Mbilive zauvali kwaTimoteusa 1:1-18
1 Ame Paurusa, mupositoli gwaJesus Kristusa ogu va horowora keharo lyaKarunga yipo ni udise kuhamena etumbwidiro lyomwenyo kupitira mwaJesus Kristusa, kuna kukutumina mbilive
2 ove Timoteusa, munange gokuhara:
Karunga Guhya ntani naHompa gwetu Jesus Kristusa ngano va ku fire nkenda unene nokukupa mbili.
3 Tani pandura Karunga ogu ani karere nezwi lyewa lyokomutjima ngwendi moomu ngava yi rugana ozinyakurwetu. Ame kukudiworoka nkenye apa ani likwambere kwaKarunga masiku nomutenya.
4 Apa ani diworoka mahodi goge, ame kuhara unene asi ni ku mone yipo ni hafe unene.
5 Yeeyi ame kudiworoka epuro lyoge lya hana uyilipaki eli va kere nalyo omama woge wovakadi Roise nonane woge Eunike, nina kara nehuguvaro asi nove wa kara nepuro lyangoso.
6 Yipo nye, tani kudiworokesa o ruganese uhwi waKarunga noupampi ngwendi mundiro guna hwama, uhwi ou wa gwene apa na ku kambekere mawoko.
7 Yeeyi Karunga kapi ga tu pa mpepo zowoma, nye zononkondo, zeharo ntani zonondunge.
8 Walye o lifu nomuga kuzuvhisa kuhamena Hompa gwetu ndi o fe nge nomuga, nye liwapaikira mokuhepera mbudi zongwa pokuhuguvara mononkondo daKarunga.
9 Age kwa tu parura yiyo ga tu zigida tu kare vapongoki, kapisi morwa yirugana yetu, nye morwa sitambo sendi nonkenda zendi zonene. Age kwa zi tu likida kupitira mwaJesus Kristusa nare-nare,
10 nye azo ngesi kuna kuzilikida nawa-nawa mehoroko lyoMuzowoli gwetu Jesus Kristusa, ogu ga hagekesa po nomfa ntani noku tu horwera kupitira mombudi zongwa omu natu gwana eparu norutu rokudira kuzonauka.
11 Ame kwa ninka nge ni kare muzuvhisi nomupositoli ntani murongi nositambo sokudivisa mbudi zongwa.
12 Yininke eyi yiyo nina kuhepera, nye ame nokulifa si nomuga. Yeeyi na diva ogu na pura ntani na yi huguvara asi age nga takamesa nayinye eyi na mu huguvarera dogoro apa ngali sika mo ezuva.
13 Kwaterera kosihonena sononkango donongwa edi wa zuvha kwange ngomu ono kulikida epuro neharo eli wa kara nalyo, morwa kukara mouumwe naJesus Kristusa.
14 Takamesa nawa yininke yomulyo eyi wa gwana kupitira mompepo zokupongoka ezi za kara mwetu.
15 Ove wa yi diva asi vantu navenye womomukunda gwaAsiya va zumba nge, kukwatera mo Figerusi naHeremogenesi.
16 Hompa Karunga ngano a fire nkenda vemembo lyaOnesiforusi, yeeyi age nga korangeda nge ntani age kapi ga lifire nomuga kweyi na kere monomango.
17 Ntani hena, apa na kere moRoma, age kwa paparere nge dogoro ta gwana nge.
18 Hompa Jehova ngano nga mu fire nkenda apa ngali sika mo ezuva. One hena mwa diva nawa yirugana nayinye eyi ga rugana moEfeso.
