Nkia Diambu Kikilu Disikidisanga una Ukala e Zingu Kiaku?
Ndonga bekwikilanga vo mavangu ma mpandu i mau mesikidisanga una ukala e zingu kiau. Muna kuma kiaki, bekuyivananga muna mavangu mama yo yindula vo metomesa e zingu kiau.
MANA WANTU AYINGI BEKWIKILANGA
TADILA E NTETEMBWA: Akaka bekwikilanga vo, e mpila zimonekenanga e ntetembwa muna lumbu kia luwutuku lwau, ilenda songa una ukala e zingu kiau. Kiaki i kuma bevavilanga afimpi a lekwa ya zulu yovo tanga e sinsu ya zayila oma ma kusentu (horóscopo) kimana bavenga e vonza yo bak’e nzengo zambote muna zingu.
VANGU DIA FENG SHUI: Muna nsi zankaka, wantu bekwikilanga vo muna kala ye zingu kiambote, bafwete viengesela e nzo zau ye lekwa ya mpandu. Lo Wing * ozingilanga kuna Hong Kong, wavova vo: “Muntu mosi otomene zaya e vangu dia feng shui wampovesa vo, mfwete sia bola de cristal muna loja diame kimana yakala ye nzimbu zayingi.”
SAMBILA AKULU: Akaka mpe bekwikilanga vo muna kala ye lutaninu ye nsambu, bafwete sambila akulu au ye zinzambi-nzambi. Van, ona ozingilanga kuna Vietnã, wavova vo: “Yakwikilanga vo muna kala ye zingu kiambote owau ye zingu kiasikila kuna sentu mu kuma kia mono kibeni yo wan’ame, mfwete sambila akulu ame.”
WUTULUKA: Ndonga bekwikilanga vo avo muntu ofwidi, owutulukanga ku fulu kiankaka nze bulu yovo muntu ankaka. Bekwikilanga mpe vo e mambu mambote yovo mambi mekutubwilanga owau i mu kuma kia zingu kiantete twakala kiau.
Kana una vo wantu ayingi ke bekwikilanga mu mambu mama ko, bakinu kuyivana muna mavangu nze fimpa nzila za kandazi kia koko, kalati, horóscopo, bola de cristal, jogo de dados (yovo jogo de seis) ye lekwa yankaka. Beyindulanga vo nanga mavangu mama malenda kubasadisa mu zaya una ukala e zingu kiau kuna sentu.
NGA MAVANGU MAMA, ZINGU KIA WANTU KIKILU METOMESANGA?
Awana bekwikilanga muna mavangu ye ngindu zazi, nga besololanga kikilu e zingu kiambote ye kiasikila?
Badika e nona kia Hào ona ozingilanga kuna Vietnã. Watadilanga e ntetembwa, kuyivana muna vangu dia feng shui yo sambila akulu kimana katomesa e zingu kiandi. Nga zingu kiandi kiatoma kikilu? Hào wavova vo: “Yavidisa nzimbu zayingi, yakota e mfuka, kiakala diaka ye ngwizani yambote ko ye esi nzo ame yo bakama lukendalalu lwasaka.”
Qiuming, ona ozingilanga kuna Taiwan wakwikilanga mpe muna mavangu ma tadila e ntetembwa, vangu dia feng shui ye nsambila ya akulu. Kansi, vava katoma fimpa mavangu mama mawonso, wavova vo: “Yabakula vo, mana yavoveswanga muna vangu dimosi, ke makalanga ngwizani ko ye vangu diankaka, ediadi diamfila mu yantika katikisa. Yamona vo mana bampovesanga vava yatadilanga e ntetembwa ke mavangamanga ko. Wau vo muntu ke zayanga ko una wakala e zingu kiandi vitila kawutuluka, aweyi kalenda vangila e nsobani yo tomesa e zingu kiandi owau?”
“Yabakula vo, mana yavoveswanga muna vangu dimosi, ke makalanga ngwizani ko ye vangu diankaka, ediadi diamfila mu yantika katikisa.”—QIUMING, TAIWAN
Nze Hào yo Qiuming, ndonga bebakulanga vo e vangu nze tadila ntetembwa, sambila akulu eto yo wutuluka, ke yau ko isikidisanga una ukala e zingu kieto kuna sentu. Nga ediadi disongele vo ke tulendi zaya ko una ukala e zingu kieto kuna sentu?
Wantu ayingi beyindulanga vo muna kala ye zingu kiambote kuna sentu, bafwete tanga sikola zandá yo kala ye mavua. Nkia diambu dibwilanga awana bebakanga e nzengo za mpila yayi?
^ tini. 5 Mu longi diadi ye dina dilanda, e nkumbu zankaka zasobwa.
^ tini. 16 E mvovo miami, miasonama muna Bibila muna Ngalatia 6:7. Mitomene zayakana kwa nkangu a Oriente, mu mpil’eyi bevovelanga mio: Avo nsudia okunini, nsudia mpe okutika; avo madezo okunini, madezo mpe okutika.
Nanga Oyangalela Mpe Malongi Mama
EYINGIDILU DIA NKANGU
O Fimpa e Lekwa ya Zulu yo Zayisa Oma Mekwiza—Nga i Nzila ya Zayila Oma ma Kusentu?
Nga olenda bunda vuvu muna ndekwa zazi?
EYINGIDILU DIA NKANGU
Dina Nkand’a Nzambi Uvovanga mu Kuma kia Moyo yo Lufwa
Nga vena ye lekwa kisalanga moyo vava muntu kefwanga? Nga o moyo ke ufwanga ko? Amafwa akweyi bena?
