LONGI DIA 19
NKUNGA WA 6 Zulu Ditelekanga Nkembo a Nzambi
Tanginina e Mbasi za Kwikizi
“Nusanisina Yave, e mbasi zandi zawonso.”—NKU. 103:20.
DIAMBU DIASINA TULONGOKA
Tubadika malongi tulenda longoka muna mbandu a mbasi za kwikizi.
1-2. (a) Mu nkia mambu twaswaswanena ye ambasi? (b) Mu nkia mambu twafwananena ye ambasi?
VAVA Yave katunta muna ludi, wakotesa muna kanda diandi diampwena dia asambidi. Muna kanda diadi muna ye mpangi zeto mu nz’amvimba ye mafunda ye mafunda ma ambasi. (Dan. 7:9, 10) Vava tuyindulanga ambasi, nanga tuyindulanga e mpila baswaswanena yo yeto. Kasikil’owu, vava wantu basemwa, ambasi bakikadila se vioka mafunda ye mafunda ma mvu. (Yobi 38:4, 7) Batusundidi muna nkuma. Wau vo tu wantu alembi lunga, ambasi batusundidi muna vauka ye unsongi.—Luka 9:26.
2 Kansi, kanele vo twaswaswana muna mambu mama, twafwanana muna mambu mayingi. Kasikil’owu, nze ambasi, yeto wantu tulenda tanginina fu yambote ya Yave. Tuvuidi mpe nswa wa kuyisolela, nze una bena wau ambasi. Nze yau, konso muntu una ye nkumbu andi, kiwuntu kiandi ye mbebe zaswaswana. Nze ambasi, yeto wantu tuna ye nsatu za sambila Mvangi eto.—1 Pet. 1:12.
3. Nkia mambu tulenda longoka muna mbandu ambasi za kwikizi?
3 Wau vo muna mambu mayingi twafwanana ye ambasi, e mbandu au ambote ilenda kutukasakesa yo kutulonga mambu mayingi mamfunu. Mu longi diadi, tubadika una tulenda tanginina lulembamu lwa ambasi za kwikizi, zola kwau muna wantu, luzindalalu lwau ye ngolo bevanganga muna tanina e nkutakani kimana yakala yavelela.
AMBASI ALEMBAMI BENA
4. (a) Mu nkia mambu ambasi besongelanga lulembamu? (b) Ekuma ambasi benena alembami? (Nkunga 89:7)
4 Mbasi za kwikizi alembami bena. Kanele vo mambu mayingi bazeye, bavuidi nkuma ye ngangu, belemvokelanga tuludiku twa Yave. (Nku. 103:20) Ekolo belungisanga iyekwa yau, ke bekuyisananga ko mu kuma kia mana bevanganga ngatu kuyitundidika mu kuma kia nkum’au. Bevanganga luzolo lwa Yave ye kiese kiawonso kanele vo ke betambulanga nkembo ko. a (Tuku 32:24, 29; 2 Nti. 19:35) Ke beyambulanga ko vo bavewa nkembo una ufwete vewa kaka kwa Yave. Ekuma ambasi benena alembami? Kadi bezolanga Yave ye bekunzitisanga.—Tanga Nkunga 89:7.
5. Aweyi mbasi kasongela lulembamu vava kasingika Yoane wa ntumwa? (Tala mpe fwaniswa.)
5 Badika nona kimosi kitoma songanga vo ambasi alembami. Muna tezo kia mvu wa 96 wa tandu kieto, mbasi mosi walembi zayakana e nkumbu, wasonga kwa Yoane wa ntumwa e mona-meso kiatuka kwa Nzambi. (Lus. 1:1) Adieyi Yoane kazola vanga vava kamona e mona-meso kiaki? Wazola sambila e mbasi. Kansi, vana vau o mbasi ndiona wa nkwa kwikizi wansima yo vova vo: “Keba! Kuvangi wo ko! Omono mpe i ntaudi nze ngeye ye mpangi zaku . . . Sambila Nzambi.” (Lus. 19:10) Ekwe lulembamu kasonga! O mbasi ndioyo kakala yo mfunu ko watambula nkembo. Vana vau wavovesa Yoane vo kavana e nkembo kwa Yave wa Nzambi. Kuna diak’e sambu, e mbasi kaveza Yoane ko. Kanele vo mbasi wasadilanga Yave se tuka kolo ye wasunda Yoane muna nkuma, kuna lulembamu lwawonso wayikila Yoane vo nkwandi a ntaudi. Kana una vo wasingika Yoane, kafusulwisa ntumwa wa nunu e nsoni ko ngatu kuntianguna. Wamvovesela kuna ngemba. Wazaya wo vo Yoane wonga kikilu kamona.
