Josuwa 21:1-45
21 Masimbi gomomazimo goVarevhi tava hedere mupristeli Eliyasara, Josuwa munaNunu ntani masimbi gomomarudi goVaisraeli.
2 Awo kwa uyungire nawo moSiro mosirongo saKanani, tava va tantere asi: “Jehova kwa uyungire kupitira mwaMosesa asi va tu pe yitata eyi natu tunga kumwe nomavango gayo gokulisira yimuna yetu.”
3 Makura Vaisraeli tava gusa yitata eyi poupingwa wawo nomavango gayo gokulisira yimuna va yi pe Varevhi ngwendi moomu ga yi pangerere Jehova.
4 Womoruvharo rwaKohati yiwo va pere* pomuhowo yitata pafungu-fungu, ano Varevhi womoruvharo romupristeli Arona kwa va pere yitata 13 eyi va gusire morudi rwaJuda, rwaSimiyoni ntani noru rwaMbenyameni.
5 Ano womoruvharo rwaKohati wokuhupa ko kwa va pere yitata murongo eyi va gusire morudi rwaEfurayimi, rwaDana ntani novantu vamwe womorudi rwaManase.
6 Ano womoruvharo rwaGeresoni kwa va pere yitata 13 eyi va gusire morudi rwaIsasikali, rwaAseli, rwaNafitali ntani novantu vamwe womorudi rwaManase momukunda gwaBasani.
7 Womoruvharo rwaMerali kuliza nomapata gawo kwa va pere yitata 12 eyi va gusire morudi rwaRubena, rwaGada ntani noru rwaSeburoni.
8 Vaisraeli kwa geve yitata eyi koVarevhi nomavango gayo gokulisira yimuna pafungu-fungu ngwendi moomu ga yi pangerere Jehova kupitira mwaMosesa.
9 Womorudi rwaJuda norudi rwaSimiyoni kwa geve yitata eyi yina kukwama ko,
10 kovana vaArona womoruvharo rwaKohati ava va tundilira morudi rwaRevhi, morwa yiwo va hovere kugwana yitata pafungu-fungu.
11 Awo kwa va pere sitata saKiliyata-aruba ndi Heburoni (Aruba kwa kere guhyaAnaki) esi sa kara momukunda gonondundu gwaJuda ntani nomavango gaso gokulisira yimuna.
12 Nye mapya gomositata oso nonomukunda daso kwa yi pere Karebu munaJefune, yi kare upingwa wendi.
13 Ano vana womupristeli Arona kwa va pere sitata sorugami oku nga dukira muntu ogu nga dipaga mukwawo. Aso kuna kara sitata saHeburoni nomavango gaso gokulisira yimuna, sitata saLibuna nomavango gaso gokulisira yimuna,
14 sitata saJatire nomavango gaso gokulisira yimuna, sitata saEsitemoa nomavango gaso gokulisira yimuna,
15 sitata saHoroni nomavango gaso gokulisira yimuna, sitata saDebire nomavango gaso gokulisira yimuna,
16 sitata saAini nomavango gaso gokulisira yimuna, sitata saJuta nomavango gaso gokulisira yimuna ntani sitata saBete-semesi nomavango gaso gokulisira yimuna. Marudi ogo gavali kwa geve yitata eyi ntane.
17 Womorudi rwaMbenyameni kwa geve yitata eyi: sitata saNgibiyoni nomavango gaso gokulisira yimuna, sitata saGeba nomavango gaso gokulisira yimuna,
18 sitata saAnatoti nomavango gaso gokulisira yimuna ntani sitata saArumoni nomavango gaso gokulisira yimuna. Awo kwa geve yitata yine.
19 Yitata nayinye eyi va pere womoruvharo romupristeli Arona kwa kere 13 nomavango gayo gokulisira yimuna.
20 Ano womoruvharo rwaKohati wokuhupa ko ava va tundilira morudi rwaRevhi, kwa va pere yitata eyi va gusire morudi rwaEfurayimi.
21 Awo kwa va pere sitata saSikemu sorugami nomavango gaso gokulisira yimuna yipo nga dukire mo muntu ogu nga dipaga mukwawo. Aso kwa kere momukunda gonondundu gwaEfurayimi. Awo kwa va pere hena sitata saGesere nomavango gaso gokulisira yimuna,
22 sitata saKibusayimu nomavango gaso gokulisira yimuna ntani sitata saBete-horoni nomavango gaso gokulisira yimuna. Awo kwa va pere yitata yine.
