1-2. Ekuma tulunganenanga muna Luyindulu konso mvu?

 SE VIOKA 2.000 ma mvu, Yesu wavana o moyo andi muna wete dieto. Muna mpila yayi, waziula e nzila kimana twa vua moyo a mvu ya mvu. Muna fuku wavitila lufwa lwandi, Yesu wakanikina alandi andi kimana bayindulanga e vangu diadi dia zola kwandi, muna vanga Luyindulu muna sadila kaka mbolo ye vinho.—1 Kor. 11:23-26.

² Tulemvokelanga nkanikinu wa Yesu kadi zola tutoma kunzolanga. (Yoa. 14:15) Konso mvu muna nsungi a Luyindulu, tusonganga luyangalalu lweto muna mawonso Yesu kavanga muna vaulanga e ntangwa ya samba yo badika e nsasa a lufwa lwandi. Tuwokesanga mpe o vema kweto muna salu kia umbangi muna kasakesa wantu ayingi kimana bakala yeto muna kolo kiaki kia mfunu. Ozevo, tuna ye kani dia lembi yambula vo konso diambu diatuvunzanesa mu kala muna Luyindulu.

3. Nkia mambu tulongoka mu longi diadi?

³ Mu longi diadi, tubadika mambu tatu mana nkangu a Yave bevangilanga e ngolo muna yindula lufwa lwa Yesu: (1) muna vangila Luyindulu muna mpila o Yesu kasikidisa, (2) muna bokela o wantu beza mu Luyindulu ye (3) muna lembi yambula vo konso diambu diatuvunzanesa muna lungananga muna Luyindulu.

4. Nkia mambu tulongwanga muna Luyindulu? Ekuma tufwete vutulwilanga matondo wau tubakulanga mambu mama? (Luka 22:19, 20)

⁴ Konso mvu muna Luyindulu, tuwanga e longi dia Bibila divananga  e mvutu zayingi za toma kiá. Tulongokanga ekuma o wantu bavuididi o lukûlu o mfunu ye una o lufwa lwa muntu mosi kaka lwakudila e masumu ma wantu ayingi. Tusungameswanga mpe e nsasa mbolo ye vinyu ye aki nani balenda dia e mbolo yo nua e vinyu muna Luyindulu. (Tanga Luka 22:19, 20.) Tubadikanga mpe e nsambu bevua awana bena ye vuvu kia zingila ova ntoto. (Yes. 35:5, 6; 65:17, 21-23) Kieleka, tutoma vutulanga matondo wau tubakulanga e mambu mama. Wantu ayingi ke bebakulanga mambu mama ko, ke bebakulanga mpe ko o mfunu wa kimenga kia Yesu, ke bevangilanga mpe Luyindulu ko muna mpila ina o Yesu kakanikina. Ekuma?

5. Kuna nima lufwa lwa ntumwa za Yesu, aweyi o wantu bayantika kembelela o lufwa lwa Yesu?

⁵ Ke vavioka kolo ko vava ntumwa za Yesu bafwa, Akristu a luvunu bakota muna nkutakani. (Mat. 13:24-27, 37-39) Akristu awaya bayantika vova “mambu mabendomoka muna tunta alongoki benda balandi.” (Mav. 20:29, 30) Dimosi muna “mambu mabendomoka” Akristu awaya bayantika longa, i dia sia vo, Yesu katambika e nitu andi nkumbu mosi kaka ko “kimana kanata masumu ma wantu ayingi” nze una e Bibila kilonganga. Kansi balonganga vo Yesu kafwete tambikwa nkumbu miayingi. (Ayi. 9:27, 28) O unu, wantu ayingi akwa ntima miambote bekwikilanga muna longi diadi dia luvunu. Ntangwa ke ntangwa belungananga vamosi muna vanga o nkinzi una beyikilanga vo, “Sacrifício da missa.” b Mabundu mankaka mpe ke mekembelelanga lufwa lwa Yesu ko nkumbu miayingi, kansi ayingi muna yau mpe ke bazeye ko e nsansa akieleka ya lukûlu lwa Yesu. Kansi akaka bekukiyuvulanga: ‘Nga lufwa lwa Yesu lulenda kikilu loloka masumu mame?’ Ekuma bevangilanga e kiuvu kiaki? Nkumbu miayingi wantu awaya bevukumunuanga kwa awana bevovanga vo e masumu ke malendi lolokwa ko muna lufwa lwa Yesu. Aweyi alandi a Yesu besadisilanga o wantu mu bakula e nsansa a kimenga kia Yesu ye mpila yambote ina o lufwa lwa Yesu lufwete kembelelwa?

