Likida nkenda ‘Kovantu navenye’
APA Jesus ga rongere varongwa vendi omu nava zuvhisa, age kwa va rondwere hena asi kapisi navenye ngava tambura mbudi zoUhompa. (Ruk. 10:3, 5, 6) Mosirugana sokuzuvhisa kuvhura tu ligwanekere novantu woukenya ndi vehandu. Yininke yangoso kuvhura kutudigopera kulikida nkenda kwava tuna kuzuvhisira.
Muntu gonkenda kukwata egano maudigu aga vana kuligwanekera nago wopeke ntani kwa hara kuvavatera. Nye nsene tu dira kulikida nkenda kovantu, ayo ngayi tu digopera kuzuvhisa nomupampi. Kulikida nkenda kwa fana ngwendi kuna kuhumina komundiro. Ayo ngayi tu vatera tu twikire kuzuvhisa nomupampi.—1 Tes. 5:19.
Ngapi natu twikira kulikida nkenda nampili yi tu karere udigu? Ngesi tatu ka konakona eyi natu lirongera ko kwaJehova naJesus ntani komupositoli Paurusa kuhamena omu va likidire nkenda.
HONENA NKENDA ZAJEHOVA
Jehova kwa lididimikira eswauro eli va retera edina lyendi nomvhura dononzi. Nye age simpe kutwikira “kuruganena uwa ava va ha pandura novadona.” (Ruk. 6:35) Nkenda yizo azi mu tumangeda a lididimikire. Jehova kwa hara asi “vantu navenye” ngava ka paruke. (1 Tim. 2:3, 4) Nampili ngomu ga nyenga udona, age kutara vantu navenye asi mulyo ntani kapi ga hara asi ngapa ka zonauke nampili gumwe.—2 Pet. 3:9.
Jehova ga diva asi Satana kwa zonagura nondunge dava va dira kupura. (2 Kol. 4:3, 4) Wovanzi kwava ronga marongo goyimpempa kutunda unona wawo, ano eyi kuvadigopera kutambura usili. Jehova ana hara kuvavatera. Ngapi tuna yi diva?
Tu tareni omu Jehova ga tere vantu womoNinivhe. Nampili ngomu va kere vantu wonyanya, Jehova kwa tanterere Jona asi: ‘Nsene ngame ko nye, omu nani dira kuretera nkenda Ninivhe, sitata sosinene. Unene po hena, aso kwa kara novantu wokupitakana 120 000 va hana nzo.’ (Jona 4:11) Jehova ga yi kwete egano asi Vaninivhe kapi va divire usili. Eyi yiyo nye ga tuminine Jona a ka va rondore.
Ngwendi Jehova, nose kutara vantu asi mulyo. Ose kuvhura tu mu honene pokuvatera vantu ava ava moneka ngwendi kapi nava tu purakena.
HONENA NKENDA ZAJESUS
Jesus nage kwa likidire nkenda kovantu ava va dilire kudiva usili. Bibeli kwa tanta asi: “Eyi ana mono mbunga, makura tazi mu gwire nkenda, morwa yeeyi va hepere va lifane nononzwi dokuzumbana da hana musita.” (Mat. 9:36) Jesus ga yi kwete egano asi vantu vena kwa kere moukaro wina morwa yeeyi vampitisili vawo ngava va rongo yimpempa nokuvatekura momudona. Nampili ngomu Jesus ga yi divire asi wovanzi kapi ngava tambura mbudi zendi morwa yilimbikiso yongandi, age simpe ga twikilire ‘kuvaronga yininke yoyinzi.’—Mar. 4:1-9.
Wa ha handuka nsene muntu kapi ana kutambura mbudi zetu
Apa maukaro aga runduruka meparu, vantu kuvhura kupurakena
Apa vantu ava dili kutambura mbudi zetu, kapisi tu demenene tupu konkareso zawo nye twa hepa kudiva nokonda deyi vana kunyokera. Vamwe nampo kapi va hara Bibeli ndi maukarelikarunga gamwe morwa nkareso zondona ezi ava mono kwava ava litumbura vene asi Vakriste. Vamwe nampo kwava kumbagera kuhamena epuliro lyetu. Ano vamwe kutjira asi vanekoro vawo ngava va rwanesa nsene va tambura usili.
Vamwe ava atu zuvhisire kuvhura va dire kutambura mbudi zetu morwa awo kwa pita moudigu ou wa va koresere unene. Mutumwa gedina Kim kwa tanta asi: “Sinzi sovantu ava va kara momukunda ogu atu zuvhisire, kwa kere moyita omu va zumbanesere yiweka yawo. Awo kapi va kara nehuguvaro lyokomeho. Awo kwa nyegenya ntani kapi va huguvara wopeke. Sinzi sawo kapi ava tambura mbudi zetu. Ezuva limwe, apa na ka va zuvhisilire tava ka toona nge.”
