Deuteronomium 1:1-46
1 Mosesa kwa uyungire noVaisraeli navenye apa va kere momburundu momukunda gwaJorodana, momazana aga ga livyuka naSufa, pokatji kaParani, Tofeli, Rabani, Haseroto naDisahaba.
2 Kutunda koHoreba o ze koKadesi-baraneya kugusa mazuva 11, nsene o genda nzira ezi za vyuka koNdundu zaSeire.
3 Mosesa kwa tanterere Vaisraeli* nayinye eyi ga mu pangerere Jehova ava tantere mezuva lyokuhova lyokwedi 11 momvhura zau-40.
4 Eyi kwa horokere konyima zapa ga fundire Sihoni hompa goVaamoli, ogu ga tungire moHesiboni ntani naOgo hompa gwaBasani ogu ga fundire moEdereyi. Hompa Ogo kwa tungire moAsitaroti.*
5 Mosesa kwa fatwilire Veta momukunda gwaJorodana mosirongo saMowaba. Age kwa tente asi:
6 “Karunga gwetu Jehova kwa tu tanterere momukunda gwaHoreba asi: ‘One kwa kara momukunda ogu gonondundu siruwo sosire.
7 Katukeni mu ze komukunda gonondundu goVaamoli ntani konomukunda nadinye edi da kara pepi: Araba, mukunda gonondundu, Sefera, Negebu ntani komukunda gokonontere defuta; aso sirongo soVakanani. Zendeni koLibanoni ntani dogoro komukuro gomunene gwaEufurata.
8 Ame kwa mu pa sirongo esi. Zendeni mu ka guse sirongo esi ga tumbwidilire Jehova ozinyakurweni Abirahamu naIsaka naJakopo asi nga si va pa kumwe noruvharo* rwawo.’
9 “Ntani ame kwa mu tanterere asi: ‘Kapi tani vhuru kumupitisira nyamelike.
10 Karunga gweni Jehova kwa mu vhukisa, ano ngesi one muvanzi ngwendi nombungururu dekeguru.
11 Ngano Jehova Karunga gozinyakurweni a mu vhukise yikando mayovi ntani a mu tungike ngwendi moomu ga mu tumbwidira.
12 Ame kapi tani vhuru kukohonona po maudigu geni nyamelike ntani one kusivana unene.
13 Horoworeni momarudi geni vagara wonondunge wokuhuguvara ntani ava va kara noudivi, makura ame ngani va ninka va mu pitisire.’
14 One yiyo mwa tanterere nge asi: ‘Eyi ono tu tantere tu rugane yiwa.’
15 Makura yipo na ninkire masimbi gomomarudi geni, ava va kara nonondunge noudivi, va mu pitisire. Vamwe ngava pitisire vantu eyovi, vamwe vantu efere, ano vamwe vantu nomurongo ntano ntani vamwe vantu murongo, ano vamwe kwa va horowere va mu pitisire.
16 “Posiruwo oso, ame kwa tanterere vapanguli veni asi: ‘Nsene Vaisraeli vakweni tava mu retere udigu, yi kare asi udigu owo kuna kara pokatji koVaisraeli vavali ndi pokatji koMuisraeli nomunayirongo, mwa hepa kuupangura pauhunga.
17 Mwa ha hama komuntu gumwe, a kare asi muntu ogo ga divikwa ndi kapi ga divikwa. Mwa ha tjira vantu, yeeyi one kupangwira po Karunga ano nsene kapi muna kuvhura kupangura udigu, mwa hepa kuureta kwange, ame ngani u pangura.’
18 Posiruwo oso, ame kwa mu tanterere nayinye eyi nomu rugana.
19 “Makura tatu tundu momukunda gwaHoreba tu pite momburundu zonene zokutjilisa ezi mwa mwene apa twa zire momukunda gonondundu goVaamoli, ngwendi moomu ga tu pangerere Karunga gwetu Jehova, makura tatu ka sika moKadesi-baraneya.
20 Makura yipo na mu tanterere asi: ‘Muna siki momukunda gonondundu goVaamoli ogu ana kutupa Karunga gwetu Jehova.
21 Karunga gweni Jehova ana mu pe sirongo esi. Zendeni mu ka si guse ngwendi moomu ga mu tantera Jehova Karunga gozinyakurweni. Mwa ha tukuka ndi mu tjire yuma.’
22 “Nye namuvenye yipo mwa wizire kwange to mu tantere nge asi: ‘Ninka tu tume vagara va ka tare sirongo, ngava ya tu tantere asi nzira musinke natu pita ntani nomu ya fana yitata eyi ya kara mo.’
