Edina lyaKarunga, Jehova. Alyo kutanta asi: “Age kuninka yi kare po.” Jehova age Karunga munankondo nadinye ntani yige ga sita yininke nayinye. Ga kara nononkondo dokurugana nkenye eyi ana hara.

MoRuhebeli edina lyaKarunga kwa li tjenge monondanda ne, YHWH ndi JHVH. Edina lyaKarunga kwa moneka momatjangwa goRuhebeli yikando konyara 7 000. Vantu kutumbura edina Jehova mononkedi dokulisiga-siga kuliza neraka lyawo.

▸ Egau. 1, para. 15

Bibeli kwa zi retesa po Karunga kapisi vagara vena va zi tjenge. Pasihonena, tu ninke asi mukurupe kapi ga diva kutjanga makura ta tantere munwendi a mu tjangere po mbilive. Magano ogo na tjanga ogo munona kapisi gendi nye gomukurupe. Kupitira mompepo zendi zokupongoka, Karunga kwa geve magano gendi kovatjangi woBibeli. Mpepo zaKarunga kwa va gendesere mononkedi dokulisiga-siga, pamwe kupitira momamoneko ndi nonzodi.

▸ Egau. 2, para. 5

Kuna kara marongo goBibeli aga aga tu vatere tu ture po matokoro gomawa. Pasihonena, mpango “nonzogera donondona, kuyipika nonkedi donongwa” kuturonga asi nsene tu kara novakaume wovawa ngava tu kundama momuwa ano wovadona momudona. (1 Vakolinte 15:33) Ntani mpango “nkenye eyi a kunu muntu, yiyo nga zangura yooyo” kuturonga asi ngatu ligwanekera noyitundwamo kuliza noyirugana yetu.—Vagarata 6:7.

▸ Egau. 2, para. 12

Mbudi zokutunda kwaKarunga. Azo kuvhura kugava mauzera kuhamena sitambo ndi erongo ndi nompangera ndi mpanguro zokutunda kwaKarunga. Kuvhura hena kukara mbudi zoyininke eyi ngayi ka horoka komeho. MoBibeli mwa kara mauporofete gomanzi aga ga sika mo.

▸ Egau. 2, para. 13

Jesus kwa ya sikisire mo mauporofete gomanzi kuhamena Mesiyasa. Tara kakende “Mauporofete kuhamena Mesiyasa.”

▸ Egau. 2, para. 17, nondanda dokonhi.

Jehova kwa sitire evhu li kare paradisa yipo va tunge po vantu ava va mu hara. Sitambo sendi kapi sa runduruka. Ntaantani Karunga nga ka guse po udona nokukapa vantu vendi mwenyo gwanarunye.

▸ Egau. 3, para. 1

Satana kuna kara muengeli ogu ga hovere kurwanesa Karunga. Age kumutumbura asi Satana, kutanta asi “Murwanesi” morwa kurwanesa Jehova. Kumutumbura hena asi Muzonaguli, kutanta asi “Muswauli,” morwa age kutanta yimpempa kuhamena Karunga ntani kupukisa vantu.

▸ Egau. 3, para. 4

Pomuhowo Jehova kwa sitire vaengeli komeho a site evhu. Awo kwa va sitire va tunge meguru. Awo kwa pitakana mamiliyona efere. (Ndaniyera 7:10) Nawo va kara nomadina noyikara yokulisiga-siga. Vaengeli wovalimburukwi kunyoka kuvatongamena vantu. Va kara noyitumbukirwa noyirugana yokulisiga-siga. Yirugana yimwe kwa hamena mo kukarera pepi nosipundi saJehova, kutwara nombudi, kupopera vakareli vaJehova pevhu nokuvapitisira, kusikisa mo mpanguro zendi ntani kukwatesa ko yirugana yokuzuvhisa. (Episarome 34:7; Ehororo 14:6; 22:8, 9) Komeho ngava ka lipakerera kumwe naJesus mokukarwa yita yaHarumagedoni.—Ehororo 16:14, 16; 19:14, 15.

▸ Egau. 3, para. 5; Egau. 10, para. 1

Nkenye malizuvho nomagazaro ntani yirugana eyi ya dira kuliza nompango zaJehova kuna kara nzo. Azo kuzonagura elikwatakano lyetu naKarunga. Age kwa tu pa noveta nonompango mokutuvatera tu dire kuzonena mowina. Apa Karunga ga sitire Adamu naEva awo kwa sikilire mo, nye apa va nyokere kulimburukwa Jehova awo kwa zonene makura kapi va sikilire mo hena. Awo kwa ya kurupire nokufa, nose kukurupa nokufa morwa twa pinga nzo kwaAdamu.

