Buke zaMarukusa 6:1-56
6 Age makura ta tundu po a ze mositata esi ga kulira, varongwa vendi tava mu kwama.
2 Apa lya kere Esabata, age kwa rongere vantu mosinagoge, ano wovanzi ava va mu purakenene kwa tetukire makura tava lipura asi: “Kupi ga gwana ogu mugara yininke eyi? Ntani morwasinke va mu pera unongo ou, nononkondo dokurugana yitetu?
3 Ogu nani kapisi muhongi goyikungu, munwaMariya, age hena mukurwaJakopo naJosefa naJudasa ntani Simoni? Vampanza vendi nani kapisi vaava twa kara nawo?” Makura kapi va mu purakenene hena.
4 Nye Jesus ta va tantere asi: “Muporofete kapi a fumanene mositata esi ga kulira nemekoro lyendi ntani nemembo lyendi.”
5 Eyi kwa mu ninkisire a dire kuruganena mo yitetu yoyinzi. Age kwa verwire tupu vaveli wovasesu pokuvakambeka mawoko.
6 Age ya mu tetwire unene kweyi va dilire kukara nepuro. Kutunda opo, ta zi monomukunda dopopepi a ka ronge vantu.
7 Age makura ta zigida varongwa vendi ronambali, ta va tumu vavali-vavali, ta va pe nonkondo dokutjida mo nompepo donondona.
8 Ta va pangere hena asi morugendo rwawo va simbe tupu mpango, nye va ha simba mboroto nondjato zonondya ndi yimaliwa* motundjato twawo
9 ntani ta va tantere va ze tupu noyicamakaku ntani yikoverero eyi va dwere.*
10 Ta va tantere hena asi: “Nkenye omu membo ngomu za, ka kareni moomo dogoro noku ngomu ka tunda mo.
11 Ano nkenye oku ngava ka nyoka kumutambura ndi kumupurakena, tomu ka tunda ko oku kuna kulikukumuna mbundu konompadi deni, yipo yi kare umbangi kwawo.”
12 Kutunda opo, makura tava zi va ka zuvhise asi vantu va litezurure,
13 tava tjida mo nompepo donondona dononzi noku kwita vantu wovanzi magadi va va verure.
14 Hompa Herodesa ga yi zuvhire eyi, morwa Jesus kwa divikwire ntani vantu kwa tente asi: “Johanesa Mukuhwi vana mu pindura koufe, eyi yiyo ana kuruganena yitetu.”
15 Nye vamwe kwa tente asi: “Yige Eliya.” Ano vamwe asi: “Muporofete ngwendi vaporofete vanare.”
16 Nye apa Herodesa ga yi zuvhire ta tanta asi: “Johanesa ogu na ninka va mu tete mutwe, vana mu pindura koufe.”
17 Yeeyi Herodesa kwa tulisire Johanesa modorongo morwa Herodiyasa, ogu ga kere nare mukadamukurwendi Filipusa.
18 Johanesa nga tantere nkenye apa Herodesa asi: “Kapi ya liza noveta asi o kware mukadamukuroge.”
19 Herodiyasa kwa kere nonkoko naJohanesa ntani kwa here kumudipaga nye ya mu limbire.
20 Herodesa kwa tjilire Johanesa morwa ga divire asi age mugara gomuhungami ntani kwa pongoka, makura nga mu popere. Apa nga mu tantere nonkango odo, kapi ga divire eyi na rugana, nye simpe nga mu purakene.
21 Nye ezuva limwe, apa Herodesa ga ruganenene sipito masimbi novapitisili wovakwayita ntani novanekuto womoGalireya mezuva lyehampuruko lyendi, ga gwene mpito zokurugana eyi ga here.
22 MunwaHerodiyasa gomukadona kwa dene monkedi ezi za hafesere Herodesa nava ga lire nawo.* Hompa makura ta tantere mukadona asi: “Pura nge nkenye eyi ono hara, ni yi ku pe.”
23 Ta gana asi: “Yosili, nkenye eyi no hundira nge, tani yi ku pe, nampili ruha rouhompa wange.”
24 Mukadona ta pwaga, ta ka pura ozina asi: “Yisinke nani ka hundira?” Ozina tava mu tantere asi: “Mutwe gwaJohanesa Mukuhwi.”
25 Poopo ngoso, ta duka a ze kwahompa, ta ka hundira asi: “Nina hara mu pe nge ngesi mutwe gwaJohanesa Mukuhwi porupasa.”
26 Nampili ngomu ya mu guvisire eyi, simpe ga yi sikisire mo morwa ga gene ntani vagenda vendi* va yi zuvhire.
27 Poopo ngoso, hompa ta tumu mukungi gwendi a ka rete mutwe gwaJohanesa. Makura ta zi modorongo a ka mu tete mutwe,
28 ta ka gu simbira porupasa. Ta gu gava komukadona, ano mukadona ta ka gu gava kozina.
