1. Adieyi Yesu kavovesa kwa alongoki andi mu kuma kia mbaninu? Nkia lulukisu kabavana?

 LUMBU yakete vitila lufwa lwa Yesu, alogoki andi 4 banyuvula vo: “Nkia sinsu kisonga e . . . mbaninu a tandu?” (Mat. 24:3) Alongoki awaya batokananga una badi zayila kana nkia ntangwa e Yerusaleme ye tempelo yadi fwaswa. Muna mvutu zandi, o Yesu kabavovesa kaka ko una wadi fwasilwa e Yerusaleme, kansi wavova mpe oma ma “mbaninu a tandu” eyi tuzingilanga. Mu kuma kia mbaninu, Yesu wavova vo: “Mu kuma kia lumbu kiakina yovo ola, ke vena muntu ko ozeye kio, kana nkutu ambasi kuna zulu ngatu Mwana, kansi Se kaka.” I bosi walukisa alongoki andi awonso vo: ‘Nukwamanana lungalala’ ye “nukwamanana yingila.” —Maku 13:32-37.

2. Ekuma diakadila dia mfunu vo awana bazingilanga muna Yerusaleme bakwamanana yingila?

² Diavava vo Akristu Ayuda muna tandu kiantete bakwamanana yingila kimana bavuluka. Yesu wazayisa alandi andi una badi zayila vo lufwasu lwa Yerusaleme lufinamene. Wavova vo: “Vava numona Yerusaleme izungilu kwa vu kia makesa, ozevo nuzaya wo vo lufwasu lwandi lufinamene.” Muna kolo kiokio diavava vo alandi a Yesu balemvokela luludiku lwa Yesu lwa ‘tinina muna miongo.’ (Luka 21:20, 21) Awana balemvokela luludiku lwalu bavuluka vava esi Roma bafwasa Yerusaleme.

3. Nkia mambu tuvovela mu longi diadi?

³ O unu tuzingilanga mu kolo kina vo e nza yayi ya Satana se ifwaswa emvimba. Dianu vo tufwete kwamanana  lungalala yo yingila. Mu longi diadi, tuvovela una tulenda kadila ye tezo vava tutalanga mambu mevangamanga mu nza yayi, una tulenda sila e sungididi kwa yeto kibeni ye una tulenda toma sadila e ntangwa isidi.

4. Ekuma tufwete kadilanga ye tima dia zaya una mambu mevangamanga omu nza melungisilanga ungunza wa Bibila?

⁴ Tuvuidi kuma kia sikila mu vava zaya una e mambu mevangamanga omu nza melungisilanga ungunza wa Bibila. Kasikil’owu, Yesu wayika mambu masikididi madi kutusadisa mu zaya vo e nza ya Satana ilweke kikilu ku mfoko. (Mat. 24:3-14) Petelo wa ntumwa watukasakesa vo twasia e sungididi muna mpila ilunganenanga o ungunza kimana o lukwikilu lweto lwakwamanana lwakumama. (2 Pet. 1:19-21) O nkand’a nsuka wa Bibila uyantikilanga mu mvovo emi: “Lusengomono lwa Yesu Kristu, luna o Nzambi kamvana kimana kasonga kwa ntaudi zandi o mambu mevangama ke kolo ko.” (Lus. 1:1) Muna kuma kiaki, tukalanga ye tima dia tala o mambu mevangamanga omu nza kadi mekutusadisanga mu zaya una mambu mama melungisilanga ungunza wa Bibila. Tuzolanga mpe mokenena e mambu mama ye akweto.

5. Nkia diambu tufwete venga ye nkia diambu tufwete vanga? (Tala mafoto.)

⁵ Kansi vava tumokenenanga oma ma ungunza wa Bibila, tufwete venga e fu kia banzikisa mambu. Ekuma? Kadi ke tuzolele vova diambu ko dilenda twasa e mpambani mu nkutakani. Kasikil’owu, tulenda wa ayadi a nza yayi bevovelanga una balenda singikila e ntantani mu nsi zankaka yo twasa luvuvamu ye ngemba. Vana fulu kia banzikisa mambu yo yindula vo e mvovo miami milungisanga ungunza una muna 1 Tesalonika 5:3, tufwete zayanga e mambu mampa mana e nkubik’a Yave kekutuzayisanga. Muna moko yeto vava tuvovelanga malongi mevaikiswanga muna nkubik’a Yave tusadisanga kimana e nkutakani yakala mu ungundi yo “yikana muna nyindu mosi.”—1 Kor. 1:10; 4:6.