Yisinke nye ayi vatere Kim a twikire kulikida nkenda? Age kwa tanta asi: “Apa ava tekura nge momudona, ame kudiworoka etjangwa lya kara moYisewe 19:11 eli ali tanta asi: ‘Nsene o kotoka, to pangere nkareso zoge.’ Apa ani diworoka eyi va pita womomukunda ogu atu zuvhisire, ayo kuvatera nge ni va likide nkenda. Kapisi navenye ava dili kupurakena. Momukunda googo, ose twa kara mo simpe nomatengwiropo.”
Kuvhura tu li pure asi, ‘Ngano kapi na divire usili makura Nombangi daJehova di ya zuvhisire nge, yisinke nani rugana?’ Pasihonena, ngapi nsene ame kwa zuvha magano gepuko kuhamena Nombangi daJehova? Momaukaro gangoso nose kuvhura yi tu digopere kupurakena ntani ngatu hepa va tu likide nkenda. Yipo nye, twa hepa kudiworoka eyi ga uyungire Jesus asi, “nkenye eyi mwa harera vantu asi ava yi mu ninke, none omu yi va ninke,” ayo ngayi tu tumangeda tu likide nkenda nampili yi kare udigu.—Mat. 7:12.
HONENA NKENDA ZAPAURUSA
Mupositoli Paurusa kwa likidire nkenda nampili kovantu ava ngava mu rwanesa. Morwasinke? Morwa nage yiyo nga rugana nare. Age kwa tente asi: “Nampili ngomu ngani mu uyunga momudona, tani mu hepeke oku tani mu swaura. Nye Karunga ga fililire nge nkenda, morwa apa ngani yi rugana, ame simpe nokupura si, ame hena kapi na divire eyi ngani rugana asi yinke.” (1 Tim. 1:13) Age ga yi dimbwilire asi Jehova naJesus kwa mu likidire nkenda. Paurusa ga kwete egano vantu ava va here kumuhagekesa kuzuvhisa morwa nage yiyo nga rugana.
Poyiruwo yimwe mupositoli Paurusa nga gwana vantu mokuzuvhisa ava va pulire momarongo goyimpempa. Ngapi omu ga lizuvhire? MoYirugana 17:16 kutanta asi apa Paurusa ga kere moAtena, “mutjima gwendi tagu mu buruka pokumona mafano govakarunga woyimpempa gomanzi mositata.” Nye nampili ngoso age kwa ruganesere mpito ozo mokuvazuvhisira. (Yirug. 17:22, 23) Age nga rundurura nonkedi dendi dokuzuvhisa kuliza noukaro wovantu yipo ‘a kongwere po nampili vamwe tupu.’—1 Kol. 9:20-23.
Ose kuvhura tu honene Paurusa pokuzuvhisira vantu ava ava tu tekura momudona ndi ava va pura momarongo goyimpempa. (Jes. 52:7) Munazinyetu gomukadi gedina Dorothy kwa tanta asi: “Vantu wovanzi momukunda ogu atu zuvhisire kwava ronga asi Karunga nyanya ntani age kupangura. Ame kupandura vantu owo kweyi va pura mwaKarunga, ntani ame kuvatantera eyi azi uyunga ko Bibeli kuhamena yikara yaJehova ntani neyi ga tumbwidira komeho.”
“FUNDISENI UDONA KOUWA”
Ngomu tuna kuhedera pepi nouhura wouzuni twa hepa kuyindindira asi ‘udona wovantu ngau vhuka.’ (2 Tim. 3:1, 13) Nye twa ha yi pulisira yi tu ninkise tu dire kukara nonkenda ndi noruhafo. Jehova kuvhura kutupa nonkondo tu ‘fundise udona kouwa.’ (Rom. 12:21) Jessica muzuvhisi gokukarerera kwa tanta asi: “Ame kugwana vantu wokulinenepeka nava wokuswaura mbudi zetu. Eyi kuvhura kuhandukisa. Komeho ni zogere nomuntu ame kuhova tanko kukanderera kwaJehova yipo ni demenene koyikara yendi yoyiwa. Eyi kuvatera nge ni zuvhisire vantu mevango lyokuvapangura.”
Ose kutwikira kupapara ava gwa tumbukira mwenyo gwanarunye
Mwaza siruwo vamwe ku ya tambura mbudi zetu
Twa hepa hena kukorangeda vanavazinyetu ngomu tuna kuzuvhisa nawo. Jessica kwa tanta asi: “Nsene mukwetu ogu tuna kuzuvhisa nendi vana mu tekura momudona, ame kuhetekera ko mokudira kuyizogera nendi. Mevango lyokuyizogera oyo, ose kusimwitira eyi twa tompora mosirugana setu nampili ngomu vamwe va dilire kutambura mbudi zetu.”
Jehova ga diva maudigu aga atu ligwanekere nago mokuzuvhisa. Age kuhafa apa atu mu honene pokulikida nkenda wopeke. (Ruk. 6:36) Nye Jehova kapi nga twikira kulikida nkenda. Age ga diva siruwo esi nga reta uhura wouzuni ou. Ano posiruwo esi, twa hepa kutwikira kuzuvhisa. (2 Tim. 4:2) Ngano tu twikireni kuzuvhisa nomupampi nokulikida nkenda ‘kovantu navenye.’