Mbasi wasonga lulembamu vava kasingika Yoane (Tala e tini kia 5)
6. Aweyi tulenda tanginina lulembamu lwa ambasi?
6 Aweyi tulenda tanginina lulembamu lwa ambasi? Yeto mpe tulenda lungisa iyekwa yeto yo lembi kuyisana ngatu vava tambula nkembo mu mana tuvanganga. (1 Kor. 4:7) Vana ntandu, ke tufwete yindulanga ko vo tusundidi akaka kele vo se kolo tusadilanga Yave ye malau mankaka ma salu tuna mau. Muna vova e ludi, ekolo tuvanganga mayingi muna salu kia Yave, tufwete kuyibadikilanga vo twandwelo kikilu. (Luka 9:48) Nze ambasi, tuzolele sadila akaka. Ke tuzolele kuyitundidika ko.
7. Aweyi tulenda songela lulembamu vava tusingikanga yo vana e longi kwa muntu?
7 Tufwete songanga mpe lulembamu avo tuzolele singika muntu yovo kumvana e longi, kiakala mpangi muna nkutakani yovo mwan’eto. Ezak’e ntangwa divavanga vo twavana e longi dia nkuma kwa muntu. Kansi, nze mbasi ona wasingika Yoane kuna ngemba, tulenda kweto vana e longi dia nkuma kwa muntu yo lembi kunkendeleka. Avo ke tukuyibadikilanga ko vo tusundidi akaka, e longi tuvana mu Bibila dituka ye tuvanina dio kuna luzitu ye nkenda.—Kol. 4:6.
AMBASI WANTU BEZOLANGA
8. (a) Landila Luka 15:10, aweyi ambasi besongelanga o zola muna wantu? (b) Aweyi ambasi bekutuyikamenanga muna salu kia samuna e nsangu zambote? (Tala mpe foto )
8 Ambasi ke bevezanga mpasi za wantu ko ngatu yindula vo ke bena mfunu ko. Kansi, bavuidi zola muna wantu. Beyangalalanga vava nsumuki kevilukanga ntima, i sia vo, vava e meme diavila kevutukanga kwa Yave yovo vava muntu kesobanga e mpila zingu kiandi yo tambulwila e ludi. (Tanga Luka 15:10.) Ambasi mpe bekuyivananga muna salu kia samuna e nsangu zambote za Kintinu. (Lus. 14:6) Kanele vo ke yau ko bekwendanga mokena yo wantu, befilanga ateleki kwa awana bazolele longoka oma ma Yave. Dialudi, ke tulendi vova ye sikididi kiawonso ko vo yau batunete kwa muntu kingandi. Kadi o Yave olenda sadila mpila zankaka nze, mwand’andi avelela muna sadisa wantu yovo fila selo yandi. (Mav. 16:6, 7) Kana una vo i wau, osadilanga e mbasi zandi muna kutusadisa vava tusamunanga e nsangu zambote. Muna kuma kiaki, vava tusamunanga e nsangu zambote tulenda kala ye vuvu vo ambasi bekutuyikamanga.—Tala e babu, “ E Sambu yau Yavaninua e Mvutu.” b
Mpangi ayakala yo nkaz’andi bafokwele sila umbangi vana fulu kia ndonga. Ekolo bevutukanga kuna nzo, mpangi ankento omwene nkento mosi una wakendalala. Mpangi ankento osungamene vo ambasi balenda kutufila mu solola awana bevavanga lusadisu lwa kimwanda. Ediadi dinkasakese mu kwenda mokena yo nkento kimana kamfiaulwisa (Tala e tini kia 8)
9. Aweyi tulenda tanginina o zola ambasi besonganga muna wantu?
9 Aweyi tulenda tanginina o zola ambasi besonganga muna wantu? Vava tuwanga luzayisu vo mpangi kingandi ovutukidi mu nkutakani, tulenda yangalala nze ambasi. Tufwete vanga mawonso muna songa kwa mpangi eto vo zola tukunzolanga ye tuyangalele wau kavutukidi sadila Yave. (Luka 15:4-7; 2 Kor. 2:6-8) Muna tanginina ambasi, tufwete vanganga mawonso tulenda muna kuyivana emvimba muna salu kia umbangi. (Kim. 11:6) Nze una ambasi bekutuyikamenanga vava tusamunanga e nsangu zambote, yeto mpe tufwete vavanga e mpila za yikamena mpangi zeto muna salu kia umbangi. Kasikil’owu, nga olenda vanga e programa kimana wavaika yo nteleki ampa? Nga olenda yikama o nteleki una vo nunu yovo mbevo kimana nuasalanga e salu kia umbangi?
