Kuna kwa María, Raúl, Arne ye kwa akaka, e sambu i lukau lwamfunu kikilu. Muna sambu, oyau bemonanga vo balenda mokena yo Nzambi, kumvutula matondo yo kunlomba lusadisu. Bekwikilanga vo dina Bibila kivovanga mu kuma kia samba kwa Nzambi, dialudi kikilu. Bibila kivovanga vo: “Ekiaki i ziku tuna kiau kwa yandi, konso diambu tulomba mun’owu wa luzolo lwandi, wá ke kutuwá.”—1 Yoane 5:14.

Kansi, wantu ayingi bemonanga vo diampasi mu kwikila dina Bibila kivovanga mu kuma kia sambu. Steve wasasila una kemonanga mu kuma kia sambu. Wavova vo: “Vava yakala ye kimbuta kia mvu 17, yafwilwa akundi tatu muna sumbula. Mosi mu sumbula kia kalu, awole mu kalunga bafwila.” Adieyi Steve kavanga? Wavova vo: “Yasamba kwa Nzambi mu  zaya e kuma mambu mama mawonso mabwila. Kansi kampana mvutu ko. Muna kuma kiaki, yayindula: ‘Ekuma mfwete sambila kwa Nzambi?’” Nze Steve, ayingi bemonanga vo e sambu yau ke ivaninuanga mvutu ko. Muna kuma kiaki, bekukiyuvulanga kana vo diamfunu kikilu mu samba.

Vena mpe ye kuma yankaka ifilanga o wantu mu yindula vo e sambu ke ikubasadisanga ko. Wantu ankaka bevovanga vo wau vo Nzambi ozeye kala mambu mawonso, ozeye nsatu zeto yovo mpasi zeto, muna kuma kiaki ke dina mfunu ko mu kunzayisa e mambu mama.

Avo i akaka bekwikilanga vo Nzambi kazolele wá e sambu yau ko mu kuma kia mambu mambi bavanga. Jenny wavova vo: “Ikuyimwenanga vo kina kwame mfunu ko yo kuyibanza mu kuma kia mambu mambi yavanga. Muna kuma kiaki, ngina ye ziku vo Nzambi kalendi wá e sambu yame ko.”

Avo i ngeye, adieyi oyindulanga mu kuma kia sambu? Avo ngindu zaku zafwanana ye za wantu ana bayikilu kala yovo lukatikisu okalanga lwau mu kuma kia sambu, o zaya e mvutu za Bibila dilenda kufiaulwisa. Tulenda bunda e vuvu mu dina Bibila kivovanga mu kuma kia sambu. * Kilenda kusadisa mu solola e mvutu za yuvu nze:

• Nga Nzambi owanga kikilu e sambu yeto?

• Ekuma e sambu yankaka ke ivaninuanga e mvutu ko?

• Adieyi ndenda vanga kimana Nzambi kawá e sambu yame?

• Aweyi e sambu ilenda kunsadisila?