Adieyi ovova avo muntu uyuvuidi vo: “Nga ozolele zinga yakwele mvu?” Wantu ayingi balenda vova vo ingeta, kansi bemonanga vo e diambu diadi ke dilendakana ko. Kadi bekwikilanga vo yeto awonso fwa tufwa.

Kansi, yindula vo e kiuvu kiaki kivangilu mu mpila eyi: “Nga ozolele fwa?” Ayingi balenda vova vo, nkatu. E mvutu zazi adieyi zisonganga? Zisonganga vo tuna ye luzolo lwakwamana zinga kanele vo tunuananga yo lubangamu ye mpasi. E Diambu dia Nzambi disonganga vo Nzambi wavanga wantu yo luzolo lwa zinga yakwele mvu. Divovanga vo: ‘Osidi e zingu kia kwele mvu muna ntima miau.’​—Kimpovi 3:11.

Kansi e ludi i kiaki, wantu ke bezinganga yakwele mvu ko. Nkia diambu diabwa? Nga Nzambi diambu kavanga muna dio singika? E mvutu za Nkand’a Nzambi mu diambu diadi zalukasakeso kikilu, zisonganga mpe e kuma Yesu kamwena e mpasi yo fwa.

E kapu tatu yantete ya nkanda Etuku ikutuzayisanga vo Nzambi wavana e lau dia zinga yakwele mvu kwa Adami yo Eva, wabazayisa mpe dina bafwete vanga mu vua e zingu kiaki. Lusansu lwalu lusonganga una bakolamena Nzambi yo vidisa moyo wau. Akaka bevovanga vo lusansu lwalu ke lwa ludi ko. Kansi, nkanda Etuku una nze nsangu zasoneka antumwa, ukutuvananga ziku vo wavumunwinwa kwa Nzambi. *

Nkia mfwilu diatwasa wau Adami kalembi lemvokela Nzambi? Nkand’a Nzambi uvovanga vo: “Wauna e sumu diakotela ova nza muna muntu mosi [Adami], o lufwa mpe muna sumu, i nsayana lwasayana o lufwa kwa wantu awonso, e kuma kadi awonso basumuka.” (Roma 5:12) Adami wasumuka wau kakolamena Nzambi. Muna mpila yayi, Adami wavidisa moyo a mvu ya mvu yo fwa. Yeto awonso twasambukila e sumu diandi kadi tu wan’andi. Muna kuma kiaki, yeto awonso tuyelanga, nuna yo fwa. O sambukila e sumu diafwanana ye una o wana besambukilanga yimbevo ya mase. Kansi, nga Nzambi diambu kavanga muna dio singika?

Nzambi wavanga nkubika muna vutulwisa moyo a mvu ya mvu kwa wana Adami. Aweyi kavangila wo?

E sono kia Roma 6:23 kivovanga vo: “O mfutu a sumu i lufwa.” Disongele vo e sumu i ditwasanga o lufwa. O Adami wafwa mu kuma kia sumu. Diau dimosi, yeto mpe tufwanga mu kuma kia sumu. Kansi, ke tulendi kuyitumba ko wau twawutuka ye sumu. Kuna zola kwandi, Nzambi watuma Mwan’andi Yesu kimana katuvevola muna masumu meto. Aweyi diavangamena?

Wau vo Adami muntu alunga kakala, kansi wasumuka yo fwa mu kuma kia ukolami. Diavavanga vo muntu ankaka walunga kafwa muna kutuvevola muna tumbu kia lufwa. Nkand’a Nzambi uvovanga vo: “Wau vo muna ukolami wa muntu mosi, ndonga yakitulwa se asumuki, diau dimosi mpe muna lemvo wa muntu mosi, ndonga bekitulwa se ansongi.” (Roma 5:19) Yesu i “muntu” ndioyo oyikwanga mu sono kiaki. Wasisa e zulu yo kituka se muntu alunga *, wafwa muna wete dieto. Muna kuma kiaki, tulenda kala nkala ansongi vana meso ma Nzambi yo vua moyo a mvu ya mvu.

Nga mfunu kikilu diakala vo Yesu kafwa muna kutuvana moyo a mvu ya mvu? Ekuma Nzambi Mpungu-ngolo kalembi yambula vo mbongo ya Adami yazinga yakwele mvu e? Dialudi vo Nzambi una ye wisa mu vanga wo. Kansi, kavanga wo ko muna lembi kulula o nsiku andi wa sia vo mfutu a sumu i lufwa. Owau ke mpasi nsiku ko ulenda sobwa konso ntangwa. Wasikidisilwa muna unsongi.—Nkunga 37:28.

Wau vo Nzambi wasadila unsongi muna diambu diadi, wantu balenda kukiyuvula kana vo osadilanga mpe unsongi muna mambu mankaka. Muna bonga e nona, nga diansongi diadi kala kele vo Nzambi kasola akaka muna wana Adami bavua  moyo a mvu ya mvu? Nga o wantu badi bunda e vuvu vo olungisa e nsilu miandi? Wau vo Nzambi watatidila unsongi muna sikidisa luvuluzu lweto, tulenda bunda e vuvu vo okwamanana vanga edi diambote.

Nzambi wasadila kimenga kia lufwa lwa Yesu muna ziula e nzila kimana twavua moyo a mvu ya mvu muna Paradiso ova ntoto. Tala mvovo mia Yesu muna Yoane 3:16. “Muna nzola katoma zola e nza o Nzambi i kavanin’o Mwan’andi amosi, kimana konso on’okwikilanga muna yandi ke fwaswa ko, moyo a mvu ya mvu kevua.” Lufwa lwa Yesu i ziku kisonganga unsongi wa Nzambi yo zola kwandi muna wantu.

Kansi, ekuma Yesu kamwena e mpasi yo fwa lufwa lwa mpasi nze una usonganga e Nsangu zasoneka antumwa? Muna zizidila e mpasi yo tatidila e kwikizi, Yesu wavana e mvutu kwa Nkadi ampemba ona wavova vo wantu ke balendi tatidila kwikizi mu Nzambi ko muna ntangw’a mpasi. (Yobi 2:4, 5) E mvovo mia Satana nanga miamoneka vo mialudi vava kavukumuna Adami wa muntu alunga mu sumuka. Kansi, Yesu wakwamanana songa o nlemvo kana una vo wamweswa e mpasi. (1 Korinto 15:45) E kiaki i ziku kisonganga vo Adami mpe wadi lemvokela Nzambi kele vo kazola wo. Muna zizidila o lubangamu, Yesu watusisila e mbandu tufwete landa. (1 Petelo 2:21) Nzambi wavana Mwan’andi moyo ulembi fwa kuna zulu mu kuma kia nlemvo andi kasonga.

Lufwa lwa Yesu lwaziula e nzila kimana o wantu bavua moyo a mvu ya mvu. Ng’ozolele zinga yakwele mvu e? Yesu wasonga dina tufwete vanga, wavova vo: “Muna vua moyo a mvu ya mvu, divavanga vo batoma kuzaya, ngeye Nzambi mosi kaka aludi yo Yesu Kristu ona watuma.”—Yoane 17:3.

Asoneki a nkanda wau bakasakese walongoka mayingi mu kuma kia Yave wa Nzambi aludi yo Mwan’andi Yesu Kristu. Mbangi za Yave mu zunga kiaku bekala ye kiese kia kusadisa. Olenda mpe sadila e nzila eto muna internete www.jw.org/kwy.