6. Muna mvu wa 1872, nkia diambu alongoki a Bibila babakula?

⁶ Kuna kwa landa muna tandu kia 19, buka kimosi kia alongoki a Bibila kiafilwanga kwa Charles Taze Russell, kiayantika longoka e sono una ufwene. Bazola zaya e ludi mu kuma kia nsasa a kieleka ya kimenga kia Yesu ye una o lufwa lwandi lufwete kembelelwa. Muna mvu wa 1872, muna lusadisu lwa Bibila babakula vo Yesu wavana kikilu e kimenga kiandi muna kûla wantu awonso. Ke balunda ludi kiaki ko, kansi bayantika zayisa e ludi kiaki muna sadila nkanda, zulunalu ye Eyingidilu. Kuna kwalanda, muna tanginina Akristu a tandu kiantete, yau mpe bayantika kembelela Luyindulu lwa lufwa lwa Yesu nkumbu mosi muna mvu.

7. Aweyi tuvuilanga e nluta muna lufimpu alongoki a Bibila bavanga?

⁷ O unu tuvuanga e nluta miayingi mu kuma kia lufimpu luna Akristu awaya bavanga se vioka mvu miayingi. Mu nkia mpila? Muna lusadisu lwa Yave, o meso meto matemoka muna bakula e ludi mu kuma kia Kimenga kia Yesu ye mana kilungisanga. (1 Yoa. 2:1, 2) Tubakulanga mpe vo e Bibila kivovanga vo, vena ye buka yole ya awana beyangidikanga Nzambi bena ye vuvu kia swaswana. E buka kimosi kivua o moyo ulembi fwanga kuna zulu. Vo i ndong’ayingi ivua o moyo wakwele mvu ova ntoto. Vava tubakulanga e nzola ampwena o  Yave katusonga ye una e kimenga kia Yesu kikututwasilanga e nluta, ediadi dikutufinamesanga kwa Yave. (1 Pet. 3:18; 1 Yoa. 4:9) Muna kuma kiaki nze una bavanganga ampangi zeto muna mvu miavioka, yeto mpe tubokelanga wantu ayingi beza lungana yeto muna Luyindulu olu luvangamenanga muna mpila ina o Yesu kasikidisa.

8. Adieyi nkangu a Nzambi uvanganga muna bokela wantu beza mu Luyindulu? (Tala e mafoto)

⁸ O nkangu a Yave se tuka kolo ubokelanga o wantu kimana balungana yau muna Luyindulu. Kuna lubantiku lwa mvu wa 1881, ampangi kuna Estados Unidos babokelwa muna lungana muna Luyindulu kuna nzo a mpangi mosi kuna Allegheny, Pennsylvania. Kuna kwalanda, konso nkutakani yayantika vanga Luyindulu lwau. Muna mvu wa 1940 ateleki bazayiswa vo balenda bokela o wantu muna zunga kiau kimana beza lungana muna Luyindulu. Muna mvu wa 1960, e Betele yanieteka e mboka mu nkumbu antete yo twika zo muna nkutakani. Tuka muna kolo kiakina mafunda ye mafunda ma mboka zikayaneswanga. Ekuma tuvangilanga e ngolo yo sadila e ntangwa yayingi muna bokela wantu?

