1, 2. (a) Adieyi Yesu kamokena ye alongoki andi muna fuku wavitila lufwa lwandi? (Tala e fwaniswa ova ntandu.) (b) Ekuma dinina o mfunu twasungamenanga e kuma tusamunuinanga e nsangu zambote? (c) Adieyi tubadika mu longi diadi?

MUNA fuku wavitila lufwa lwandi, Yesu wamokena mu kolo kiandá ye ntumwa zandi. Wabavovesa vo zola kwayingi kakala kwau muna yau. Wabatela mpe kingana kia nsing’a vinyu, kina twavovele muna longi diaviokele. Ekani kakala diau i kasakesa alongoki andi kimana bakwamanana “yima bundu yayingi,” i sia vo, kwamanana samuna e nsangu za Kintinu.—Yoane 15:8.

² Kansi, Yesu wavovesa mpe alongoki andi dina bafwete vanga ye kuma bafwete dio vangila. Wabazayisa e kuma bafwete kwamanena samuna e nsangu zambote. Diamfunu mpe kwa yeto twasungamenanga e kuma tufwete kwamanena samuna e nsangu zambote. O zaya e diambu diadi dikutusadisa mu kala ye luzindalalu ekolo tusilanga “umbangi kwa zula yawonso.” (Matai 24:13, 14) Mu longi diadi, tubadika kuma yá tusamunuinanga e nsangu zambote. Tuvovela mpe tukau yá katuvana o Yave tukutusadisanga mu kwamanana yima e mbongo.

3. (a) Mun’owu wa sono kia Yoane 15:8, nkia kuma kisundidi o mfunu tusamunuinanga e nsangu zambote? (b) Muna kingana kia Yesu, e uva nki isunzulanga? Ekuma dinina diambote mu tezanesa e uva ye mbongo tuyimanga?

³ E kuma kisundidi o mfunu tusamunuinanga e nsangu zambote, i kembelela Yave yo velelesa e nkumbu andi. (Tanga Yoane 15:1, 8.) Vava Yesu katá e kingana kia nsing’a vinyu, watezanesa Yave yo mvati ona okunanga uva. Yesu wavova vo yandi i nsing’a vinyu alandi andi i tayi. (Yoane 15:5) Muna kingana kiaki, e uva zisunzulanga e bundu ina alongoki andi beyimanga yovo salu kia umbangi kina besalanga. Yesu wavovesa ntumwa zandi vo: “O Se diame okembeselwa muna diadi, kimana nwakwamanana yima bundu yayingi.” Vava o nsing’a vinyu uwutanga uva zambote, uvananga nkembo kwa ndiona wakuna wo. Diau dimosi mpe, vava tukuyivananga muna salu kia samuna e nsangu za Kintinu, tuvananga o nkembo kwa Yave.—Matai 25:20-23.

4. (a) Aweyi tuveleleselanga e nkumbu a Nzambi? (b) Aweyi omonanga mu kuma kia lau una diau dia velelesa e nkumbu a Nzambi?

⁴ E nkumbu a Nzambi yavauka yovo yavelela. Ke vena lekwa ko kilenda yo toma velelesa diaka. Ozevo, aweyi tuveleleselanga e nkumbu a Nzambi vava tusamunanga e nsangu zambote? Tala dina Yesaya wa ngunza kavova: ‘Yave a vu—yandi nufwete badikila vo wavauka’ (Yesaya 8:13) Tuvaulanga e nkumbu Yave, vava tubadikilanga yo vo i nkumbu isundidi e nkumbu zawonso. Tuvanganga wo mpe vava tusadisanga akaka mu bakula vo e nkumbu a Nzambi yavauka yovo yavelela. (Matai 6:9; mvovo vana yand’a lukaya) Muna bonga e nona, vava tulonganga o wantu e ludi mu kuma kia fu yambote ya Yave ye kani diandi dia sia vo wantu bazinga yakwele mvu muna Paradiso, tukubasadisanga mu zaya vo mawonso mambi kavova o Satana mu kuma kia Yave maluvunu kwandi. (Etuku 3:1-5) Tuvelelesanga mpe nkumbu a Nzambi vava tusadisanga o wantu mu zaya vo Yave kaka “ofwene tambula nkembo yo zitu ye ngolo.” (Lusengomono 4:11) Rune, una muna salu kia kimviti a nzila se vioka mvu 16, wavova vo: “O kala mbangi a Mvangi a nsema wawonso lau diampwena kikilu, kiese kiayingi dikumpananga. Ediadi dikumfilanga mu kwamanana samuna e nsangu zambote.”

5. (a) Nkia kuma kiayikwa muna Yoane 15:9, 10 tusamunuinanga e nsangu za Kintinu? (b) Aweyi Yesu kasadisila alongoki andi mu zaya o mfunu wa kala ye luzindalalu?

