Buke zaMarukusa 5:1-43
5 Makura tava ka sika kesinya kwina lyefuta momukunda goVagerasa.
2 Tupu ga humburukire Jesus mowato, ta ligwana nomugara ogu ga kere nonompepo donondona age kuna kutunda monontoko.*
3 Age kwa tungire monontoko, kwato ogu nga vhuru kumumanga.
4 Yikando yoyinzi ngava mu tura moyipandeko nokumumanga nomauketanga nye ngayi ndembagura ntani kwato ogu nga mu vhuru.
5 Nkenye ezuva, masiku nomutenya, nga zigagana monontoko nomonondundu oku ta ligeragura nomamanya.
6 Nye tupu ga mwene Jesus, ta dukire kwendi, ta ka mu twira nongoro.
7 Makura ta zigire unene asi: “Yisinke nina kuzono, ove Jesus MunwaKarunga gekeguru-guru? Na kanderere gana kwaKarunga asi kapi no hepeka nge.”
8 Age kwa zigilire unene morwa yeeyi Jesus ga tanterere mpepo ozo asi: “Ove mpepo zondona, tunda mo momugara ogo.”
9 Nye Jesus ta mu pura asi: “Edina lyoge yilye?” Age ta limburura asi: “Nyame mbunga, yeeyi tu vanzi.”
10 Nompepo donondona tadi likwambere kwaJesus a dire kuditjida mo momukunda ogo.
11 Pwa kere yinguru eyi ya lire pepi nondundu.
12 Makura nompepo donondona tadi mu likwambere asi: “Tu siga tu hwilire moyinguru oyo.”
13 Age ta di pulisire. Makura ado tadi pwaga mo, tadi ka hwilira moyinguru, ano yinguru yokusika poyiha 2 000 ta yi kunkumukire mefuta, ta yi fu komema.
14 Vasita vayo makura tava duka va ka tantere vantu womositata nomomukunda eyi ya horokere, vantu makura tava wiza va ya tare.
15 Awo kwa wizire kwaJesus, tava mono mugara ogu ga kere nonompepo donondona, age kuna hingire, muwaawa ntani ana dwara, ano eyi kwa va tukukisire.
16 Ano ava va yi mwene, tava simwitire eyi ya horokerere mugara ogu ga kere nonompepo donondona ntani kuhamena yinguru.
17 Makura tava likwambere Jesus a tunde mo momukunda gwawo.
18 Apa Jesus ga rondere mowato, mugara ogu ga kere nare nonompepo donondona ta mu likwambere asi va ze kumwe.
19 Nye kapi ga mu pulisilire, ta mu tantere asi: “Zende kembo kekoro lyoge o ka va tantere nayinye eyi ga kuruganena Jehova nonkenda ezi ga kulikida.”
20 Age ta zi a ka simwitire nayinye eyi ga mu ruganenene Jesus momukunda gwaDekapolisi* makura vantu navenye tava tetuka.
21 Konyima zapa Jesus ga rutire nowato mesinya mwina lyefuta, mbunga zonene tazi ya mu pongere, age konontere defuta.
22 Mugara gedina Jairusa ogu nga pitisire mosinagoge, kwa mona tupu Jesus, makura ta ya gwire konompadi dendi.
23 Age kwa mu likwamberere yikando yoyinzi asi: “Munange gomukadona kuna kuvera unene.* Wiza o ya mu kambeke mawoko goge yipo a veruke nokuparuka.”
24 Jesus makura ta zi nendi, ano mbunga zonene tazi mu kwama oku zina mu paterekeda.
25 Pwa kere mukadi ogu ga kere nouvera wohonde nomvhura 12.
26 Age nga hepa unene noku za kovandokotora wovanzi ntani emona lyendi yiko lya pwililire nye uvera wendi kwa twikilire kudida.
27 Apa ga zuvhire kuhamena Jesus, ta pene mombunga ta zi konyima zaJesus, ta kwata kosikoverero sendi,
28 yeeyi age kwa liuyungisire momutjima asi: “Nsene nani kwata nampili kosikoverero sendi, tani veruka.”
29 Poopo ngoso, honde zendi tazi hageke kupita, makura ta lizuvhu asi ana veruka.
30 Jesus ta dimburura asi nonkondo dina tundu mo mwendi, ta piruka makura ta pura mbunga asi: “Yilye ogu ana kwata kosikoverero sange?”
31 Nye varongwa vendi tava mu limburura asi: “Amesi ono mono omu mbunga zina kukundurukida, omu no pura asi ‘yilye ogu ana kwata nge?’”
32 Nye, age ta tara-tara a mone ogu ana yi rugana.
33 Mukadi ta tukuka nokukankama, morwa ga divire eyi ya mu horokerere, ta zi, ta ligandere komeho zendi, ta mu tantere usili naunye.
34 Ta mu tantere asi: “Munange, epuro lyoge lina kuverura. Zende mombili, ove o veruke kouvera woge.”
35 Age simpe kuna kuuyunga, vagara vamwe ava va tundire membo lyaJairusa tava tanta asi: “Munoge ana dogoroka! Yinke ono kurorwera Murongi?”
36 Nye Jesus ta zuvhu eyi va uyungire, makura ta tantere Jairusa asi: “Wa ha tjira,* kara tupu nepuro.”
37 Kapi ga pulisilire wopeke va mu kwame, ntudi Peturusa naJakopo naJohanesa mumbyaJakopo.
38 Apa va ya sikire membo lyaJairusa, awo vantu kuna kulira oku tava zigagana.
39 Apa ga hwililire mo, ta va pura asi: “Morwasinke muna kulilira nokuzigagana? Munona kapi ana fu nye kuna rara.”
40 Awo tava mu zoro sirungu. Nye konyima zokuvatjida mo navenye, ta zi noguhwe ntani nozina womunona, nava ga wizire nawo monzugo omu ga kere munona.
41 Age makura ta kwata kuwoko komunona, ta mu tantere asi: “Talita kumi,” kutanta asi “mukadona, tani kutantere asi pinduka!”
42 Poopo ngoso, mukadona ogo gonomvhura 12, ta pinduka makura ta gendagura. Ano vakondi vendi tava tetuka.
43 Nye age ta ruguruka kuvatantera* asi va ha ka yi tantera vantu. Ntani ta va tantere hena va pe mukadona nondya a lye.
Nonkango dokonhi
^ Ndi “momayendo.”
^ Ndi “mukunda goyitata murongo.”
^ Ndi “mokufa ana karere.”
^ Ndi “hageka kukara nowoma.”
^ Ndi “ta va pamperekeda.”
