vava yakala ye mvu 14, yaviokesanga ntangwa yayingi muna salu kiavelelesa kalu, nona papela yo nata zo kuna kompani dia vangululanga papela. O nkangu wa mbanz’a Aue batoma yangalelanga e salu kiame. Muna kuma kiaki, ayadi bampana nsendo. Kanele vo nleke yakala, yazayana ye mfumu zayingi za luyalu lwa República Democrática de Alemanhã. Yamonanga vo makani mambote yakala mau ye zingu kiasikila.

Vana vau, mawonso yabundanga e vuvu mayenda muna maza. Muna mvu wa 1989 e yaka kia Berlim kiabwa kumosi ye luyalu lwa Comunismo kuna este ya Europa. Mambu mayingi mankendelekanga. Ke kolo ko yabakula vo vilwa wayingi wavangamanga muna luyalu lwa Comunismo. Awana ke bayikamanga luyalu lwa Comunismo ko, vana fulu kia zole basiwanga. Aweyi diavangamenanga? Nga ke twakwikilanga ko vo wantu awonso muna luyalu lwa Comunismo bafwanana? Nga luyalu lwa Comunismo yenge-yenge kwandi kaka? Yadimbula kikilu vuvu muna kuma kia ntokani.

Muna kuma kiaki yasoba makani mame, yakivana emvimba muna salu kia yimbila yo bandula fwaniswa. Wau vo yakala ye lau dia longoka salu kia yimbila kuna sikola y’ekani dia lwaka kuna sikola zandá, yakala ye vuvu kia kituka se nyimbidi ye mbandudi ambote. Vana ntandu, yavidisa fu yambote ina yalongoka muna kileke. E diambu diasunda o mfunu kwa mono, i kala ye ntangw’a kiese yo tá zumba ye wan’amakento ayingi mu nkumbu mosi. Kansi, o yimbila, salu kia bandula fwaniswa yo kuyitumina ke diasukisa ntokani zame ko. Kana nkutu fwaniswa ina yabandulanga, mpw’a wonga wasaka yakalanga. Adieyi dikumbwila kuna sentu? Ayeyi i nsas’a zingu?

 Yasivika kikilu vava yasolola e mvutu za yuvu yayi. Lumbu kimosi kuna sikola yavuanda ye buka kia alongoki bamokenenanga oma makusentu. Mosi muna alongoki awaya, i Mandy * Mbangi a Yave. Muna nkokela yayina, wansonga nzila yambote. Wavova vo: “Andreas, avo ozolele solola mvutu za yuvu yaku mu kuma kia zingu kia kusentu, sia sungididi kia longoka Nkand’a Nzambi.”

Kiakwikila mvimba ko dina kampovesa, kansi yabaka nzengo za longoka Nkand’a Nzambi muna baka e mvutu. Mandy wansonga kapu kia 2 kia nkand’a Daniele, mana yatanga matoma kunsivikisa. O ungunza wau uyikanga tuyalu twa ngolo twa nz’a mvimba, tuvanga mambu mampwena yamu lumbu yeto. Mandy wansonga ungunza wankaka wa Nkand’a Nzambi uvovelanga oma ma kusentu. I bosi, yabaka mvutu za yuvu yame. Kansi, nani wasoneka ungunza wau? Nani wadi sakula oma ma kusentu ye ziku kiawonso? Nga diadi ke disongele ko vo Nzambi una kikilu?

Mandy wansunzula kwa Horst yo nkaz’andi Angelika, Mbangi za Yave ana bansadisa mu toma bakula Diambu dia Nzambi. Vana vau, yabakula vo Mbangi za Yave i dibundu disadilanga yo longa nkumbu a Nzambi, Yave. (Nkunga 83:18; Matai 6:9) Yalongoka vo Yave wa Nzambi vuvu kiasikila kevananga kwa wantu kia zinga yakwele mvu ova ntoto muna paradiso. E sono kia Nkunga 37:9 kivovanga vo: “Awana betadila Yave, bevwa nsi.” Edi diatoma kungiangidika i sia vo ediadi dilungana kaka kwa awonso ana besianga ngolo za zingila e ngwizani ye nkanikinu mia nkal’ambote mia Nkand’a Nzambi.

Kansi, ngolo yavanga muna soba mpila zingu kiame kimana kiakala ngwizani ye malongi ma Nkand’a Nzambi. Wau vo e salu kia yimbila yo bandula kiankitula se nkwa lulendo, diavavanga vo yalongoka fu kia lulembamu. Vana ntandu, diampasi diakala muna yambula zingu kia usafu. Ivutulanga matondo wau vo Yave nkwa luzindalalu, nkwa nkenda ye obakulanga ana besianga ngolo za sadila malongi ma Nkand’a Nzambi!

E mbumba ya luyalu lwa Comunismo yo lembi kwikila muna Nzambi i diafilanga e zingu kiame muna mvu 18 miantete mia zingu kiame; i bosi, Nkand’a Nzambi wasoba emvimba e zingu kiame. Mana yalongoka masukisa ntokani zame mu kuma kia kusentu yo kumpana nsas’a zingu. Muna mvu wa 1993 yavubwa se Mbangi a Yave, muna mvu wa 2000, yakazala yo Tabitha wa Mbangi a Yave a vema. Tukuyivananga emvimba muna sadisa akaka bazaya oma ma Nkand’a Nzambi. Ayingi muna awana tuwanananga yau, o lusansu lwau lwafwanana yo lwame, babundunwa kwa luyalu lwa Comunismo yo lembi kwikila muna Nzambi. Kiese kiayingi imonanga vava ikubasonganga una balenda zayila Yave.

Vava yayantika kwenda muna tukutakanu twa Mbangi za Yave, mase mame bakendalala kikilu. Kansi, tuka ntangwa yayina bemonanga vo e zingu kiame kiasoba wau yakituka se Mbangi a Yave. Owau ngina ye kiese kadi itanganga Nkand’a Nzambi yo kwenda muna tukutakanu twa Mbangi za Yave.

Mono yo Tabitha tuna yo longo lwakiese, kadi tulemvokelanga malongi ma Nkand’a Nzambi mu kuma ki’awana basompa. Muna bonga nona, o lemvokela e longi dia Nkand’a Nzambi dia songa kwikizi kwa muntu yo nkw’andi disiamisanga longo lweto.—Ayibere 13:4.

Kikalanga diaka ye wonga wa zingu ko ngatu telamwa moyo mu kuma kia kusentu. Ngina muna kintwadi kia mpangi zame zakwikizi mu nza yawonso, ana bezingilanga mu luvuvamu. Muna kintwadi kiaki yeto awonso twafwanana. Ediadi i diau yakwikilanga yo vava vo dialungana muna zingu kiame.