⁵ Tanga Yoane 15:9, 10. E kuma kiazole tusamunuinanga e nsangu za Kintinu i kia sia vo Yave yo Yesu tuzolanga. (Maku 12:30; Yoane 14:15) Yesu wavovesa alongoki andi vo bafwete ‘sikila muna zola kwandi.’ Ekuma Yesu kavovela wo? Kadi wazaya wo vo muna kala Akristu akieleka, alandi andi bafwete kala ye luzindalalu. Muna Yoane 15:4-10, tumwene vo Yesu wasadila o mvovo ‘sikila’ mu sadisa alongoki andi mu zaya o mfunu wa kala ye luzindalalu.

6. Aweyi tulenda songela vo tuzolele sikila muna zola kwa Kristu?

 ⁶ Aweyi tulenda songela vo tuzolele sikila muna zola kwa Kristu yo tondakana kwa yandi? Tulenda wo songa vava tukunlemvokelanga. Dina kekutulombanga o Yesu, i diau mpe kavanga. Wavova vo: “Wauna omono ilundilanga nkanikinu mia Se diame yo sikila muna zola kwandi.” Yesu watusisila e mbandu.—Yoane 13:15.

7. Nkia ngwizani ina vana vena o nlemvo yo zola?

⁷ Yesu wasonga e ngwizani ina vana vena nlemvo yo zola vava kavova vo: “Konso ona una ye nkanikinu miame yo lunda mio, i yandi unzolele.” (Yoane 14:21) E nkanikinu kavana o Yesu kwa Se diandi miatuka. Muna kuma kiaki, vava tulemvokelanga nkanikinu wa Yesu wa samuna e nsangu zambote, tusonganga mpe vo Yave tuzolanga. (Matai 17:5; Yoane 8:28) Vana ntandu, vava tusonganga kwa Yave yo Yesu vo zola tukubazolanga, oyau mpe bekwamananga kutuzola.

8, 9. (a) Nkia kuma kiankaka tusamunuinanga e nsangu zambote? (b) Aweyi e mvovo mia Yave mina muna Yezekele 3:18, 19 ye 18:23 mikutukasakeselanga mu kwamanana samuna e nsangu zambote?

⁸ E kuma kiatatu tusamunuinanga e nsangu zambote i mu lukisa akaka mu kuma kia lumbu kia Yave eki kifinamanga. Muna Nkand’a Nzambi, Noa oyikilwanga vo “nteleki.” (Tanga 2 Petelo 2:5.) Vitila Kizalu kiayantika, Noa walukisanga o wantu mu kuma kia lufwasu lwafinamanga. Ekuma tuvovele wo? E kuma kadi Yesu wavova vo: “Kadi nze una wakala muna lumbu yayina, ina yavitila e Kizalu, badianga, banuanga, akala basompanga, akento basompeswanga, yamuna lumbu kiakota Noa muna nzaza, ke basia sungididi ko yavana Kizalu kiayiza, kiabakukulwisa yau awonso, i una mpe ukala muna ngiz’a Mwan’a muntu.” (Matai 24:38, 39) Kana una vo wantu ayingi bamvezanga, Noa wakwamanana zayisa kwa wantu e nsangu za lulukisu katumwa kwa Yave.

⁹ O unu, tusamunanga e nsangu za Kintinu mu vana akaka e lau dia longoka dina Nzambi kesinga vanga mu kuma kia wantu kuna sentu. Nze Yave, tuzolele vo wantu basia e sungididi muna nsangu tukubasamunuinanga kimana ‘bakwamanana zinga.’ (Yezekele 18:23) Vava tusilanga umbangi mu nzo ye nzo ye muna fulu ya ndonga, tulukisanga wantu ayingi vo e Kintinu kia Nzambi kikwiza fwasa e nza yayi yambi.—Yezekele 3:18, 19; Daniele 2:44; Lusengomono 14:6, 7.

10. (a) Nkia kuma kiankaka tusamunuinanga e nsangu zambote kiasonama muna Matai 22:39? (b) Aweyi Paulu yo Sila basadisila nyingidi a pelezo kuna mbanz’a Filipi?

¹⁰ E kuma kiayá tukwamanenanga samuna e nsangu zambote i zola kweto muna wantu. (Matai 22:39) O zola kwaku, kukutusadisanga mu kwamanana samuna e nsangu zambote kadi tuzeye wo vo wantu balenda soba e fu yau avo mambu ma zingu kiau masobele. Kasikil’owu, atantu basia Paulu yo Sila muna pelezo kuna mbanz’a Filipi. Kansi muna fuku, vabwa nzakam’a ntoto eyi yanikuna e pelezo yo ziula e mielo. O nyingidi wamona o wonga kadi wayindula vo abakami awonso batinini ye wazola kuyivonda. Kansi Paulu wamvuvika o ntima yo kumvovesa vo: “Kuyivondi ko.” O nyingidi wayuvula vo: “Adieyi mfwete vanga muna vuluzwa?” Paulu yo Sila bamvutula vo: “Kwikila muna Mfumu Yesu wavuluzwa.”—Mavangu 16:25-34.

