Karunga kwa sita marutu getu monkedi zokulikarera yipo ga liverure gene. Nsene tuna remana, “rutu rwetu kuninkisa sironda silikokere si kare asi sosinunu ndi sosinene.” (Bibiliyoteka zonobuke douhaku zaJohns Hopkins) Rutu kugenderera kurugana ko yuma nsene muntu ana remana mokukondera honde zi dire kupita unene nokuninkisa nonsipa di likokere usimbu.

GAZADARA KO: Mokumona asi Karunga kwa sita rutu rwetu monkedi zokulikarera ru liverure rwene, eyi kulikida asi kuvhura tu kare nehuguvaro kweyi ga tumbwidira asi ngatu verura kokukora kopamalizuvho. Muepisarome kwa tjenge asi: “Age kuverura ava va gwa nomutjima, ta dingi yironda yawo.” (Episarome 147:3) Nsene kuna kuhepa pamalizuvho morwa yininke eyi ya kuhorokera, ngapi omu no kara nehuguvaro asi Jehova nga dinga yironda yoge ngesi ntani nokomeho?

Karunga ga tumbwidira asi: “Wa ha tjira – ame noge na kara! Ame nyame Karunga goge – patupu yokukutjilisa! Ngani ku nkondopeka tani ku kwafa.” (Jesaya 41:10) Muntu ogu ga kara nehuguvaro asi Jehova nga mu vatera, age kukara nombili zomomutjima nokugwana nonkondo dokulididimikira maudigu. Mupositoli Paurusa kwa tumbwire mbili zomomutjima asi “mbili zaKarunga, ezi za pitakana unene nondunge nadinye.” Age kwa tente hena asi: “Ame kuvhura nayinye nononkondo dogu a pameke nge.”—Vafilipi 4:4-7, 9, 13.

Matjangwa kutuvatera tu kare nepuro momatumbwidiro gaJehova gokomeho. Pasihonena, Ehororo 21:4, 5 (va temwinina pepenuno lyokukwama ko) kututantera eyi nga ka rugana Karunga neyi natu mu huguvarera asi nga ka yi rugana:

• ‘Nga kokota vantu mahodi nagenye.’ Jehova nga gusa po ruhepo noyinka yetu nayinye, nampili yi moneke kwava wopeke asi kapi tayi vhuru kuhoroka.

• Hompa Munankondo nadinye ‘ogu ga hingira kosipundi souhompa,’ nga ruganesa nonkondo dendi mokukagusa po ruhepo ntani nokutupa eyi twa hepa.

• Jehova ga yi likida asi matumbwidiro gendi ‘gosili gokuvhura kuhuguvara.’ Eyi ya liza neyi ali tanta edina lyendi asi age kusikisa mo matumbwidiro gendi.

“‘Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.’ Ano ogu ga hingilire kosipundi souhompa, ta tanta asi: ‘Tara, nayinye tani yi ninki yi kare yoyipe.’ Age ta ta tentere nge asi: ‘Tjanga, yeeyi nonkango edi dosili dokuvhura kuhuguvara.’”—Ehororo 21:4, 5.

Unsitwe noBibeli kuhorora yikara yaGuhyetu gemeguru. Nampili ngomu unsitwe au likida asi kuvhura tu dive Karunga ngakaume gomunene, nye Bibeli za yi zeresa nawa-nawa asi: “Hedeni Karunga pepi, nage a mu hede pepi.” (Jakopo 4:8) Yirugana 17:27 kutanta asi: ‘Kapi ga kara ure nose natuvenye.’

Moomu ono kulitulira po siruwo sokudiva Karunga, yimo ngo ya yi dimburura asi ‘age kukupakera mbili.’ (1 Peturusa 5:7) Mauwa musinke ngo gwanena mo?

Tu konakoneni eyi ya horokerere Toru gomoYapani. Age kwa mu rerere ozina ava va kere Vakriste, konyima ga ya lipakerere mombunga zovakorokotji, Yakuza. Age kwa tanta asi: “Ame kwa yi pulire asi Karunga ga nyenga nge ntani na lizuvhire asi vantu ava ngava fu, unene po ava na here, kwa kere etengeko morwa ukorokotji wange.” Yihorokwa yoyidona eyi ngayi horauka momukunda, yiyo ya ninkisire Toru a ya kare “muntu gonyanya ga hana nkenda.” Age kwa tanta asi: “Ame kwa lizuvhire ngwendi ni fe konyima zapa na dipagere muntu ogu ga divikwa unene morwa kuhara name ni divikwe.”

Apa Toru namukadendi Hannah va lirongere Bibeli, Toru kwa tulire po marunduruko gomanene  meparu nomonkareso zendi. Hannah kwa tanta asi: “Ame kwa yi limonena omu mugara gwange ana kutura po marunduruko ogo.” Ngesi, Toru kuuyunga asi: “Pwa kara Karunga ogu a pakere mbili nkenye gumwe gwetu. Age kapi ga hara vantu va fe, ntani ga liwapaikira kugusira po ava ava litezurura kononzo dawo. Age kupurakena koyininke eyi atu dili kuvhura kutantera nkenye ogu ndi eyi a dili kukwata egano nkenye muntu. Ntaantani, Jehova nga ka guse po maudigu nagenye noruhepo ntani kukora. Nampili ngesi, age kutuvatera mononkedi edi atu dili kundindira. Age ga tu hara ntani kutuvatera apa atu dompo mutjima.”—Episarome 136:23.

Ngomu tuna resa sihorokwa saToru, kudiva asi Karunga ntaantani a ka guse po yimpwagwa nokukakokota vantu mahodi, kapi tupu ayi tu pe ehuguvaro lyokomeho nye hena kutuvatera tu kare neparu lyewa ngesi. Nampili mouzuni omu muna zura ruhepo, kuvhura tu gwanene mo uwa mepakero mbili lyaKarunga.