Wantu ankaka beyindulanga vo mana masonama muna Diambu dia Nzambi mabendomonua. Kansi, o Yesaya wa ngunza wavova vo e diambu dia Nzambi “dizinga yakwele mvu.” (Yesaya 40:8) Aweyi tulenda kadila ye ziku vo e nsilu mia Nzambi miatoma lungwa-lungwa?

Nzambi una ye nkuma wa lunga-lunga e Diambu diandi yo tanina dio kimana dialembi bendomonua. Kuna nz’ankulu, awana bavanganga e kopi ya sono yavauka, batanganga ye sungididi kiawonso konso mvovo wasonama kimana bakala ye ziku vo ke vakudikilwa mvovo ko, sobwa yovo katulwa. Wau vo tu wantu alembi lunga, dilenda kala vo akaka muna awana bavanganga e kopi zazi vilwa wakete bavanga.

Vena ye ulolo wa kopi za ngungu zankulu za Sono Yavauka. Muna tezanesanga e kopi zazi ye zankaka diasazu dikalanga mu solola e vilwa una mo.—Muna zaya diaka mayingi tala e longi dina ye ntu a diambu: “A Bíblia foi alterada?” muna nzil’eto ya jw.org.

Muna bonga e nona, badika e nkanda miankulu miyikilwanga vo Ngungu za Mbu Afwa, mina miasololwa kwa esi beduínos muna mvu wa 1947, muna nduka una vana mbel’a Mbu Afwa. E nkanda miami miankulu mina ye ndambu ya Sono Yavauka yabandulwa se vioka mafunda mole ma mvu. Akwa ngangu batezanesa e nkanda miami miankulu ye Sono Yavauka tusadilanga o unu. Adieyi basolola?

Akwa ngangu babakula vo mana tutanganga muna Diambu dia Nzambi tusadilanga o unu mafwanana ye Sono yantete Yavauka yavumunuinua kwa Nzambi. * Tulenda kala ye ziku vo Nzambi wavanga mawonso mu lunga-lunga e Sono Yavauka tuna yau o unu.

Ozevo, tulenda tanga e Diambu dia Nzambi yo kala ye vuvu vo mawonso mena mo maziku. Muna kuma kiaki, yambula twafimpa dina tulenda longoka mu kuma kia Nzambi muna ngunza zandi.