11, 12. (a) Adieyi tulenda longoka muna lusansu lwa nyingidi a pelezo mu kuma kia salu kia samuna e nsangu zambote? (b) Adieyi dikutufilanga mu kwamanana samuna e nsangu zambote?

¹¹ Adieyi tulenda longoka muna lusansu lwa nyingidi a pelezo mu kuma kia salu kia samuna e nsangu zambote? Tumwene vo vava vabwa kaka e nzakam’a ntoto, o nyingidi wasoba e ngindu yo vava lusadisu. Diau dimosi mpe, wantu ayingi ana ke bezolanga wá nsangu za Nkand’a Nzambi ko, balenda soba e ngindu yo vava lusadisu avo diambu diampasi dibabwididi. Kasikil’owu, akaka balenda tokana kwayingi avo bakatwilu muna salu yovo longo lufwidi. Akaka balenda kendalala avo babakamene kimbevo kiangolo yovo mu kuma kia lufwa lwa muntu betoma zolanga. Vava bebwilanga mambu mama, wantu balenda yantika kukiyuvula yuvu yayingi mu kuma kia zingu, eyi ke bateka kukiyuvula ko. Balenda kukiyuvula: ‘Adieyi mfwete vanga muna vuluzwa?’ O wantu awaya balenda kala ye luzolo lwa wá e nsangu tusamunanga, ezi zisadisanga wantu mu kala ye vuvu kia kusentu.

¹² Muna kuma kiaki, avo tukwamanene samuna e nsangu zambote, twakubama tukala vava wantu bekala yo luzolo lwa tambulwila e nsangu za lufiaulwisu tukubasamunuinanga. (Yesaya 61:1) Mpangi Charlotte, una muna salu kia kimviti a nzila se vioka mvu 38, wavova vo: “O unu, o wantu bavila bena. Nsangu zambote bavuidi o mfunu.” Mpangi Ejvor, una muna salu kia kimviti a nzila se vioka mvu 34, wavova vo: “O unu, lutila tandu yankaka, wantu ayingi bena bakendalala. Nzolele kubasadisa. Ediadi dikumfilanga mu kubasadisa.” Kieleka, o zola muna wantu kuma kia sikila kikilu kifwete kutufila mu kwamanana samuna e nsangu zambote.

13, 14. (a) Nkia lukau luyikwanga muna Yoane 15:11? (b) Aweyi tulenda kadila ye kiese nze kina Yesu kakala kiau? (c) Aweyi e kiese kikutusadisilanga muna salu kia umbangi?

¹³ Muna fuku wavitila lufwa lwandi, Yesu wayika mpe tukau twadisadisa ntumwa zandi mu kwamanana yima e mbongo. Nkia tukau kayika? Aweyi tukau twatu tulenda kutusadisila o unu?

¹⁴ Kiese. Nga o sila umbangi diambu diampasi kwa yeto? Ve. Vava Yesu kayika kingana kia nsing’a vinyu, wavova vo avo tusamuna e nsangu zambote, tukala ye kiese kiandi. (Tanga Yoane 15:11.) Aweyi tulenda vuila kiese kiaki? Sungamena vo muna kingana kiandi, Yesu wavova vo yandi i nsing’a vinyu,  alongoki andi i tayi. E tayi itambulanga kaka e maza ye lekwa yankaka ivuidi o mfunu avo ikwamanene muna nsing’a vinyu. Diau dimosi mpe, tulenda kala ye kiese nze kina Yesu kakala kiau avo tukedi entwadi yo yandi yo kwamanana landa e ntambi zandi. Muna mpila yayi, tukala ye kiese nze kina kakala kiau. E kiese kiaki kikwizanga vava tuvanganga luzolo lwa Nzambi. (Yoane 4:34; 17:13; 1 Petelo 2:21) Mpangi Hanne, una muna salu kia kimviti a nzila se vioka 40 ma mvu, wavova vo: “E kiese imonanga avo ntukidi muna salu kia umbangi kikumfilanga mu kwamanana muna salu kia Yave.” E kiese kikutuvananga o nkuma wa kwamanana samuna e nsangu zambote kana una vo wantu ayingi ke bezolanga kutuwá ko.—Matai 5:10-12.

15. (a) Nkia lukau luyikwanga muna Yoane 14:27? (b) Aweyi luvuvamu lukutusadisilanga mu kwamanana yima e mbongo?

