Buke zaJohanesa 1:1-51
1 Petameko, Nkango nazo yipo za kere ntani azo kwa kere naKarunga, ano Nkango ozo kwa kere ngwendi Karunga.*
2 Azo kwa kere naKarunga petameko.
3 Yininke nayinye kwa wiza po kupitira moNkango ntani kwato eyi ya wiza po ya hana kupitira mwazo.
Eyi ya wiza po
4 kupitira moNkango kuna kara eparu, ano eparu yilyo uzera wovantu.
5 Ntani uzera kuminikira momundema, ano mundema kapi agu vhuru kukudumika uzera owo.
6 Pwa kere mugara ogu ga tumine Karunga, edina lyendi Johanesa.
7 Mugara ogo kwa wizire a ya gave umbangi kuhamena uzera, yipo vantu navenye va pure eyi ga uyungire.
8 Age kapisi yige uzera owo, nye age kwa mu tumine a ya gave umbangi kuhamena uzera owo.
9 Uzera wousili ou au minikire vantu navenye kwa kere pepi nokuwiza mouzuni.
10 Age kwa kere mouzuni, ano uzuni kwa wiza po kupitira mwendi, nye uzuni kapi wa mu divire.
11 Age kwa wizire kovantu vendi, nye vantu vendi kapi va mu tambwire.
12 Kwanavenye ava va mu tambwire, age kwa va pere mpito zokukara vana vaKarunga morwa awo kwa pulire mwendi.
13 Awo kapi va va hampuruka mohonde ndi meharo lyopasintu ndi lyomugara, nye mwaKarunga.
14 Nkango kwa ya kere muntu nokuyatunga mokatji ketu, ntani ose kwa mwene uyerere wendi, ano uyerere owo kwa hamena tupu kwamuna gelike a huru ou ga gwana koguhwe, age kwa kere nonkenda zaKarunga* nousili.
15 (Johanesa kwa geve umbangi kumuhamena, age kwa zigilire asi: “Ogu yige na tembe apa na tente asi: ‘Ogu ana kuwiza konyima zange, ga pita nge morwa yige ga hovere kukara po.’”)
16 Natuvenye kugwana matungiko morwa nkenda zaKarunga zonene nousili ou ga tu ronga.
17 Veta kwa zi geve kupitira mwaMosesa nye nkenda zaKarunga zonene nousili kwa wiza po kupitira mwaJesus Kristusa.
18 Kwato ogu ga mona Karunga ntudi muna gelike a huru ogu ga fana ngwendi oGuhwe Karunga* ntani ga kara pepi nawo,* yige ga va divisa.
19 Ou yiwo umbangi ga geve Johanesa apa Vajuda va tumine vapristeli noVarevhi wokoJerusarema va ka mu pure asi: “Nyove yilye?”
20 Age kwa va limbwilire pokuvatantera usili asi: “Kapisi nyame Kristusa.”
21 Awo tava mu pura asi: “Nyove yilye nye? Nyove Eliya ndi?” Age ta limburura asi: “Kapisi nyame.” “Nyove muporofete ogu twa zuvha asi nga wiza ndi?” Ta va limburura asi: “Hawe!”
22 Makura tava mu pura hena asi: “Nyove yilye? Tu tantera yipo tu ka sikise mbudi kwava vana tu tumu. Ngapi omu o litumbura nyamoge?”
23 Age ta va limburura asi: “Nyame ezwi lina kuzigira momburundu ngwendi moomu ga yi tente muporofete Jesaya asi: ‘Vyukiseni nzira zaJehova.’”
24 Vantu owo, Vafalisayi va va tumine.
25 Makura tava mu pura asi: “Morwasinke nye o kuhwire nsene asi kapisi nyove Kristusa ndi Eliya ndi Muporofete?”
26 Johanesa ta va limburura asi: “Ame kukuhwa nomema. Mokatji keni muna kara gumwe ogu mwa dira kudiva,
27 age nga wiza konyima zange, ame kapi na wapera kuditura nongodi dokoyicamakaku yendi.”
28 Yininke eyi kwa horokerere moBetani mesinya mwina lyaJorodana oku nga kuhwire Johanesa.
29 Ezuva lyokukwama ko, ta mono Jesus kuna kuwiza kwendi makura ta tanta asi: “Tareni, Nzwigona zaKarunga ezi azi gusa po nonzo douzuni!