6. Nkia diambu tulongokele muna 2 Petelo 3:11-13?

⁶ Tanga 2 Petelo 3:11-13. Petelo wa ntumwa watusadisa mu kala ye ngindu zasikila vava tulongokanga o ungunza wa Bibila. Okutulukisanga vo ‘twasutilanga e ngiz’a lumbu kia Yave.’ Ekuma? Ke mu kuma kia sia ko vo tuzolele zaya e ‘lumbu ye ola’ ina o Yave ketwasa e Armangedo, kansi tuzolele toma sadila e ntangwa isidi muna songa e “kadilu kiavauka ye mavangu ma vumi wa Nzambi.” (Mat. 24:36; Luka 12:40) Muna mvovo miankaka, tuzolele kala e nkal’avelela yo kala ye ziku vo e ngolo tuvanganga muna salu kia Yave zisonganga o zola kweto muna yandi. Muna lungisa mambu mama tufwete sia e sungididi kwa yeto kibeni.

7. Aweyi tusongelanga vo tusianga e sungididi kwa yeto kibeni? (Luka 21:34)

⁷ Yesu wavovesa alongoki andi vo ke basie kaka sungididi ko muna mambu mevangamanga o mu nza, kansi basia mpe e sungididi muna yau kibeni. E diambu diadi diatoma kieseswa muna lulukisu tutanganga muna Luka 21:34. (Tanga.) Tala dina Yesu kavova: ‘Nutoma sia e sungididi kwa yeno kibeni.’ O muntu osianga e sungididi kwa yandi kibeni, osianga e sungididi muna konso diambu dilenda fwasa e ngwizani andi yo Yave ye ovanganga mawonso muna venga e diambu diadi. Muna mpila yayi, okwamanananga  muna zola kwa Nzambi.—Nga. 22:3; Yuda 20, 21.

8. Nkia lulukisu Paulu wa ntumwa kavana kwa Akristu?

⁸ Paulu wa ntumwa wavovesa Akristu vo basia e sungididi kwa yau kibeni. Kasikil’owu, walukisa Akristu kuna Efeso vo: “Nutoma tala e mpila nukangalelanga, ke nukangadi nze mazowa ko, kansi nze akwa ngangu kaka.” (Efe. 5:15, 16) Ntangwa zawonso, Satana ovavanga fwasa e ngwizani eto yo Yave, muna kuma kiaki, e Bibila kikutukasakesanga vo ‘twavavanga zaya owu wina luzolo lwa Yave.’—Efe. 5:17.

9. Aweyi tulenda bakulwila luzolo lwa Yave?

⁹ E Bibila ke kiyikanga mambu mawonso ko malenda fwasa e ngwizani eto yo Yave. Nkumbu miayingi, divavanga vo yeto kibeni twabaka e nzengo muna mambu mana e Bibila ke kiyikanga nsiku wasikididi ko. Muna baka e nzengo zambote, tufwete zaya o “luzolo lwa Yave.” Tulenda wo vanga muna longokanga e Diambu dia Nzambi ntangwa zawonso yo badika dio. Ekolo tutoma bakulanga luzolo lwa Yave yo yima o “nyindu a Kristu,” tukangalela “nze akwa ngangu” kana nkutu vo ke vena yo nsiku wasikididi ko ulenda kutuzayisa dina tufwete vanga. (1 Kor. 2:14-16) Ezak’e ntangwa diasazu dikalanga mu bakula e vonza yankaka, kansi ezak’e ntangwa ke diasazu ko.

10. Nkia vonza tufwete venga?

¹⁰ E yankaka muna vonza tufwete venga, i fu kia sikamesa e nzola kwa muntu ankaka, viokesa e tezo muna malavu mankolwa ye madia, sadila mvovo milwekanga akaka ye mia nsoni, tala filme zisonganga mavangu mansoki, ma zumba ye mambu mankaka. (Nku. 101:3) O mbeni eto Nkadi ampemba, ntangwa zawonso ovavanga e lau muna fwasa e ngwizani eto yo Yave. (1 Pet. 5:8) Avo ke tuyikebele ko, Satana olenda sia muna yindu ye ntima mieto e mbongo ambi nze, fu kia zinu, kondwa kwa ziku, loko, lumengo, lulendo yo landa e kunda. (Ngal. 5:19-21) Kuna lubantiku, tulenda mona vo e fu yayi ke ikututwasila vonza ko. Kansi, avo ke tuvangidi diambu ko muna katula e fu yayi vana vau, ilenda mena e mianzi yo kwamanana kola nze nti ampondi yo kututwasila e mfwilu.—Yak. 1:14, 15.