23 Alyo kwa kere egano lyewa, yiyo na horowere vagara 12. Ame kwa gusire mugara gumwe mwankenye rudi.
24 Awo yiyo va zire momukunda gonondundu, tava ka sika moMuramba gwaEsikoli, makura tava ka tara sirongo.
25 Awo kwa ka simbire enyango limwe lyomosirongo oso ntani kwa ya tu tanterere asi: ‘Sirongo esi ana kutupa Karunga gwetu Jehova siwa.’
26 Nye one kwa nyokere kuza mosirongo oso ntani kapi mwa limburukwire Karunga gweni Jehova.
27 One kwa sivanene monotende deni, tomu tanta asi: ‘Jehova ga tu nyenga yiyo ga tu gusira mosirongo saEgipite, a tu gave koVaamoli va tu zonagure po.
28 Kapi tuna hara kuza kosirongo oso. Vakwetu kwa tu ninkisire tu kare nowoma pokututantera asi: “Vantu vamo nonkondo ntani vare kutupitakana ntani yitata yawo yinene, ayo hena kwa yi kundurukida makuma gomare, ntani ose kwa ka mwene womoruvharo rwaAnaki.”’
29 “Ame yiyo na mu tanterere asi: ‘Mwa ha tukuka ndi mu tjire yuma.
30 Karunga gweni Jehova nga mu rwira po ngwendi moomu ga yi rugene komeho zeni moEgipite.
31 One hena mwa mwene omu Karunga gweni Jehova ga mu simbire momburundu, ngwendi moomu a simbi mugara munendi, nkenye oku mwa zire dogoro tomu ya siki mosirongo esi.’
32 Nye nampili ngoso, kapi mwa pulire mwaKarunga gweni Jehova,
33 ogu ga pitire komeho zeni a ka papare evega oku nomu dika kamba zeni. Age kwa mu monekerere momundiro masiku, ano mutenya meremo, yipo a mu likide nzira ezi nomu genda.
34 “Jehova ga zuvhire eyi mwa uyungire, yipo ga handukire unene makura ta gana asi:
35 ‘Kwato mugara mokatji kovantu* ava wovadona nga mona sirongo sosiwa esi na tumbwidira ozinyakurweni asi ngani si va pa.
36 Karebu munaJefune gelike nga si mona ntani ame ngani mu pa novana vendi sirongo esi ga ka tere, morwa age kwa limburukwa Jehova nomutjma nagunye.*
37 (One kwa ninkisire hena Jehova a handukire nge name, yipo ga tanterere nge asi: “Nove kapi ngo za mo.
38 Mukareli goge Josuwa munaNunu yige nga za mosirongo. Mu nkondopeka,* yeeyi yige nga pitisira Vaisraeli va ka pinge sirongo.”)
39 Ano vana veni ava va dira kudiva uwa ndi udona, ava mwa tente asi ngava va mu hakana, yiwo ngava za mosirongo oso ntani ame ngani si va pa, va si pinge.
40 Nye one tengureni mu ze momburundu, mu pite nzira zEfuta lyEgeha.’
41 “Makura yiyo mwa tanterere nge asi: ‘Ose twa zona kwaJehova. Ngesi tatu zi tu ka rwe, ngwendi moomu ga tu tantera Karunga gwetu Jehova,’ makura namuvenye yiyo mwa gusire yirwiso yeni, morwa kwa gazarere asi nayi rerupa kuronda kondundu mu ka rwe.
42 Nye Jehova kwa tanterere nge ni mu tantere asi: “Mwa ha za mu ka rwe, yeeyi ame kapi nani kara none. Nsene nomu za, nonkore deni nadi ka mu funda.”
43 Makura yiyo na mu uyungisire, nye one kapi mwa purakenene nge. One kapi mwa limburukwire Jehova, tomu rondo kondundu.
44 Makura Vaamoli ava va tungire momukunda gonondundu tava wiza va ya mu gwane, tava mu tjida ngwendi nonyiki. Awo kwa mu tjidire dogoro koSeire nokoHoroma.
45 Yiyo mwa tengwire, tomu lilire Jehova, nye Jehova kapi ga mu purakenene ndi a mu pakere mbili.
46 Eyi yiyo mwa karerere moKadesi siruwo sosire.
Nonkango dokonhi
^ MoRuhebeli asi “vana vaIsraeli wovagara.”
^ Ndi nampo asi “ntani Ogo hompa gwaBasani ogu ga tungire moAsitaroti ntani moEdereyi.”
^ MoRuhebeli asi “mbuto.”
^ MoRuhebeli asi “gepupi.”
^ MoRuhebeli asi “nawa-nawa.”
^ Ndi nampo asi “Karunga ga mu nkondopeka.”