30 Ogu yige na tembe apa na tente asi: ‘Ogu ana kuwiza konyima zange ga pita nge, morwa yige ga hovere kukara po.’
31 Namesi kapi na mu divire nye ame kwa wizira ni ya kuhwe nomema yipo a ya divikwe koVaisraeli.”
32 Johanesa kwa divisire hena asi: “Ame kwa mwene mpepo zaKarunga kuna kuhegumuka zi tunde meguru ngwendi mputukuwa makura tazi mu tembere.
33 Name kapi na mu divire nye ogu ga tuma nge ni ya kuhwe nomema kwa tanterere nge asi: ‘Ogu ngo mona kuna kumuhegumukira mpepo zokupongoka noku mu tembera, ogo yige a kuhu nompepo zokupongoka.’
34 Ame kwa yi mona ntani na yi gavera umbangi asi ogu yige MunwaKarunga.”
35 Ezuva eli lya kweme ko, Johanesa kwa sikeme novarongwa vendi vavali,
36 apa ga mwene Jesus kuna kupita, ta tanta asi: “Tareni, Nzwigona zaKarunga!”
37 Varongwa owo vavali apa va yi zuvhire oyo, tava kwama Jesus.
38 Jesus makura ta setuka, ano apa ga va mwene kuna kumukwama, ta va pura asi: “Yisinke muna kupapara?” Awo tava mu limburura asi: “Murongi,* kupi wa kara?”
39 Age ta va tantere asi: “Wizeni mu ya tare.” Awo tava zi noku ka mona oku ga kere, makura tava kara nage ezuva olyo, ako kwa kere koyiha yovili zomurongo.*
40 Andiliyasa* mumbyaSimoni Peturusa, kwa kere gumwe gwava vavali va zuvhire eyi ga uyungire Johanesa nokukwama Jesus.
41 Pomuhowo, age kwa zire kwamumbyendi Simoni noku ka mu tantera asi: “Ose tuna gwana Mesiyasa” (kutanta asi “Kristusa”),
42 ta mu twara kwaJesus. Jesus apa ga mu mwene, ta tanta asi: “Nyove Simoni, munwaJohanesa, ngava kutumbura asi Kefasa” (kutanta asi “Peturusa”).
43 Ezuva eli lya kweme ko, Jesus kwa here kuza koGalireya makura ta gwana Filipusa, ta mu tantere asi: “Kara murongwa gwange.”
44 Filipusa kwa tundilira koBetesaida, sitata omu ga tunda Andiliyasa naPeturusa.
45 Filipusa ta gwana Natanayera, ta mu tantere asi: “Tuna gwana ogu va tjanga moVeta zaMosesa nogu va tjenge Vaporofete: Jesus, munwaJosefa gomoNasareta.”
46 Nye Natanayera ta mu tantere asi: “MoNasareta sili namo kuvhura kutunda mo yoyiwa?” Filipusa ta mu tantere asi: “Wiza o ya tare.”
47 Jesus ta mono Natanayera kuna kuwiza kwendi makura ta tanta asi: “Tareni, Muisraeli mwene-mwene ogu ga dira umbudi.”
48 Natanayera ta mu pura asi: “Ngapi omu ono diva nge?” Jesus ta mu limburura asi: “Komeho Filipusa a ku zigide, ame nare nina kumono, ove opo kuna hingire mositji soukuzu.”
49 Natanayera ta limburura asi: “Murongi, ove MunwaKarunga, Hompa gwaIsraeli.”
50 Jesus ta mu pura asi: “Ove kuna pura morwa yeeyi nina kumono mositji soukuzu ndi? Ove ngo mona yininke yokutetukisa unene kupitakana eyi.”
51 Age ta mu tantere asi: “Yosili nina kumutantera asi, one ngomu mona eguru lina zeguruka, ano vaengeli vaKarunga kuna kuhumburuka nokuronda oku ga kara MunwaMuntu.”
Nonkango dokonhi
^ MoRugereka asi “kwa kere karunga.”
^ Ndi “nkenda zaKarunga zonene.”
^ MoRugereka asi “karunga gelike a huru.”
^ Ndi “mevha lyoGuhwe,” eyi kulikida asi kwa mu hafera.
^ Ndi “Rabi.” Ntumbwisiso ezi, ngava zi ruganesa mokulikida efumadeko komurongi goMujuda.
^ Kwa tamba koyiha yovili 4, sitenguko.
^ MoRugereka kapi va vyukilira kutumbura nsene asi Andiliyasa ndi Peturusa yige mukondi.
