Deuteronomium 31:1-30
31 Makura Mosesa ta zi, ta ka tantera Vaisraeli navenye nonkango edi
2 asi: “Ame ngesi nomvhura dange 120. Ame kapi tani vhuru kumupitisira* hena, yeeyi Jehova kwa tantera nge asi: ‘Ove kapi ngo ruta mukuro gwaJorodana.’
3 Karunga gweni Jehova nga pita komeho zeni a ka zonagure nomuhoko edi komeho zeni a di tjide mo. Josuwa yige nga mu pitisira mu rute mukuro gwaJorodana ngwendi moomu ga yi tanta Jehova.
4 Jehova nga va zonagura po ngwendi moomu ga zonagwire po Sihoni naOgo, vahompa woVaamoli ntani nosirongo sawo.
5 Jehova nga mu ninka mu va funde ntani mwa hepa kuvarugana kuliza noveta ezi na mu pa.
6 Kareni nouradi ntani koreni. Mwa ha va tjira, yeeyi Karunga gweni Jehova yige ana kumupitisira. Age kapi nga mu zumba ndi a mu sigilire.”
7 Makura Mosesa ta zigida Josuwa, ta mu tantere komeho zoVaisraeli navenye asi: “Kara nouradi ntani kora, yeeyi nyove ngo twara vantu ava mosirongo esi ga tumbwidira Jehova ozinyakurwawo asi nga si va pa. Ngo va pe sirongo oso va si pinge.
8 Jehova yige ana kukupitisira ntani nga kara nove nkenye apa. Age kapi nga kuzumba ndi a ku sigilire. Wa ha tukuka ndi o tjire yuma.”
9 Makura Mosesa ta tjanga Veta ezi, tazi gava kovapristeli woVarevhi ava ava simbi sikesa saJehova segwanekero ntani komasimbi nagenye goVaisraeli.
10 Mosesa ta va pangere asi: “Kouhura wankenye mvhura zauntambali, apa ngazi sika mvhura zokugusira po makongo, posipito soyikorogo,*
11 Vaisraeli navenye ngava moneka komeho zaKarunga gwawo Jehova kevango eli nga horowora, makura ngomu va resere navenye Veta yipo ngava zi zuvhe.
12 Ngomu tantere vagara, vakadi, vanona ntani novanayirongo ava va tunga moyitata yeni* va ponge, yipo ngava purakene va lironge kuhamena Karunga gweni Jehova, va mu tjire ntani va limburukwe nonkango nadinye domoVeta ezi.
13 Makura vana vawo ava va dira kudiva Veta ezi, ngava purakena ntani ngava lironga omu nava tjira Karunga gwawo Jehova siruwo nasinye esi ngomu paruka mosirongo esi ngomu pinga, konyima zokuruta mukuro gwaJorodana.”
14 Makura Jehova ta tantere Mosesa asi: “Ove ntaantani o fe. Zigida Josuwa mu ze konkongoronzugo,* yipo ni ka ninke Josuwa a kare mupitisili.” Makura Mosesa naJosuwa tava zi konkongoronzugo.
15 Ano Jehova ta moneka konkongoronzugo mongundi zeremo, ano ngundi zeremo tazi sikama pevero lyonkongoronzugo.
16 Jehova ta tantere Mosesa asi: “Ove ntaantani o fe ntani vantu ava kapi ngava limburukwa nge, nye awo ngava karera yikarunga yapeke* eyi ya kara mosirongo esi vana kuza. Awo ngava siga nge ntani kapi ngava sikisa mo egwanekero eli na tura po kumwe nawo.
17 Makura ame ngani va handukira unene ntani ngani va siga. Ame kapi ngani va vatera* dogoro ngava va zonagure po. Ano konyima awo ngava ligwanekera nomaudigu ntani ngava tanta asi: ‘Ose kuna kuligwanekera nomaudigu aga morwa Karunga mwato mokatji ketu.’
18 Ame kapi ngani va vatera,* morwa yininke yoyidona eyi va rugana, awo kwa karera yikarunga yapeke.
19 “Tjangeni rusumo oru, ngomu ru ronge Vaisraeli. Va rongeni rusumo oru, yipo nga ru va diworokese eyi nava tanterere.
20 Konyima zapa ngani va twara mosirongo esi sa zura masini nousi, esi na tumbwidira ozinyakurwawo, makura ngava lye dogoro va kute ntani yi va tompoke,* awo ngava karera yikarunga yapeke, kapi ngava fumadeka nge ntani ngava teza po egwanekero lyange.
21 Apa ngava ligwanekera nomaudigu gomanzi, rusumo oro nga ru va diworokesa eyi nava tanterere (ruvharo rwawo kapisi nga ru divare rusumo oro), yeeyi ame na diva eyi vana hara kurugana nampili komeho ni tokore kuvatwara mosirongo esi nava tumbwidira.”
22 Makura Mosesa ta tjanga rusumo ezuva olyo, konyima ta ru rongo Vaisraeli.
23 Age* ta tura Josuwa munaNunu a kare mupitisili, ta mu tantere asi: “Kara nouradi ntani kora, yeeyi ove nyove ngo twara Vaisraeli mosirongo esi na va tumbwidira ntani ame ngani kara nove nkenye apa.”
24 Apa ga mene Mosesa kutjanga nonkango nadinye doVeta mobuke,
25 ta tantere Varevhi ava ava simbi sikesa saJehova segwanekero asi:
26 “Guseni buke ezi zoVeta, mu zi ture konontere dosikesa saJehova segwanekero. Nsene ngomu zona, age nga zi ruganesa a mu diworokese eyi ga mu tanterere.
27 Yeeyi ame na yi diva asi one kapi omu zuvhu ntani ndino. Mokumona asi one kapi mwa limburukwa Jehova siruwo esi na kere none, eyi kulikida asi ngomu zona unene apa ngani fa!
28 Tantereni masimbi nagenye gomomarudi geni novapitisili va ponge, yipo ni va tantere nonkango edi, ano eguru nevhu kuna kara nombangi dawo.
29 Ame nayi diva asi apa ngani fa, one ngomu rugana yininke yoyidona ntani kapi ngomu sikisa mo eyi na mu tantera. Ano one ngomu ligwanekera nomaudigu komeho, yeeyi one ngomu rugana yininke eyi a tara Jehova asi yidona ntani ngomu mu handukisa eyi ngomu rugana nomawoko geni.”
30 Makura Mosesa ta ruguruka nonkango domorusumo oro, kutunda ketameko dogoro kouhura yipo va di zuvhe Vaisraeli:
Nonkango dokonhi
^ MoRuhebeli asi “kapi tani vhuru kuza nokutengura.”
^ Ndi “mataratara.”
^ MoRuhebeli asi “momarungavero geni.”
^ Ndi “tende zokupongera.”
^ Ndi “ngava hondera noyikarunga yapeke.”
^ MoRuhebeli asi “ame ngani va horekera sipara sange.”
^ MoRuhebeli asi “ame ngani va horekera sipara sange.”
^ MoRuhebeli asi “nokuneta.”
^ Kumoneka asi kwa tamba kwaKarunga.