¹⁵ Luvuvamu. (Tanga Yoane 14:27.) Muna fuku wavitila lufwa lwandi, Yesu wavovesa alongoki andi vo: “Inuvene luvuvamu lwame.” Aweyi luvuvamu lwa Yesu lukutusadisilanga mu kwamanana sila umbangi? Vava tukuyivananga muna salu kia umbangi, luvuvamu tukalanga lwau kadi tuzeye wo vo Yave yo Yesu tuyangidikanga. (Nkunga 149:4; Roma 5:3, 4; Kolosai 3:15) Mpangi Ulf, una muna salu kia kimviti a nzila se vioka mvu 45, wavova vo: “Ezak’e ntangwa e salu kia umbangi yoyesa kikungioyesanga. Kansi kiese kiayingi mpe kikuntwasilanga muna zingu.” Tuvutulanga matondo wau tuna ye luvuvamu lwakieleka.

16. (a) Nkia lukau luyikwanga muna Yoane 15:15? (b) Adieyi diadi sadisa antumwa mu kwamanana kala akundi a Yesu?

¹⁶ Akundi. Vava kavovesa ntumwa zandi vo bakala ye kiese, wasonga e kuma diakadila diamfunu mu kwamanana songa e nzol’amvevo. (Yoane 15:11-13) I bosi wabavovesa vo: “Oyeno nu akundi ame.” Kieleka, o kala nkundi a Yesu lukau lwamfunu kikilu. Kansi, adieyi diavavuanga kwa ntumwa mu kwamanana kala akundi andi? Yesu wavova vo: ‘Nukwamanana yima bundu.’ (Tanga Yoane 15:14-16.) Muna mvovo miankaka, disongele vo tufwete kwamanana samuna e nsangu zambote. Vitila mvu miole, Yesu wavovesa ntumwa zandi vo: “Wau nukwenda, nulonga vo: ‘E Kintinu kia zulu kifinamene.’” (Matai 10:7) Muna kuma kiaki, muna fuku wavitila lufwa lwandi, Yesu wakasakesa alongoki andi bazindalala muna salu kia samuna e nsangu zambote. (Matai 24:13; Maku  3:14) Yesu wazaya wo vo lemvokela o nkanikinu wau diampasi diadi kala. Kansi, alongoki andi balenda wo vanga yo kwamanana kala akundi andi. Nki kiabasadisa? Lukau lwankaka luna batambula.

17, 18. (a) Nkia lukau luyikwanga muna Yoane 15:7? (b) Aweyi lukau lwalu lwasadisila alongoki a Yesu? (c) Nkia tukau tukutusadisanga o unu?

¹⁷ Mvutu za sambu yeto. Yesu wavova vo: “Konso dina nulomba divangama kwa yeno.” (Yoane 15:7, 16) O nsilu wau wa Yesu wakasakesa kikilu antumwa. * (Tal’e mvovo vana yand’a lukaya.) Antumwa ke babakulanga ko vo lufwa lwa Yesu lukufi lwakala. Kansi, lufwa lwandi ke lwasonga ko vo ke bekala diaka yo nsadisi ko. Yave ovana e mvutu za sambu yau yo kubasadisa muna salu kia umbangi. I diau mpe kavanga. Ke vavioka kolo ko vava Yesu kafwa, antumwa basamba kwa Yave kimana kabavana unkabu. Yave wavana e mvutu za sambu yau.—Mavangu 4:29, 31.

¹⁸ I diau mpe divangamanga kwa yeto o unu. Avo tuzindalala muna salu kia umbangi, tukwamanana kala akundi a Yesu. Tulenda kala ye ziku vo Yave ovana e mvutu za sambu yeto vava dikalanga diampasi mu samuna e nsangu zambote. (Filipi 4:13) Tuvutulanga kikilu matondo wau vo Yave ovananga e mvutu za sambu yeto yo kala akundi a Yesu. Tukau twatu kekutuvananga o Yave tukutusadisanga mu kwamanana yima e mbongo.—Yakobo 1:17.

19. (a) Ekuma tukwamanenanga samuna e nsangu zambote? (b) Nki kikutusadisanga mu fokola e salu twavewa kwa Nzambi?

¹⁹ Mu longi diadi tulongokele kuma yá ikutufilanga mu kwamanana samuna e nsangu zambote: kembelela Yave yo velelesa e nkumbu andi, songa o zola kweto muna Yave yo Yesu, lukisa o wantu yo songa vo zola tuna kwau muna wantu. Tulongokele mpe tukau yá: kiese, luvuvamu, kikundi ye mvutu za sambu yeto. E tukau twatu tukutusadisanga mu fokola e salu twavewa kwa Nzambi. Yave otoma yangalalanga vava kemonanga e ngolo tuvanganga za “kwamanana yima e bundu yayingi.”