Paulu wa ntumwa wasonekena Akristu kuna Tesalonika vo: “Avo muntu kazolele lemvokela edi tuvovele mu nkanda wau ko, nunsia e dimbu.” (2 Tes. 3:14) Entete, twavovanga vo o nkanikinu wau kwa akuluntu wavewa. Avo vena yo muntu okwamanananga kulula nkanikinu mia Bibila, akuluntu bafwete fila e longi dia lulukisu mu nkutakani muna songa vo nengandi kafwete siwa e dimbu. I bosi, ateleki beyambula kala yandi entwadi.

Ozevo, nsobani zivangilu muna umbakuzi weto. Owau tubakwidi vo Paulu wazola songa vo konso Nkristu muna nkutakani olenda baka e nzengo za sia muntu e dimbu muna maka mambu. Muna kuma kiaki, ke dina mfunu ko kwa akuluntu mu fila e longi dia lulukisu mu nkutakani muna songa vo nengandi kafwete siwa e dimbu. Ekuma tusobele umbakuzi weto muna sono kia 2 Tesalonika 3:14? Badika e diambu dina kavovela Paulu vava kavana nkanikinu wau.

Paulu wamona vo akaka muna nkutakani ‘mu mpila yambi bakangalelanga.’ Muna nkingula yavita, wavana nkanikinu owu: “O muntu avo kazolele sala ko, kadie ko.” Kana una vo i wau, vakala ye akaka ke bazolanga sala ko muna kuyidikila, kanele vo bakala ye lendo kia sala. Bakala mpe ye fu kia yakama mambu mangani. Aweyi Akristu bafwana kadila yo wantu ana bakangalanga e nkangala yambi?—2 Tes. 3:6, 10-12.

Paulu wavova vo: “Nunsia e dimbu.” O mvovo wa Kingerekia wasekolwa vo “nunsia e dimbu” una ye nsasa vo zaya muntu yo toma kuyikeba kimana kalembi kutuvukumuna. Paulu kwa nkutakani yawonso kavana nkanikinu wau, ke kwa akuluntu kaka ko. (2 Tes. 1:1; 3:6) Konso Nkristu omwene nkwandi Nkristu okululanga nkanikinu mia Nzambi kuna lukanu, olenda baka e nzengo za ‘yambula kala yandi entwadi,’ kadi mu mpila yambi kekangalelanga.

Nga ediadi disongele vo tufwete kadilanga yandi nze muntu wavaikiswa mu nkutakani? Ve, kadi Paulu wavova diaka vo: “Nukwamanana kunludika nze mpangi.” Konso Nkristu olenda vuanda entwadi muna tukutakanu yovo vaika muna salu kia umbangi yo mpangi ona kasia e dimbu yo baka e nzengo za lembi kalanga yandi entwadi muna nkinzi yovo muna fulu ya nsaka. Ekuma? Paulu wavova vo: “Kimana kamona e nsoni.” O Nkristu okangalanga e nkangala yambi avo osilu e dimbu, olenda mona e nsoni mu kuma kia fu yandi yambi yo vanga e nsobani.—2 Tes. 3:14, 15.

Aweyi Akristu balenda sadila nkanikinu wau o unu? Entete, tufwete kalanga ye ziku vo e fu kesonganga o mpangi, ‘kiambi’ kikilu, i kiau kavovela Paulu. O ntumwa Paulu kavovela ko muntu ona obakidi e nzengo muna diambu tumwene muna ntona zeto vo diambi yovo muntu una ye zolele yaswaswana yo yeto, kansi ke kululanga nsiku mia Bibila ko. Kavovela ko mpe wantu ana bevanganga mambu malenda kutukendeleka. Kansi, o Paulu awana bebembolanga malongi ma Nzambi kuna lukanu kavovela.

O unu, avo tumwene mpangi okwamanananga bembola malongi ma Bibila, a konso muntu olenda baka e nzengo za lembi kalanga yandi entwadi muna nkinzi yovo muna fulu ya nsaka. Wau vo ediadi i diambu dina konso muntu kafwete bakila e nzengo, ke dina mfunu ko twazayisa dio kwa wantu akaka, nanga kwa esi nzo eto kaka. Tulenda kweto kalanga entwadi yo mpangi ndioyo muna salu kia umbangi ye muna tukutakanu. Avo oyambwidi e fu yambi, tulenda vutuka kalanga yandi entwadi muna konso fulu.