▸ Egau. 3, para. 7; Egau. 5, para. 3

Yita yaKarunga yokuzonagura po uzuni waSatana noudinikarunga.

▸ Egau. 3, para. 13; Egau. 8, para. 18

Epangero eli ga tulisa po Jehova meguru. Jesus Kristusa kuna kupangera moUhompa owo. Jehova nga ruganesa Uhompa owo mokugusa po udinikarunga naunye. Uhompa waKarunga ngau pangera evhu mudima.

▸ Egau. 3, para. 14

Karunga kwa sitire Jesus komeho zokusita yininke nayinye. Jehova kwa tumine Jesus pevhu mokuyafira vantu navenye. Konyima zapa va mu dipagere, Jehova ga mu vhumbwire. Jesus ngesi kuna kupangera meguru ngaHompa goUhompa waKarunga.

▸ Egau. 4, para. 2

Bibeli za pumbire siruwo esi ga ya monekere Mesiyasa. Aso kwa kere kehagero lyoyivike 69 esi sa varekere momvhura 455 komeho zokuwiza Jesus pevhu ano kwa ya hege momvhura 29.

Ngapi omu twa yi diva asi kwa hege momvhura 29? Yivike 69 kwa tamekere momvhura 455 komeho zokuwiza Jesus pevhu apa Nehemiya ga ka sikire moJerusarema nokutameka kutungurura sitata. (Ndaniyera 9:25, NW; Nehemiya 2:1, 5-8) Mosivike kwa kara mo mazuva 7. Yivike va tumbura mouporofete ou kapi ya tamba yivike yomazuva 7, nye kwa tamba yivike yonomvhura 7, kuliza nouporofete ou asi “mvhura zimwe mwankenye ezuva.” (Numeri 14:34; Hesekiyeli 4:6) Eyi kutanta asi nkenye sivike kufanekesa nomvhura 7, ano yivike 69 kufanekesa nomvhura 483 (69 x 7). Nsene tu varura nomvhura 483 kutundilira momvhura 455 komeho zokuwiza Jesus pevhu, tayi tu reta komvhura 29. Ezi yizo mvhura va kuhwire Jesus ntani yipo ga ya kere Mesiyasa!—Rukasa 3:1, 2, 21, 22.

 Uporofete woowo kwa pumba hena sivike simwe sonomvhura ntambali. Mosiruwo oso yimo va dipagere Mesiyasa momvhura 33, ano kutundilira momvhura 36, mbudi zongwa zoUhompa waKarunga kwa zi zuvhisira konomuhoko nadinye kapisi koVajuda kwelike.—Ndaniyera 9:24-27.

▸ Egau. 4, para. 7

Bibeli kuronga asi Jehova Karunga yige Musiti ntani age kwa sitire Jesus komeho zokusita yininke nayinye. (Vakorosi 1:15, 16) Jesus kapisi Karunga Munankondo nadinye. Age kapi ga lihetakanesere naKarunga. Jesus kwa tente asi: “Tate kwa pita nge.” (Johanesa 14:28; 1 Vakolinte 15:28) Nye maukarelikarunga gamwe kuronga asi Karunga mutatu-gumwe: Guhya noMuna ntani mpepo zokupongoka. Mwato moBibeli nkango “mutatu-gumwe.” Eli kuna kara erongo lyoyimpempa.

Mpepo zokupongoka kuna kara nonkondo daKarunga edi a ruganesa mokusikisa mo mpango zendi. Azo kapisi muntu. Pasihonena Vakriste wokuhova ‘kwa zulire mpepo zokupongoka,’ ntani Jehova kwa tente asi ‘ngani poomwena mpepo zange kovantu navenye.’—Yirugana 2:1-4, 17.

▸ Egau. 4, para. 12; Egau. 15, para. 17

Morwasinke Vakriste wousili ava dilire kuruganesa sikuruse moukareli wawo?