11. Nkia vonza kiankaka tufwete venga? Ekuma?

¹¹ E vonza kiankaka tufwete venga i yikundi yambi. Badika e nona eki: yindula vo kuna salu kiaku, osalanga kumosi yo muntu una vo ke Mbangi a Yave ko. Osonganga e ngemba kwa nkwaku a salu kadi ozolele vo kabadikila e Mbangi za Yave mu mpila yambote. Ezak’e ntangwa nkutu, otondanga dia yandi kumosi muna ola ya vundu. Kuna kulanda, oyantika wo vanga nkumbu miayingi. Kansi, e moko ya nkwaku a salu iyantika kituka se yansoni. Kuna lubantiku kuyangalela moko yandi ko yo kunsima nkutu. Kansi kuna kulanda, okulukilwa e moko yandi yo lembi tokana diaka. I bosi, ngeye mpe oyantikidi yindulwila nze nkwaku a salu yo vanga e mambu mana yandi mpe kevanganga. Adieyi obenze, kolo kwa kilenda vioka muna kituka nze nkwaku a salu? Dialudi vo, tu akwa ngemba ye tuzitisanga wantu awonso, kansi tufwete sungamenanga vo awana tusolanga muna viokesa yau e ntangwa, balenda kutuvukumuna. (1 Kor. 15:33) Avo tusidi e sungidi kwa yeto kibeni nze una Yesu katulukisila, tuvenga yikundi ye awana ke bezingilanga e ngwizani ko ye nkanikinu mia Yave. (2 Kor. 6:15) Muna mpila yayi, tumona e vonza yo venga yo.

12. Adieyi alongoki a Yesu bavanga, ekolo bavingilanga e mbaninu a tandu kiakina?

¹² Alongoki a Yesu ke bakala miolo ko ekolo bavingilanga e mbaninu a tandu kiakina, i sia vo, lufwasu lwa mbanz’a Yerusaleme. Yesu wabavana e salu mu vanga. Wabakanikina vo basamuna e nsangu zambote “muna Yerusaleme, muna Yuda yawonso ye Samaria yakuna nsuk’a nza.” (Mav. 1:6-8) Ekwe salu kiampwena alandi a Yesu bavewa! Wau vo bayivana emvimba muna salu kiaki, basonga vo batoma sadila e ntangwa au.

13. Ekuma tufwete toma sadila e ntangwa eto? (Kolosai 4:5)

¹³ Tanga Kolosai 4:5. Muna sia e sungididi kwa yeto kibeni, tufwete kuyifimpanga una tusadilanga e ntangwa eto. O “mambu makinsalukisa” malenda bwila konso muntu mu yeto. (Kim. 9:11) E zingu kieto kilenda fokoka vana vau.

14-15. Aweyi tulenda toma sadila e ntangwa eto? (Ayibere 6:11, 12) (Tala e foto.)

¹⁴ Tulenda toma sadila e ntangwa eto muna vanga luzolo lwa Yave yo kumika e ngwizani eto yo yandi. (Yoa. 14:21) Tufwete kala ‘twasikila, kala ngingi yo wokesa kaka e salu kia Mfumu ntangwa zawonso.’ (1 Kor. 15:58) I bosi, vava e mbaninu ilwaka, kiakala mbaninu a nza yayi yambi yovo mfoko a zingu kieto, ke tukuyibanza ko wau twavanga mawonso  muna sadila Yave.—Mat. 24:13; Roma 14:8.

¹⁵ O unu, Yesu okwamanananga fila alongoki andi ekolo besamunanga e nsangu zambote za Kintinu kia Nzambi omu nza yawonso. Kieleka, Yesu olungisanga o nsilu andi. Muna lusadisu lwa nkubik’a Yave, o Yesu okutulonganga una tulenda sadila e salu kia umbangi ye okutuvananga e salanganu tuvuidi o mfunu muna samuna e nsangu zambote. (Mat. 28:18-20) Tuvanganga mana tulenda muna kala asadi ambote muna salu kia umbangi yo longa o wantu yo kwamanana lungalala ekolo tuvingilanga e ntangwa ina Yave ketwasa e mbaninu a nza yayi yambi. Muna sadilanga luludiku luna muna Ayibere 6:11, 12, tusimbinina e vuvu kieto “yakuna mbaninu.”—Tanga.

16. Adieyi i kani dieto?

¹⁶ Yave wasikidisa kala e lumbu ye ola ketwasa e mbaninu a nza yayi ya Satana. Vava e lumbu kiaki kilwaka, Yave olungisa e nsilu miandi miawonso kasonekesa muna Diambu diandi. Ekolo tuvingilanga e lumbu kiaki, ezak’e ntangwa, tulenda mona vo e mbaninu mu zingila yina. Kansi, e lumbu kia Yave ‘ke kisala manima ko!’ (Kab. 2:3) Ozevo, yambula twakala ye kani dia kwamanana “tadila Yave” yo songa vo ‘tuvingilanga o Nzambi a luvuluzu lweto kuna luzindalalu.’—Mika 7:7.