Vapanguli 10:1-18
10 Konyima zaAbimereki, Tora munaPuva mutekurwa Dodo gomorudi rwaIsasikali, kwa mu horowere a popere Vaisraeli. Age kwa tungire moSamili momukunda gonondundu gwaEfurayimi.
2 Age kwa pangerere moIsraeli nomvhura 23, makura ta dogoroka, tava mu horeke moSamili.
3 Konyima zaTora, Jaire goMugiliyata tava mu horowora a kare mupanguli, makura ta pangere moIsraeli nomvhura 22.
4 Age kwa kere novana wovagara 30. Vana vendi navenye kwa kere nosindongi ntani nositata. Yitata oyo 30 kuyitumbura asi Havoti-jaire dogoro naina. Yitata oyo kwa kara momukunda gwaGiliyata.
5 Konyima, Jaire ta dogoroka makura tava mu vhumbike moKamoni.
6 Vaisraeli kwa rugene hena yininke yoyidona kosipara saJehova. Tava tameke kukarera mafano gaBara nomafano gaAsitarete, yikarunga yaAramu,* yikarunga yaSidoni, yikarunga yaMowaba, yikarunga yoVaamoni ntani yikarunga yoVafilisiti. Awo kwa sigire Jehova ntani kapi ngava mu karerere.
7 Makura Jehova ta handukire unene Vaisraeli, tava gava momawoko goVafilisiti ntani goVaamoni.
8 Kutunda mvhura ozo, awo kwa hepekere nomvhura 18 Vaisraeli ava va kere mesinya mwina lyomukuro gwaJorodana moGiliyata, momukunda goVaamoli.
9 Vaamoni nawo ngava rutu mukuro gwaJorodana va ka rwise womorudi rwaJuda, rwaMbenyameni ntani noru rwaEfurayimi. Vaisraeli kwa hepere unene.
10 Makura Vaisraeli tava likwambere kwaJehova a va vatere, tava tanta asi: “Ose twa zona koge, yeeyi ose kwa kusiga ove Karunga gwetu tu ka karere mafano gaBara.”
11 Nye Jehova ta tantere Vaisraeli asi: “Nani ame kapi na mu poperere koVaegipite, koVaamoli, koVaamoni, koVafilisiti,
12 koVasidoni, koVaamareki ntani koVamidiyani ava va mu hepekere ndi? Apa mwa likwamberere nge, ame kwa mu poperere momawoko gawo.
13 Nye one kwa sigire nge mu ka karere yikarunga yapeke. Eyi yiyo ngani dilira kumupopera hena.
14 Zendeni koyikarunga yeni eyi mwa tokora kukarera, mu ka yi pure yi mu vatere. Mokumona asi one kuna kuligwanekera noudigu, yi ninkeni yi mu popere.”
15 Nye Vaisraeli tava tantere Jehova asi: “Ose twa zona. Tu rugana nkenye eyi ono kumona asi yiwa, nye tu popera naina.”
16 Makura tava gusa mo yikarunga yonomuhoko dapeke mokatji kawo, tava karere Jehova dogoro ta yi mu ninkisa a va fire nkenda.
17 Makura Vaamoni tava pongo va ze koyita. Awo kwa dikire notende dawo moGiliyata. Vaisraeli tava pongo kumwe, tava dike notende dawo moMisipa.
18 Vantu novapangeli womoGiliyata tava litantere asi: “Yilye ogu natu pitisira tu ka rwise Vaamoni? Age yige nga pangera vantu navenye ava va tunga moGiliyata.”
Nonkango dokonhi
^ Ndi “Asiliya.”