1. Sikuruse kwa si ruganesa moukarelikarunga woyimpempa nomvhura dononzi. Aso ngava si ruganesa vapagani mokukarera unsitwe nomonompo dawo deligwanekero panyama. Monomvhura 300 konyima zonomfa daJesus, Vakriste kapi ngava ruganesa sikuruse moukareli wawo. Konyima mupangeli goVaroma, Constantine, yige ga ninkisire sikuruse va si ruganese moUkriste. Aso kwa si rugene si koke vapagani koUkriste. Kwato elikwatakano lya kara po posikuruse naJesus Kristusa. Buke zimwe zoVakatolika kwa faturura asi: “Sikuruse kwa si ruganesere komeho zokuwiza Ukriste ntani monompo dava va dilire kukara Vakriste.”—New Catholic Encyclopedia

2. Jesus kapi ga fililire kosikuruse. Nkango zoRugereka ezi va toroka “sikuruse” kutanta asi “sitji” ndi “sipirangi.” Jesus  kwa fililire kositji sokuvyukilira. Buke zimwe kwa faturura asi: “Kwato eyi va tjanga moRugereka [Etestamende lyEpe] ayi tanta asi yitetwa yivali yoyipirangi.”—The Companion Bible

3. Jehova kapi ana hara tu ruganese mafano ndi yidiviso moukareli wetu.—Exodus 20:4, 5; 1 Vakolinte 10:14.

▸ Egau. 5, para. 12

Jesus kwa pangerere varongwa vendi va diworoke nomfa dendi. Awo kuyirugana nkenye mvhura mokwedi kwaNisani 14, mezuva lyokulifana neli ngava dana Vaisraeli Paska. Mboroto novhinyu eyi ayi fanekesa rutu nohonde zaJesus kuyipitisa kwankenye gumwe poMurarero. Ava ngava ka pangera kumwe naJesus meguru kulya komboroto nokunwa kovhinyu. Nye ava va kara nehuguvaro lyokukaparukira narunye pevhu awo kuyakara poMurarero nye kapi ava li komboroto ndi va nwe kovhinyu.

▸ Egau. 5, para. 21

Nkango “mwenyo” kutamba (1) vantu, (2) yikorama, ndi (3) eparu lyomuntu ndi lyosikorama. Tara koyihonena yimwe:

• Vantu. Genesis 2:7 kutanta asi apa Karunga ga sitire Adamu makura ta kara “munamwenyo.”

• Yikorama. Kombinga zoRuhanzo, Bibeli kuuyunga asi: “Yinamwenyo nayinye yepevhu tayi fu – yidira noyimuna noyikorama nayinye.”—Genesis 7:21.

• Eparu lyomuntu ndi lyosikorama. Jehova kwa tanterere Mosesa asi: “Ava va here mwenyo goge, navenye va fa po.”—Exodus 4:19.

   Nsene muntu ta rugana yininke ‘nomwenyo nagunye’ age kuyirugana neharo ntani paapa ga hulira.—Mateusa 22:37; Deuteronomium 6:5.

▸ Egau. 6, para. 5; Egau. 15, para. 17

MoRuhebeli noRugereka nkango “mpepo” kuvhura kutamba koyininke yokulisiga-siga. Azo kutamba koyininke eyi ava dili kumona vantu ngwendi mpepo ezi azi pepe ndi munku govantu ndi goyikorama. Nkango ezi kuvhura kutamba hena kovaengeli, ntani kompepo zokupongoka. Bibeli kapi azi rongo asi ruha rumwe romuntu kutwikira kuparuka konyima zonomfa.—Episarome 104:29; Mateusa 12:43; Rukasa 11:13.

▸ Egau. 6, para. 5; Egau. 15, para. 17

Nkango “mundiro gwanarunye” kwa tunda konkango zoRugereka Gehena. Gehena kwa kere muramba ogu gwa kere pepi naJerusarema oku ngava hwikire yihando. Kwato maumbangi ga likida asi mosiruwo saJesus vantu noyikorama ngava yi hwike ayo yizuni momuramba ogu. Yipo nye Gehena kapi azi fanekesa evango eli ava hwikire nokuhepeka vantu ava va fa. Apa ga uyungire Jesus kuhamena kuzugumina moGehena ndi momundiro gwanarunye, age kwa tembe kezonauko lyanarunye.—Mateusa 5:22; 10:28.

▸ Egau. 7, para. 20

Alyo ekanderero eli ga geve Jesus apa ga rongere varongwa vendi omu nava kanderera. Kulitumbura hena asi Guhyetu gemeguru. Jesus kwa tu rongere tu kanderere asi:

•  “Edina lyoge ava li pongore”

  Ose kukanderera kwaJehova a zerese edina lyendi koyipempa nayinye yipo nkenye gumwe meguru nepevhu nga fumadeke edina lyendi.

• “Uhompa woge au wize”

  Ose kukanderera kepangero lyaKarunga li ya zonagure po uzuni ou woudona waSatana nokuyapangera evhu nokureta paradisa.

