Levitikus 19:1-37
19 Jehova ta tantere Mosesa asi:
2 “Tantera Vaisraeli navenye asi: ‘Mwa hepa kupongoka, yeeyi ame Karunga gweni Jehova, na pongoka.
3 “‘Mwa hepa kufumadeka* vaguhya veni novazinya veni ntani mwa hepa kusikisa mo esabata lyange. Ame nyame Karunga gweni Jehova.
4 Mwa ha karera yikarunga yokudira mulyo ndi mu liruganene yikarunga yoyivera. Ame nyame Karunga gweni Jehova.
5 “‘Nsene tomu gava nonzambo dombili kwaJehova, mwa hepa kudigava monkedi zouhunga yipo a mu hafere.
6 Mwa hepa kudilya mezuva eli ngomu di zamba ntani mezuva lyokukwama ko, nye eyi ngayi hupa po dogoro ezuva lyautatu, mwa hepa kuyihwika.
7 Nsene mu di lya mezuva lyautatu, nonzambo odo kapi ngava di tambura morwa aso sininke sosidona.
8 Ogu nga lya ko ngava mu tengeka, morwa age kapi ana fumadeke sininke saJehova sokupongoka ntani muntu ogo va hepa kumugusa mo* mokatji kovantu vendi.
9 “‘Nsene tomu pongaike muzangu gweni, kapisi mu guse nayinye eyi ya kara konontere domapya geni ndi mu toragure* eyi muna hupisa po.
10 Ntani mwa ha pongaika mandjembere aga gana hupu mo moyikunino yeni yomandjembere ndi mu toragure aga gana gwire pevhu. Mwa hepa kuyisigira vantu woruhepo novanayirongo. Ame nyame Karunga gweni Jehova.
11 “‘Mwa ha vaka, mwa ha tanta yimpempa ntani mwa ha genda vakweni konhi.
12 Mwa ha kwatesa ko yimpempa nokugana medina lyange, morwa ayo ngayi nyatekesa edina lyaKarunga gweni. Ame nyame Jehova.
13 Mwa ha kumbagera vakweni ntani mwa ha vaka. Mwa ha lipungwira mfeto zovarugani dogoro kongurangura.
14 “‘Mwa ha finga sipurupuru ndi mu ture sipundukiso komeho zomutwiku ntani mwa hepa kutjira Karunga gweni. Ame nyame Jehova.
15 “‘Mwa ha fukira nsene tomu pangura. Mwa ha likida nkenda komuntu goruhepo morwa ruhepo rwendi ndi mu hame konongawo. Mwa hepa kupangura vakweni pauhunga.
16 “‘Mwa ha hanesa yimpempa mokatji kovakweni yipo mu nyatekese madina govakweni. Mwa ha rugana yuma eyi nayi tura eparu* lyovakweni mosiponga.* Ame nyame Jehova.
17 “‘Mwa ha nyenga vakweni momutjima. Mwa hepa kupukurura vakweni yipo ngomu dire kukara nonzo nsene vana zono.
18 “‘Mwa ha tengwida kuwoko ndi mu kare nonkoko novakweni ntani mwa hepa kuhara vakweni ngwendi moomu mwa lihara nyamweni. Ame nyame Jehova.
19 “‘Mwa hepa kulimburukwa noveta dange: Mwa ha pulisira simuna sorudi rwapeke si retese simuna sorudi rwapeke. Mwa ha kuna momapya geni nombuto mbali dokulisiga ntani mwa ha dwara sikoverero esi va honza nonongodi mbali dokulisiga.
20 “‘Nsene mugara a ligwanekera panyama nomukadi gomupika, ogu ga vandekera mugara gwapeke, nye mukadi ogo kapi va mu zowora ndi va mu mangurura, va hepa kuvatengeka nye kapisi va va dipage, morwa mukadi ogo simpe kapi va mu mangurura.
21 Mugara ogo ga hepa kureta nzwi zongara zonzambo zokugusisa po nonzo kwaJehova pevero lyonkongoronzugo.*
22 Makura mupristeli a gave nzwi zokugusisa po nonzo komeho zaJehova, ano mugara ogo ngava mu gusira po nzo ezi ga tura.
23 “‘Apa ngomu za mosirongo esi nina kumupa, makura mu tapeke yitji yenyango, kapisi ngomu lye enyango olyo ure wonomvhura ntatu. Mwa hepa kutara enyango olyo asi lya nyata ntani nokulilya si.
24 Nye momvhura zaune, enyango lyako nalinye ngali pongoka ntani ngomu li gave kwaJehova noruhafo.
25 Momvhura zautano kuvhura tupu ngomu lye enyango olyo, yipo ngomu gwederere komuzangu gweni. Ame nyame Karunga gweni Jehova.
26 “‘Mwa ha lya yuma eyi yina kara nohonde.
“‘Mwa ha papara yidiviso ndi mu lihameke moumpure.
27 “‘Mwa ha kurura* nohuki edi da kara konontere dokomutwe gweni ndi mu tete nonzwedu deni mu di zonagure.
28 “‘Mwa ha likekagura morwa muntu* ana dogoroka ntani mwa ha litjangagura komarutu geni.* Ame nyame Jehova.
29 “‘Mwa ha swaukisa vana veni wovakadona pokuvaninka va kare nohondedi, ndi ngano sirongo nga si nyata koruhonda nokuvhuka mo vantu wonkareso zokunyata.
30 “‘Mwa hepa kusikisa mo esabata lyange ntani mwa hepa kufumadeka* evango lyange lyokupongoka. Ame nyame Jehova.
31 “‘Mwa ha za kovantu ava ava uyunga novafe ntani kovapumbi. Ayo ngayi mu ninkisa mu nyate. Ame nyame Karunga gweni Jehova.
32 “‘Mwa hepa kukatuka mu likide efumadeko kovakurupe ntani mwa hepa kutjira Karunga gweni. Ame nyame Jehova.
33 “‘Nsene munayirongo a tunga mosirongo seni, mwa ha mu tekura momudona.
34 Munayirongo ogu ga tunga none, mwa hepa kumutara ngwendi Muisraeli mukweni ntani mwa hepa kumuhara ngwendi moomu mwa lihara nyamweni, yeeyi none kwa kere vanayirongo mosirongo saEgipite. Ame nyame Karunga gweni Jehova.
35 “‘Mwa ha ruganesa yimeteso youfuki nsene kuna kumeta ure, siviha ndi unzi wosininke.
36 Mwa hepa kuruganesa yimeteso youhunga, yiviha youhunga ntani nosimeteso souhunga.* Ame nyame Karunga gweni Jehova ogu ga mu gusa mosirongo saEgipite.
37 Yipo nye, mwa hepa kusikisa mo nompangera dange nadinye nonoveta dange nadinye nokudikwama. Ame nyame Jehova.’”
Nonkango dokonhi
^ MoRuhebeli asi “kutjira.”
^ Ndi “va hepa kumudipaga.”
^ Ndi “pupure.”
^ MoRuhebeli asi “honde.”
^ Ndi nampo asi “Mwa ha sikama tupu mu tarere vakweni ava vana kara mosiponga.”
^ Ndi “tende zokupongera.”
^ Ndi “teta.”
^ Ndi “munamwenyo.” Nkango zoRuhebeli nephesh ezi va ruganesa apa kwa tamba komuntu gokufa.
^ MoRuingilisa asi tattoo.
^ Ndi “kutetuka.”MoRuhebeli asi “kutjira.”
^ MoRuhebeli asi “simeteso souhunga soephah ntani nosimeteso souhunga sohin.” Tara App. B14.
