Buke zEhororo 6:1-17
-
Nzwigona tazi kakura yipateso ntazimwe yokuhova (1-17)
6 Ame kwa mwene Nzwigona kuna kukakura simwe soyipateso ntambali ntani ame kwa zuvhire simwe soyinamwenyo yine, sina kuzigira nezwi ngwendi lyosindundumo asi: “Wiza!”
2 Makura tani mono nkambe zonzera, ano ogu ga rondere po kwa kwaterere uta wonkanza; Karunga kwa mu pere nkata, makura tazi aka funde nonkore dendi.
3 Apa ga kakwire ko sipateso sauvali, tani zuvhu sinamwenyo sauvali sina kuzigira asi: “Wiza!”
4 Makura tani mono hena nkambe zongeha ngwendi mundiro, ano ogu ga rondere po kwa mu pere nonkondo dokugusa mbili pevhu, yipo vantu va lidipage vene navene ntani age kwa mu pere rufuro rorunene.
5 Apa ga kakwire sipateso sautatu, ame kwa zuvhire sinamwenyo sautatu sina kuzigira asi: “Wiza!” Makura tani mono nkambe zonsovagani, ano ogu ga rondere po kwa kwaterere siviha mokuwoko kwendi.
6 Ame kwa zuvhire ezwi mokatji koyinamwenyo yine lina kutanta asi: “Lita zorukokotwa kuna kuzirandesa edenali* ntani nolita ntatu doyilya kuna kudirandesa edenali, takameseni nawa magadi gononzwe novhinyu.”
7 Apa ga kakwire sipateso saune, tani zuvhu sinamwenyo saune sina kuzigira asi: “Wiza!”
8 Makura tani mono nkambe zousamuki, ano ogu ga rondere po edina lyendi Nomfa. Ntani Mayendo* kwa mu kweme monyima. Awo kwa va pere nonkondo dokupangera siune* souzuni, yipo va dipage vantu norufuro rorure nerumbu nomauvera gomukagu ntani noyikasama yepevhu.
9 Apa ga kakwire ko sipateso sautano, ame kwa mwene konhi zosizambero nomwenyo* dava va dipagere, morwa kulimburukwa nonkango daKarunga nokugava umbangi.
10 Awo kwa zigilire nezwi lyenene asi: “Hompa Mupangeli gwanayinye, ogu ga pongoka ntani gousili, siruwoke ngo pangura nokutengwida kuwoko vantu ava va kara pevhu ava va tjisanga honde zetu?”
11 Hompa kwa va pere navenye marwakani gomazera nokuvatantera asi va ndindire nakauke dogoro si sike mo sivaro sovakareli vakwawo ava nawo ngava dipaga.
12 Ame kwa mu mwene age kuna kukakura sipateso sauntazimwe, makura tapa horoka ekankamo lyevhu lyenene, ezuva ta li sovagana ngwendi sikoverero sonsako esi va ruganesa konohuki* ntani kwedi kwa gehere ngwendi honde,
13 ntani nombungururu dekeguru kwa gwililire pevhu ngwendi moomu mpepo zonene azi ganda ekuzu lyokudira kupya kositji.
14 Eguru kwa ligonyene ngwendi bukegango makura ta li dongonoka, ano nondundu noyirudi tayi tundu po pomavega gayo.
15 Makura vahompa vepevhu novanekuto novapitisili wovakwayita nonongawo novanankondo novapika nava navenye va manguruka, kwa vende momakombombo nomonondundu mokatji komamanya.
16 Awo kwa tanterere nondundu nomamanya asi: “Tu gwireni mu tu horeke, yipo a dire kutumona ogu ga hingira kosipundi souhompa ntani nekehandu lyoNzwigona,
17 yeeyi ezuva lyehandu lyawo lina wiza, yilye na vhura kuparuka?”