29 Apa varongwa vaJohanesa va yi zuvhire, tava wiza nokuyagusa simpu sendi va ka si horeke montoko.
30 Vapositoli apa va ka tengwire, kwa pongere va kundurukide Jesus makura tava mu tantere nayinye eyi va ka rugene ntani neyi va ka rongere.
31 Age ta va tantere asi: “Wizeni oku nyonelike kevega lya hana vantu, mu ka pwizumuke po kanunu.” Yeeyi vantu vanzi va wizire kwendi oku tava tundu po, kapi va kere nosiruwo nampili sokulya seesi.
32 Tava rondo mowato va ze kevega lya hana vantu.
33 Nye vantu tava va mono omu vana ka za ntani wovanzi va divire oku vana vyuka, vantu womoyitata nayinye kwa dukire porupadi tava ka hova kukasika.
34 Apa ga humburukire mowato, ta mono mbunga zonene zovantu, ta va fire nkenda morwa awo kwa kere ngwendi nonzwi da hana musita. Makura ta tameke kuvaronga yininke yoyinzi.
35 Apa lya gombokere, varongwa vendi tava mu wizire, tava mu tantere asi: “Evega eli amesi kwato ogu ga tunga mo, alyo hena nare lina toko.
36 Va ninka va ze konomukunda dopopepi va ka lirandere nondya.”
37 Age ta va limburura asi: “Nyone nomu va pa nondya.” Awo tava mu limburura asi: “Madenali* 200 kuvhura tu ka rande mo mboroto ezi nava ya gwaneka vantu navenye ava ndi?”
38 Age ta va pura asi: “Nomboroto dingapi muna kara nado? Ka di tareni.” Tava ka di tara, makura tava limburura asi: “Ntano nonomfi mbali.”
39 Age makura ta tantere vantu va hingire motumbunga powayi wafoko-foko.
40 Makura tava hingire 100 motumbunga ntani 50 motumbunga.
41 Ta gusa nomboroto odo ntano nonomfi mbali, ta tara keguru makura ta kanderere. Ta bamagura nomboroto noku di gava kovarongwa vendi va di gavere kovantu, nomfi mbali nado ta di va gawinine.
42 Vantu navenye kwa lire tava kuta,
43 tava pongaike nomfi ntani yikumba 12 yonomboroto edi da hupire po.
44 Vagara ava va lire nomboroto odo kwa kere 5 000.
45 Poopo ngoso, ta tantere varongwa vendi va ronde mowato va ze mesinya mwina koBetesaida, siruwo esi ana kutantera mbunga zi ze.
46 Apa za liharaganene mbunga, makura ta zi kondundu a ka kanderere.
47 Kongurova, wato kwa kere pokatji kefuta, nye age kwa kere gelike konze zefuta.
48 Apa ga va mwene asi kuna kuvadigopera kuduga morwa mpepo zonene, yipo ga va wizilire age kuna kugenda pefuta, opo ago masasiku.* Age kwa here asi a va pitakane.
49 Apa va mwene ngwendi muntu ana kugenda pefuta, tava takuma.
50 Yeeyi navenye kwa mwene ngwendi muntu ana kugenda pefuta makura tau va kwata woma. Nye age ta va tantere asi: “Nyame, mwa ha tjira.”
51 Ta rondo nawo mowato, makura mpepo tazi litura. Eyi kwa va tetukisire unene,
52 yeeyi kapi va kwete egano sitetu sonomboroto morwa nomutjima dawo kapi simpe da yi pulire.
53 Apa va ka sikire mesinya mwina, tava ka hegeka wato wawo moGenesareta.
54 Nye tupu va humburukire mowato, vantu nare vana mu dimburura.
55 Awo makura tava dukagana mwaza nomukunda va ka rete vaveli va va tware oku ga kere.
56 Nkenye sitata ndi mukunda omu nga zi, vantu ngava tura vaveli pomarandesero, vaveli owo ngava mu likwambere asi va kwate tupu nampili kononyerera dosikoverero sendi. Ano nkenye ogu ga kwete ko kwa verukire.
Nonkango dokonhi
^ MoRugereka asi “ngoporo.”
^ Ndi “sikoverero simwe hena.”
^ Ndi “hingilire nawo kositafura.”
^ Ndi “ava ga hingilire nawo kositafura.”
^ Yimaliwa yosisiliveli yoVaroma.
^ Kwa tamba koyiha yovili 3 ngurangura dogoro koyiha yovili 6 apa ali pumu ezuva.