10. Adieyi tulenda longoka muna nona kia mpangi Sara?
10 Adieyi tuvova kele vo mu kuma kia mpila zingu kieto ke tulendanga vanga mayingi ko muna salu kia Yave? Kana una vo i wau, tulenda vava e mpila zankaka kimana twasalanga entwadi ye ambasi muna salu kia samuna e nsangu zambote. Badika e nona kia mpangi Sara c kuna Índia. Vava kaviokesa tezo kia mvu 20 muna salu kia kimviti a nzila, Sara wabakama kimbevo ye kalendanga diaka katuka vana mfulu ko. Dialudi vo watoma kendalala, kansi muna lusadisu lwa ampangi muna nkutakani ye fu kiandi kia tanganga e Bibila lumbu yawonso, Sara malembe-malembe wavutukila e kiese kiandi. Wavava e mpila zankaka za sila umbangi. Wau vo kalendanga vuanda ko muna soneka nkanda, mu telefone kaka kasilanga umbangi. Vava kabokelanga wantu ana kateka wizana yau muna telefone, oyau banzayisanga wantu ankaka bakala yo luzolo lwa wá e nsangu zambote. Nkia nluta diatwasa? Muna ngonde zakete, Sara wayantika longoka e Bibila yo wantu 70. Dialudi, kasidi wo yindula ko vo olenda longoka e Bibila yo lutangu lwalu lwa wantu. Wavana alongoki ankaka kwa ampangi muna nkutakani. Ayingi muna alongoki andi owau bekwendanga muna tukutakanu. Ekwe kiese mu zaya vo ambasi besalanga entwadi ye mpangi zeto nze i mpangi Sara ona ovanganga mawonso kalenda muna samuna e nsangu zambote!
AMBASI BESONGANGA LUZINDALALU
11. Aweyi mbasi za kwikizi besongelanga mbandu ambote ya luzindalalu?
11 Mbasi za kwikizi i mbandu ambote muna songa luzindalalu. Bezizidilanga kondwa kwa unsongi yo bi muna mafunda ye mafunda ma mvu. Bamona Satana ye vangwa yankaka ya mianda ana basalanga yau entwadi vava batelamena Yave. (Tuku 3:1; 6:1, 2; Yuda 6) Bibila kikutuzayisanga mbasi mosi wa nkwa kwikizi ona watelamenua kwa nkuya mosi wa nkwa nkuma. (Dan. 10:13) Vana ntandu, muna lusansu lwawonso lwa wantu, ambasi bemonanga vo wantu akete kaka beyikamanga e nsambil’aludi. Kanele vo bemonanga mawonso mama, mbasi zazi za kwikizi bekwamanananga sadila Yave ye kiese yo vema kwawonso. Bazeye wo vo muna ntangw’andi, Nzambi ofokola vilwa wawonso.
12. Nki kilenda kutusadisa mu zindalala?
12 Aweyi tulenda tanginina luzindalalu lwa ambasi? Nze ambasi, tulenda mona kondwa kwa unsongi. Kansi nze yau, yeto mpe tuna ye ziku vo muna ntangw’andi, Nzambi ofokola o bi wawonso. Muna kuma kiaki, nze mbasi za kwikizi “ke tuyambula vanga diambu diambote ko.” (Ngal. 6:9) Nzambi osianga nsilu vo okutusadisa muna zindalala. (1 Kor. 10:13) Tulenda lomba kwa Yave o mwand’andi owu ukutusadisa mu yima luzindalalu ye kiese. (Ngal. 5:22; Kol. 1:11) Adieyi tuvova kele vo osilu kitantu? Bunda emvimba e vuvu muna Yave, kuzakami ko. Yave ntangwa zawonso okusadisa yo kuvana nkuma.—Ayib. 13:6.