• ‘Mpango zoge ava zi sikise mo pevhu’

  Ose kukanderera sitambo saKarunga kevhu si sike mo, yipo vantu wovalimburukwi wokusikilira mo ngava tunge moParadisa narunye, moomu ga yi harerere Jehova apa ga sitire vantu.

▸ Egau. 8, para. 2

Jehova kwa geve sizoweseso mokuzowora vantu kononzo ntani konomfa. Sizoweseso kwa kere mfuto ezi za hepere po mokutengwida eparu lyokusikilira mo eli ga zumbanesere Adamu, ntani mokutengwidira po elikwatakano lyovantu naJehova. Karunga kwa tumine Jesus pevhu yipo a ya fire vananzo navenye. Vantu navenye va kara nompito zokukaparuka narunye nokukasikilira mo morwa Jesus ga tu fira.

▸ Egau. 8, para. 21; Egau 9, para. 13

Uporofete waNdaniyera egaununo 4 kuturonga asi Karunga kwa tulire po Uhompa wendi mo-1914.

Uporofete: Jehova kwa geve nzodi zouporofete kwahompa Nebukadenesara kuhamena sitji sosinene. Age kwa rotere asi sitji kwa si tetere nokusimanga nomalyenge gosivera songoporo yipo sisindi si dire kukura “nomvhura ntano nambali.” Konyima zoyo sitji tasi kuru hena.—Ndaniyera 4:1, 10-16.

 Eyi au tanta uporofete: Sitji kufanekesa upangeli waKarunga. Nomvhura dononzi Jehova kwa ruganesere vahompa womoJerusarema mokupangera muhoko goVaisraeli. (1 Histoli 29:23) Nye vahompa owo kapi va limburukwire makura upangeli wawo tau haga po. Jerusarema kwa zi zonagwire po mo-607 komeho zokuwiza Jesus pevhu, yipo da ya varekere “nomvhura ntano-nambali.” Edi kapisi nomvhura dene-dene, nye douporofete. (2 Vahompa 25:1, 8-10; Hesekiyeli 21:25-27) Apa ga tente Jesus asi: “Jerusarema ngava zi lyatagura vapagani dogoro noku ngasi sika mo siruwo sawo,” age kwa uyungire kuhamena siruwo ‘sonomvhura ntano-nambali.’ (Rukasa 21:24) Yipo nye “nomvhura ntano-nambali” kapi da hege apa ga kere Jesus pevhu. Jehova kwa tumbwidilire asi nga tura po hompa apa ngadi pita “nomvhura ntano-nambali.” Epangero lyaHompa ogu gomupe, Jesus, ngali ka retera vantu vaKarunga matungiko pevhu nalinye.—Rukasa 1:30-33.

“Nomvhura ntano-nambali”: Ado kwa gusire nomvhura 2 520. Nsene tu varura nomvhura 2 520 kutundilira mo-607 komeho zokuwiza Jesus pevhu, tadi tu reta ko-1914. Momvhura ozo yipo Jehova ga tulire Jesus a kare Hompa goUhompa waKarunga meguru.

Ngapi twa gwana nomvhura 2 520? Bibeli kutanta asi nomvhura ntatu noharufa kusika pomazuva 1 260. (Ehororo 12:6, 14) Yipo nye “nomvhura ntano-nambali” kusika pomazuva 2 520. Mokuliza nouporofete asi “mvhura zimwe mwankenye ezuva,” mazuva 2 520 kufanekesa nomvhura 2 520.—Numeri 14:34; Hesekiyeli 4:6.

▸ Egau. 8, para.  23

Bibeli kwa tumbura muengeli gumwe tupu gomunene, edina lyendi Mikayera.—Ndaniyera 12:1; Juda 9.

Mikayera yige Mupitisili govaengeli vaKarunga wovalimburukwi. Ehororo 12:7 kutanta asi: ‘Mikayera novaengeli vendi tava rwisa emukongoro novaengeli valyo.’ Buke zEhororo kutanta asi Jesus yige Mupitisili govakwayita vemeguru, yipo nye Mikayera kuna kara edina limwe lyaJesus.—Ehororo 19:14-16.

▸ Egau. 9, para. 4

Kwa tamba kosiruwo apa ngayi horoka yihorokwa yoyinene pevhu komeho tupu Uhompa waKarunga ngau ya zonagure po uzuni waSatana. Nonkango ‘uhura wouzuni’ ntani ‘ewizo ndi ekaropo lyaMunwaMuntu’ nado kwa tamba komazuva gopouhura. (Mateusa 24:3, 27, 37) ‘Mazuva gopouhura’ kwa tamekere apa Uhompa waKarunga wa varekere kupangera meguru mo-1914, ntani ngaga ka haga apa ngava ka zonagura po uzuni waSatana poHarumagedoni.—2 Timoteusa 3:1; 2 Peturusa 3:3.

