Buke zaMarukusa 8:1-38
8 Momazuva ogo, pwa kere hena mbunga zonene ntani kapi va kere nonondya dokulya. Makura ta zigida varongwa, ta va tantere asi:
2 “Vantu ava ame kuna kuvafira nkenda morwa mazuva gatatu vana kara pwange awo va hana kulya.
3 Nsene nani va ninka va ze ngorooro nonzara zawo, kuvhura va fire sikatji morwa vamwe ure va tunda.”
4 Nye varongwa vendi tava mu limburura asi: “Kupi nadi tunda nondya dokugwanena po edi nadi vhura kukutika vantu navenye ava?”
5 Age ta va pura asi: “Nomboroto dingapi muna kara nado?” Awo tava mu limburura asi: “Ntambali.”
6 Age ta tantere mbunga zi hingire pevhu. Ta gusa nomboroto odo ntambali, ta pandura Guhwe, ta di bamagura nokudigava kovarongwa vendi va di gavere kovantu.
7 Awo kwa kere hena nonomfi dononsesu, ta pandura Guhwe nokutantera varongwa asi nado va di gavere.
8 Awo kwa lire tava kuta, tava pongaike yikumba yoyinene ntambali yonondya edi da hupire po.
9 Ava va lire kwa kere vagara wokusika koyiha 4 000. Makura age ta va rekere va ze.
10 Kutunda opo, ta rondo mowato kumwe novarongwa vendi va ze komukunda gwaDalimanuta.
11 Vafalisayi makura tava wiza kwendi, tava ya mu patanesa pokuyamupura sidiviso seyi yekeguru, va mu heteke.
12 Makura ta hesere nononkondo nokutanta asi: “Morwasinke vantu ava vana harere sidiviso? Yosili nina kutanta asi kwato sidiviso esi ngava va pa.”
13 Makura ta va sigi, ta ka ronda hena mowato a rute mesinya mwina.
14 Nye awo kwa divarere kusimba nomboroto, zimwe tupu va kere nazo mowato.
15 Ta va rondora asi: “Takameseni kuhamena yihaheso yoVafalisayi neyi yaHerodesa.”
16 Makura tava tameke kulipatana kweyi va dilire kusimba nomboroto.
17 Apa ga yi dimbwilire, ta va pura asi: “Yisinke muna kulipatanena kweyi muna dili kusimba nomboroto? Nani simpe kapi muna yi kwata egano? Nomutjima deni simpe kapi dina yi pura ndi?
18 ‘One kapi muna kumona nampili ngomu mwa kara nomeho, ndi mu zuvhe nampili ngomu mwa kara nomatwi?’ Kapi muna kudiworoka
19 apa na bamagwire nomboroto ntano ni di pe vagara 5 000, yikumba yingapi nani ya zulire konondya edi da hupire po?” Tava mu limburura asi: “Murongo nambali.”
20 “Apa na bamagwire nomboroto ntambali ni di pe vagara 4 000, yikumba yingapi yoyinene ya zulire koruhupwa oru mwa pongaikire?” Awo tava mu limburura asi: “Ntambali.”
21 Makura ta va tantere asi: “Simpe kapi muna yi kwata egano?”
22 Kutunda opo, tava zi koBetesaida. Vantu tava mu retere mugara gomutwiku, makura tava mu likwambere asi a mu gume.
23 Makura ta kwata mugara ogo gomutwiku kokuwoko, ta mu twara ponze zomukunda. Konyima zokumufizira pomeho, ta mu kambeke mawoko gendi, ta mu pura asi: “To mono yuma ndi?”
24 Makura ta kankuka nokutanta asi: “Ame kuna kumona vantu, nye awo kuna kumoneka ngwendi yitji yina kugenda.”
25 Age ta kwata hena pomeho gomugara ogo, mugara makura ta mono nawa. Age kwa pahukire makura ta mono nayinye nawa-nawa.
26 Ta mu ninki a ze kembo nokumutantera asi: “Wa ha hwilira momukunda ogu.”
27 Jesus novarongwa vendi makura tava zi monomukunda daKesareya Filipi, ngomu va gendere, ta pura varongwa vendi asi: “Ngapi omu ava gazarere nge vantu?”
28 Awo tava mu limburura asi: “Asi nyove Johanesa Mukuhwi, nye vamwe asi Eliya ano vamwe asi gumwe govaporofete.”
29 Makura ta va pura asi: “One omu omu gazarere nge asi nyame yilye?” Peturusa ta mu limburura asi: “Nyove Kristusa.”
30 Makura ta va pamperekeda va dire kutantera nkenye ogu kumuhamena.
31 Ta tameke kuvaronga hena asi MunwaMuntu nga pita momahepeko gomanzi ntani masimbi novapristeli wovanene novalirongi womatjangwa ngava mu nyoka nokumudipaga, ano konyima zomazuva gatatu, ngava mu pindura koufe.
32 Age kwa va tanterere nonkango odo moyitarameho. Nye Peturusa ta mu twara kompengi, a ka mu kave.
33 Age ta piruka nokutara varongwa vendi, makura ta tugumukire Peturusa asi: “Hageka, Satana! Yeeyi ove kapi wa kara nomagazaro gaKarunga nye gosintu wa kara nago.”
34 Makura ta zigida mbunga novarongwa vendi, ta va tantere asi: “Nkenye ogu ga hara kukwama nge, ga ha litura mwene muhowo, nye ga hepa kulikambeka sitji* sendi, a twikire kukwama nge.
35 Yeeyi ogu ga hara kuparura mwenyo* gwendi, nga gu zumbanesa, ano ogu a zumbanesa mwenyo* gwendi morwa kukara murongwa gwange ntani morwa mbudi zongwa, yige nga gu gwana.
36 Yisinke ayi kwafa muntu yokuweka uzuni mudima, nye mwenyo* gwendi a gu zumbanese?
37 Ndi yisinke na vhura kugava muntu, a zowese ko mwenyo* gwendi?
38 Yeeyi nkenye ogu a lifu nge nomuga nononkango dange mouzuni ou wovantu wokudira kulimburukwa nomokatji kovananzo, MunwaMuntu nage nga ka mu lifa nomuga apa nga wiza mouyerere woGuhwe kumwe novaengeli wokupongoka.”
