Mbilive zauvali kwaTimoteusa 3:1-17
3 Ove diva asi pomazuva gopouhura, ngapa kara yiruwo yoyidigu.
2 Yeeyi vantu ngava lihara tupu vene, ngava dowokera yimaliwa, ngava likanganga, ngava linenepeka, ngava swaura Karunga, kapi ngava limburukwa kovakurona vawo, kapi ngava kara norupandu, ngava siga vakwawo,*
3 kapi ngava kara neharo, kapi ngava lizuvha novakwawo, ngava kara varundili, kapi ngava lipangera, ngava kara wonyanya, ngava nyenga yoyiwa,
4 ngava gombeka vakwawo, ngava kara ndino, ngava litumba, ngava kondjera kulihafesa vene mevango lyokuhafesa Karunga,
5 ngava moneka ngwendi vakareli vaKarunga, nye kapi ngava sikisa mo ukareli wawo, o likare ure novantu vangoso.
6 Mokatji kowo yimo ava tundu vagara woyineya* ava ava bubagura momambo va kwate vakadi ava da dira nonkondo, va kara nononzo. Vakadi owo kuvapangera madowo gokulisiga-siga,
7 awo kulironga nye kapi ava kwata nawa-nawa egano ediwo lyousili.
8 Vagara owo kurwanesa usili ngwendi moomu Janesi naJamburesi ngava rwanesa Mosesa. Vagara owo kwa kara nomagazaro gepuko ntani Karunga kapi ga va hafera morwa kapi va kara nepuro.
9 Nye awo kapi ngava za ntando yeeyi ugova wawo ngau lihorora kwanavenye ngwendi moomu ya horokerere Janesi naJamburesi.
10 Nye ove kwa honena nawa-nawa erongo lyange nomparukiso zange nositambo sange nepuro lyange nedidimiko lyange neharo lyange ntani noulimburukwi wange.
11 Ove hena wa diva mahepeko nomaudigu aga na ligwanekerere nago moAntiyokiya nomoIkoniya ntani moLisitira. Ame kwa lididimikilire mahepeko aga ntani Hompa kwa yoworora nge mo mwanagenye.
12 Ano navenye ava va tokora kukarera Karunga nokukara mouumwe naJesus Kristusa, nawo ngava va hepeka.
13 Vadinikarunga novakumbageli, udona wawo ngau pitakanena, awo ngava va pukisa ntani nawo ngava pukisa wopeke.
14 Nye ove twikira kukwama eyi wa lironga, eyi va kuvatera o pure morwa wa diva ava va yi kuronga
15 ntani ove wa diva matjangwa gokupongoka kutunda ukeke woge, aga ngaga kupa unongo ngo paruke morwa wa kara nepuro mwaJesus Kristusa.
16 Nayinye eyi va tjanga moMatjangwa gokupongoka kwa tunda kwaKarunga, ago kuronga vantu nokuvalikida asi yipi yepuko ntani kuvapukurura nokuvyukisa magazaro gawo kuliza nonompango daKarunga,
17 yipo muntu gwaKarunga a wapere nokuvhura kusikisa mo yirugana nayinye yoyiwa.