▸ Egau. 9, para. 5

Karunga nga tengwida keparu ava va fa. MoBibeli kwa tumbura mo mavhumbuko ntane. Eliya naElisa naPeturusa naPaurusa kwa vhumbwire vantu koufe mononkondo daKarunga. Jehova kwa tumbwidira kukavhumbura “vantu navenye, va kare vawa ndi vadona” pevhu. (Yirugana 24:15) Bibeli kwa tumbura hena evhumbuko lyemeguru. Alyo  kuna kara lyava ga horowora ndi ga gwaveka Karunga mokukaparukira meguru naJesus.—Johanesa 5:28, 29; 11:25; Vafilipi 3:11; Ehororo 20:5, 6.

▸ Egau. 9, para. 13

Umpure kuna kara kulikwatakana nonompepo donondona kuvyukilira ndi kupitira mosimbanda. Nompepo donondona kuninkisa vantu va pure asi vafe kulisintunuka vadimu ndi yindumba-ndumba. Nompepo donondona kupukisa hena vantu va dire kulimburukwa Karunga. Unganga nourodi nomafeno nayo kwa likwatakana nonompepo donondona. Yininke oyo pamwe kuyitura monomuvi nomoyifo nomonobuke nomonomusika, ano vantu wovanzi kuyihafera. Sinzi sonompo ava rugana komatamu nado da likwatakana nonompepo donondona. Vamwe kuruganesa epangwe apa ava heteke kuruganena kumwe nonompepo donondona.—Vagarata 5:20; Ehororo 21:8.

▸ Egau. 10 para 10; Egau. 16 para 4

Jehova Karunga Munankondo nadinye ntani yige ga sita uzuni. (Ehororo 15:3) Yininke nayinye yendi ntani ga kara nononkondo dokupangera unsitwe naunye. (Episarome 24:1; Jesaya 40:21-23; Ehororo 4:11) Jehova ga tura noveta koyininke nayinye eyi ga sita. Age ga kara hena nononkondo dokuninka vamwe va kare vapangeli. Ose kukwatesa ko upangeli waKarunga pokumuhara nokumulimburukwa.—1 Histoli 29:11.

▸ Egau. 11, para. 10

Kudipaga mowina mukeke ana kara mezimo. Apa tupu mukadi a kwateke ezimo, yipo ali vareke eparu lyomukeke. Mukeke ana kara mezimo nage muntu.

▸ Egau. 13, para. 5

Kuna kara ngendeseso omu ava tura muntu honde zomuntu gwapeke ndi ezi va pungura. Ndi kumutura ruha rumwe romaruha gane gohonde. Maruha gane gohonde kuna kara mema gomohonde noyininke yoyizera noyininke yoyigeha ntani yokukankesa honde.

▸ Egau. 13, para. 13

Nkango ezi va ruganesa moBibeli “kupisura” kapi tupu za tamba kokutengeka. Apa ava tu pukurura nokuturonga ntani kutuvyukisa ngoso kuna kutupisura. Jehova kapi a pisura nonyanya ndi momudona. (Yisewe 4:1, 2) Jehova kwa tura po sihonena sosiwa kovakurona. Age kugava mapukururo gomawa aga na vhura kuhafera muntu. (Yisewe 12:1) Jehova kwa hara vantu vendi nokuvadeura. Age kuvapa mapukururo va wapukurure magano gepuko ntani va gazare nokurugana eyi ga hara. Nsene vakurona tava pisura vana vawo va hepa kuvavatera va kwate egano konda zeyi vana kuvapiswira. Ntani kwa kwatera mo hena kuronga vana vawo va hare Jehova noNonkango dendi Bibeli ntani va kwate egano nompango damo.

▸ Egau. 14, para. 13

Kuna kara yisitwa yoyidona yopampepo eyi ya kara nononkondo dononene. Nompepo donondona kuna kara vaengeli wovadona. Awo kwa ya kere vadona apa va dilire kulimburukwa Karunga nokukara nonkore dendi. (Genesis 6:2; Juda 6) Awo kwa lipakerere naSatana mokurwanesa Jehova.—Deuteronomium 32:17; Rukasa 8:30; Yirugana 16:16; Jakopo 2:19.

▸ Egau. 16, para. 4