AMBASI BESADISANGA KIMANA E NKUTAKANI YAKALA YAVELELA
13. Nkia salu kiamfunu besalanga ambasi mu lumbu yayi yambaninu? (Matai 13:47-49)
13 Mu lumbu yayi yambaninu, Yave ovananga salu kiamfunu kwa ambasi. (Tanga Matai 13:47-49.) Mafunda ye mafunda ma wantu mu nza yawonso, beyangalelanga e nsangu zambote. Akaka muna wantu awaya, bebakanga nzengo za kituka Akristu akieleka, kansi akaka ke benungunukanga ko. Ambasi bevewanga e kiyekwa kia “vambula wantu ambi vana vena ansongi.” Ediadi disongele vo bevewanga e kiyekwa kia tanina e nkutakani kimana yakala yavelela. Ediadi ke disongele ko vo konso muntu oyambula lungana yeto muna konso kuma ke vutuka diaka ko. Ke disongele mpe ko vo muna nkutakani ke mu bwa diaka mambu ko. Kansi, tulenda kala ye ziku vo ambasi besalanga ye fululu kiawonso kimana e nkutakani zeto zakala zavelela.
14-15. Aweyi tulenda tanginina ambasi muna tanina e nkutakani kimana yakala yavelela? (Tala mpe mafoto.)
14 Aweyi tulenda tanginina ambasi muna tanina e nkutakani kimana yakala yavelela? Tufwete vanganga mawonso muna tatidila e ngwizani eto yo Yave. Tuvanganga wo muna toma sola akundi ana bezolanga Yave yo venga konso diambu dilenda fwasa e ngwizani eto yo yandi. Avo tuvangidi mawonso mama, tutatidila e nkutakani kimana yakala yavelela. (Nku. 101:3) Tulenda mpe sadisa mpangi zeto kimana batatidila e kwikizi kiau muna Yave. Kasikil’owu, adieyi tuvanga kele vo tumwene vo mpangi sumu diampwena kavolele? O zola kweto muna muntu ndioyo kukutufila muna kunkasakesa vo kenda funguna e sumu diandi kwa akuluntu. Avo muntu ndioyo kavangidi wo ko, yeto tufwete zayisa e sumu diadi kwa akuluntu. Kadi tuzolele vo mpangi eto katambula lusadisu kimana kavutukila e ngwizani andi yo Yave mu nzaki.—Yak. 5:14, 15.
15 Diankenda kikilu vo akaka muna awana bevolanga masumu mampwena, bekatulwanga mu nkutakani. Vava ediadi divangamanga, ‘tuyambulanga kala entwadi’ ye wantu awaya. d (1 Kor. 5:9-13) E nkubika yayi isadisanga e nkutakani mu kala yavelela. Vana ntandu, vava tubakanga e nzengo za lembi kala entwadi ye awana bekatulwanga mu nkutakani, tukubasonganga e ngemba. Kadi, avo tulemvokele Yave muna lembi kalanga yau entwadi, dilenda kubasadisa mu vutuka kwa Yave. Avo bavangidi wo, tuyangalala kumosi yo Yave ye ambasi.—Luka 15:7.
Adieyi tufwete vanga avo tubakwidi vo mpangi eto ovolele sumu diampwena? (Tala e tini kia 14) e
16. Mu nkia mambu tulenda tanginina ambasi?
16 Tutoma vutulanga matondo wau vo Yave oyambulanga vo twalongoka mambu mayingi mu kuma kia ambasi yo sala yau entwadi. Muna kuma kiaki, yambula twakwamanana tanginina e fu yau yambote nze lulembamu, zola besonganga muna wantu, luzindalalu lwau ye ngolo bevanganga muna tanina e nkutakani kimana yakala yavelela. Avo tutanginini e mbasi za kwikizi, yeto mpe tulenda kota muna kanda dia asambidi a Yave yakwele mvu.
NKUNGA WA 123 Tulemvokela e Nkubik’a Nzambi
a Vena ye mafunda ye mafunda ma mbasi, kansi nwole kaka beyikilwanga muna nkumbu zau muna Bibila, i sia vo, Mikaele yo Ngambiele.—Dan. 12:1; Luka 1:19.
b Olenda solola nona yayingi mu kuma kia ambasi muna Nkanda wa Vavulwila wa Mbangi za Yave vana ntu a diambu “Mbasi.”
c Nkumbu zankaka zasobwa.
d Nze una wasasilu muna Nsangu za Selo Yambuta, 2024-Kunku kia 2, avo muntu wakatulwa mu nkutakani wizidi mu lukutakanu, o nteleki olenda sadila e ntona zandi zalongwa muna Bibila mu zaya kana vo okayisa muntu ndioyo mu nswalu yovo kumvana ngizʼambote.
e FOTO: Mpangi ankento okasakese nkundi andi kenda mokena ye akuluntu. Vioka yaka e lumbu, mpangi ankento obakwidi vo nkundi andi kavangidi wo ko, muna diadi oyandi wele dio zayisa kwa akuluntu.