9-10. Aki nani bevuanga e nluta muna ngolo tuvanganga za bokela o wantu beza mu Luyindulu? (Yoane 3:16)

⁹ Kimosi muna kuma tubokelelanga o wantu beza lungana yeto muna Luyindulu, i kia sia vo tuzolele vo awana bekwizanga muna Luyindulu mu nkumbu antete balongoka e ludi mu kuma kia Yave, Yesu ye mana bavanga mu kuma kia yeto awonso. (Tanga Yoane 3:16.) Tuvingilanga mpe vo mana bewanga yo mona muna Luyindulu mabafila mu longoka diaka  mayingi mu kuma kia Yave yo kituka selo yandi. Kansi vena diaka yo wantu ankaka bevuanga e nluta.

¹⁰ Tubokelanga mpe awana ke besadilanga diaka Yave ko. Tukubasungamesanga vo Nzambi wakinu kubazola. Ayingi muna yau betambulanga e mboka eto, tuyangalalanga kubamona muna Luyindulu. Okala muna Luyindulu dikubasungamesanga e kiese bakala kiau vava basadilanga Yave. Badika e nona kia mpangi Mónica. c Wavutuka kala nteleki muna kolo kia COVID-19. Vava kayenda mu Luyindulu muna mvu wa 2021, wavova vo: “O Luyindulu lwalu lwa mfunu kikilu kwa mono, kadi se vioka mvu 20 i nkumbu antete diaka nsididi o umbangi kwa wantu yo kubabokela beza mu Luyindulu. Yavanga mawonso mu bokela o wantu beza mu Luyindulu kadi itoma vutulanga matondo muna dina Yave yo Yesu bavanga mu kuma kiame.” (Nku. 103:1-4) Kiakala vo o wantu betambulwila yovo ve e mboka eto, tusonganga o vema kweto muna bokela o wantu beza mu Luyindulu kadi tuzeye wo vo Yave oyangalelanga e ngolo tuvanganga.

11. Aweyi Yave kesambulwilanga e ngolo tuvanganga za bokela o wantu beza mu Luyindulu? (Kangai 2:7)

¹¹ Yave otoma sambulanga e ngolo tuvanganga za bokela o wantu beza mu Luyindulu. Muna mvu wa 2021, kana una vo vakala ye vuku kia COVID-19, o lutangu lwa awana bakala muna Luyindulu lwawokela kikilu yo lwaka mu 21.367.603. O lutangu lwalu, i ndambu ya Mbangi za Yave bena omu nza yawonso. Dia ludi vo Yave ketokanenanga lutangu ko, kansi otokanenanga konso muntu muna awana bekwizanga mu Luyindulu. (Luka 15:7; 1 Tim. 2:3, 4) Kieleka, tuna ye ziku vo Yave osadilanga e salu tusalanga kia bokela o wantu kimana twasolola akwa ntima mia nsongi.—Tanga Kangai 2:7.

12. Nkia mambu malenda kutukakidila mu kala mu Luyindulu? (Tala e foto.)

¹² Yesu wasakula vo mu lumbu yambaninu tuwanana ye mpila zawonso za mambu ma mpasi, nze siwa kitantu kwa yitu, lubangamu, vita, mayela ye mambu mayingi mankaka. (Mat. 10:36; Maku 13:9; Luka 21:10, 11) E zak’e ntangwa mu kuma kia mambu mama, dia mpasi dikalanga kwa yeto mu kala mu Luyindulu lwa lufwa lwa Yesu. Aweyi e mpangi zeto besundilanga e nkakalakani zazi? Aweyi Yave kekubasadisilanga?