23 Ano womorudi rwaDana kwa geve yitata eyi: sitata saEliteke nomavango gaso gokulisira yimuna, sitata saGibetoni nomavango gaso gokulisira yimuna,
24 sitata saAiyaroni nomavango gaso gokulisira yimuna ntani sitata saGata-limoni nomavango gaso gokulisira yimuna. Awo kwa geve yitata yine.
25 Ano vantu vamwe womorudi rwaManase kwa geve yitata eyi: sitata saTanaki nomavango gaso gokulisira yimuna ntani sitata saGata-limoni nomavango gaso gokulisira yimuna. Awo kwa geve yitata yivali.
26 Yitata nayinye eyi va pere womoruvharo rwaKohati wokuhupa ko nomavango gayo gokulisira kwa kere 10.
27 Ano vantu vamwe womorudi rwaManase kwa pere womoruvharo rwaGeresoni ava va tundilira morudi rwaRevhi sitata saGorani sorugami nomavango gaso gokulisira momukunda gwaBasani, yipo nga dukire mo muntu ogu nga dipaga mukwawo ntani sitata saBesitera nomavango gaso gokulisira yimuna. Awo kwa va pere yitata yivali.
28 Womorudi rwaIsasikali kwa geve yitata eyi: sitata saKisiyoni nomavango gaso gokulisira yimuna, sitata saDaberati nomavango gaso gokulisira yimuna,
29 sitata saJarumuti nomavango gaso gokulisira yimuna ntani sitata saEni-ganimu nomavango gaso gokulisira yimuna. Awo kwa geve yitata yine.
30 Ano womorudi rwaAseli kwa geve yitata eyi: sitata saMisali nomavango gaso gokulisira yimuna, sitata saAbudoni nomavango gaso gokulisira yimuna,
31 sitata saHelikati nomavango gaso gokulisira yimuna ntani sitata saRehobu nomavango gaso gokulisira yimuna. Awo kwa geve yitata yine.
32 Ano womorudi rwaNafitali kwa geve sitata saKedesi sorugami nomavango gaso gokulisira yimuna yipo nga dukire mo muntu ogu nga dipaga mukwawo. Aso kwa kere moGalireya, awo kwa geve hena sitata saHamoto-doro nomavango gaso gokulisira yimuna ntani sitata saKaretani nomavango gaso gokulisira yimuna. Awo kwa geve yitata yitatu.
33 Yitata nayinye eyi va pere womoruvharo rwaGeresoni nomapata gawo kwa kere 13 nomavango gayo gokulisira yimuna.
34 Ano womoruvharo rwaMerali ndi Varevhi wokuhupa ko, kwa va pere womorudi rwaSeburoni sitata saJokineyami nomavango gaso gokulisira yimuna, sitata saKareta nomavango gaso gokulisira yimuna,
35 sitata saDimuna nomavango gaso gokulisira yimuna ntani sitata saNaharali nomavango gaso gokulisira yimuna. Awo kwa va pere yitata yine.
36 Ano womorudi rwaRubena kwa geve yitata eyi: sitata saBesere nomavango gaso gokulisira yimuna, sitata saJahasi nomavango gaso gokulisira yimuna,
37 sitata saKedemoti nomavango gaso gokulisira yimuna ntani sitata saMefati nomavango gaso gokulisira yimuna. Awo kwa geve yitata yine.
38 Ano womorudi rwaGada kwa geve sitata saRamoto nomavango gaso gokulisira yimuna yipo nga dukire mo muntu ogu nga dipaga mukwawo, aso kwa kere moGiliyata. Awo kwa geve hena sitata saMahanayimu nomavango gaso gokulisira yimuna,
39 sitata saHesiboni nomavango gaso gokulisira yimuna ntani sitata saJasere nomavango gaso gokulisira yimuna. Awo kwa geve yitata yine.
40 Yitata nayinye eyi va pere womoruvharo rwaMerali kuliza nomapata gawo ndi womorudi rwaRevhi wokuhupa ko, kwa kere 12.
41 Yitata nayinye eyi va pere Varevhi mokatji koupingwa woVaisraeli kwa kere 48 nomavango gayo gokulisira yimuna.
42 Yitata nayinye eyi kwa yi kundurukidire mavango gokulisira yimuna.
43 Jehova kwa pere Vaisraeli sirongo esi ga tumbwidilire ozinyakurwawo, makura tava si gusa va tunge mo.
44 Ntani hena, Jehova kwa va ninkire va kare nombili mosirongo ngwendi moomu ga yi tumbwidilire ozinyakurwawo ntani nonkore dawo kapi da vhulire kuvarwisa. Jehova kwa geve nonkore dawo nadinye momawoko gawo.
45 Matumbwidiro* nagenye gomawa aga ga pere Jehova Vaisraeli kwa sikire mo, kwato eli lya dilire kusika mo.