13. Aweyi Yave kasambulwila o unkambu ye kani dia mpangi Artem dia vanga Luyindulu kana una vo mu pelezo kakala?

¹³ Pelezo. E mpangi zeto ana bena mu pelezo mu kuma kia lukwikilu lwau, bevanganga mawonso balenda mu kala mu Luyindulu lwa lufwa lwa Yesu. Badika e nona kia mpangi Artem. Muna kolo kia Luyindulu lwa 2020, wasiwa mu pelezo yakete-kete, eyi yafwana kaka kota wantu 5. Kana una vo mu pelezo kakala walenda kubika e mbolo ye vinyu yo vanga e longi dia Luyindulu yandi kibeni. Kansi akwandi a pelezo banuanga e mfomo yo vova e mvovo mia nsoni. Adieyi mpangi Artem kavanga? Wabalomba kimana bayambula nua mfomo yo vova e mvovo mia nsoni mu kolo kia ola mosi. Mpangi Artem wasivika kikilu, kadi akwandi apelezo batambulwila e ndomba andi ya lembi nua e mfomo yo vova e mvovo mia nsoni muna kolo kia Luyindulu. Mpangi Artem wavova vo: “Yabazayisa oma ma Luyindulu.” Kana una vo ke bazola wá ko ngatu kala muna Luyindulu, vava bamona yo wá mpangi Artem ekolo  kafilanga e longi dia Luyindulu akwandi a pelezo bayunvula mambu mayingi mu kuma kia Luyindulu.

14. Nkiga ngolo ampangi bavanga mu kala muna Luyindulu kana una vo vuku kia COVID-19?

¹⁴ Vuku kia COVID-19. Vava e vuku kiaki kiayantika, Mbangi za Yave ke balenda diaka kala vamosi ko muna Luyindulu. Kansi, ediadi ke diabakakidila ko mu lembi vanga Luyindulu. d E nkutakani zakala ye internete zavangila o Luyindulu muna videoconferência. Kansi adieyi tuvova mu kuma kia mamfunda ye mafunda ma wantu ana ke bakala ye internete ko? Muna nsi zankaka ampangi bavanga e nkubika muna fila e longi muna televizau yovo radio. Vana ntandu, ampangi kuna Betele babandula e longi mu tezo kia 500 za ndinga mu kuma kia awana bezingilanga mu fulu yandá balanda e longi dia Luyindulu. Mpangi zankaka bakulumunanga e longi diadi yo twika dio kwa ampangi zayingi.

15. Adieyi olongokele muna nona kia nlongoki a Bibila una ye nkumbu Sue?

¹⁵ Siwa kitantu kwa yitu. E diambu dikakidilanga  o wantu ankaka mu kala mu Luyindulu, i kitantu besiwanga kwa yitu yau. Badika e nona kia nlongoki mosi a Bibila una ye nkumbu Sue. Muna mvu wa 2021 vitila Luyindulu, Sue wavovesa nlongi andi a Bibila vo ke kala ko muna Luyindulu kadi kitantu kasiwanga kwa yitu yandi. O nlongi andi wantangila Luka 22:44, i bosi wansasila vo, vava tuwanananga ye mambu mampasi, tufwete landa e bandu a Yesu yo lomba lusadisu lwa Yave muna sambu. I bosi, muna lumbu kia landa Sue wakubika e mbolo ye vinyu yo landa e longi dia espesiale dia nsambila ya mene muna programa ya jw.org. Muna fuku wauna, ekolo kakala yandi mosi muna suku diandi wasadila e telefone andi mu landa e longi dia Luyindulu. Kuna kwalanda, wasonekena nlongi andi a Bibila oku vo: “O zono watoma kunkasakesa, yavangidi mawonso muna kala mu Luyindulu. O Yave unsadisi kikilu, kiese kiayingi ngina kiau, mvutwidi kikilu matondo kwa Yave.” Adieyi obenze, nga Yave olenda kusadisa vava owanananga ye diambu dia mpansi nze dina mpangi Sue kawanana diau?

16. Ekuma tulenda kadila ye ziku vo Yave osambula e ngolo zeto za kala muna Luyindulu? (Roma 8:31, 32)

¹⁶ Yave oyangalelanga kikilu e ngolo tuvanganga mu kala muna luyindulu lwa lufwa lwa Yesu. Tulenda kala ye ziku vo Yave okutusambula vava tusonganga luyangalalu muna mawonso Yave kavanga mu kuma kieto. (Tanga Roma 8:31, 32.) Muna kuma kiaki, yambula twakala ye kani dia kala muna Luyindulu o mvu wau yo vanga mawonso tulenda muna kaya e mboka za Luyindulu yo vema kwawonso.