Samwere gwauvali 21:1-22
21 Pomazuva gaNdafita, mosirongo kwa kere mo erumbu ure wonomvhura ntatu, makura Ndafita ta kanderere kwaJehova, ano Jehova ta mu limburura asi: “Sauru nepata lyendi kwa kara nousima wedipago, morwa age kwa dipagere Vangibiyoni.”
2 Makura hompa ta zigida Vangibiyoni a uyunge nawo. (Vangibiyoni kwa kere Vaamoli nye kapisi Vaisraeli. Vaisraeli kapi va tjidire mo Vaamoli mosirongo morwa awo kwa va tumbwidilire asi kapi ngava va dipaga. Nye Sauru kwa here a va dipage yipo a vatere Vaisraeli novantu womorudi rwaJuda.)
3 Makura Ndafita ta pura Vangibiyoni asi: “Yisinke nani mu ruganena yipo ni guse Vaisraeli usima wedipago, ngomu tungike upingwa waJehova?”
4 Vangibiyoni tava mu tantere asi: “Ngorodo nosisiliveli kapi tayi vhuru kugusa po eyi ga tu rugana Sauru nepata lyendi ntani kapi tatu vhuru kudipaga muntu moIsraeli.” Makura Ndafita ta tanta asi: “Ame nani mu ruganena nkenye eyi nomu tanta.”
5 Awo tava tantere hompa asi: “Mugara ogu ga here a tu dipage natuvenye ntani a divilise asi kwato gumwe gwetu ogu ana kuparuka moIsraeli. . .
6 tu pa vana vendi ntambali. Ose ngatu va dipaga ntani ngatu mangerera yimpu yawo koyitji* komeho zaJehova moGibeya zaSauru, ogu Jehova ga horowere.” Makura hompa ta va tantere asi: “Nani va mu pa.”
7 Nye hompa ta fire nkenda Mefiboseti munaJonatana zaSauru, yeeyi age kwa tulire po mugano kumwe naJonatana munaSauru komeho zaJehova.
8 Makura hompa ta gusa Arumoni naMefiboseti vana vaSauru, ava ga reterere pwaLisipa munaAiya ntani novana wovagara vatano vaMikali* munaSauru, ava ga retere naAdiliyeli. Adiliyeli kwa kere munaBarasirayi gomoMehora.
9 Makura tava gava koVangibiyoni, awo tava va dipaga ntani tava zenzeresa yimpu yawo kondundu komeho zaJehova. Navenye ntambali kwa fire kumwe; awo kwa va dipagere pomazuva gokuhova gokuzangura, posiruwo esi ava tameke kuzangura mbuto.*
10 Makura Lisipa munaAiya ta gusa nsako ta ka zi zara kemanya, ta kara kooko kutunda apa va tamekere kuzangura dogoro mvhura tazi tameke kuroka. Age kwa yingire yidira mutenya yipo yi dire kutembera poyimpu oyo ntani kwa tjidire yikorama masiku yipo yi dire kuhedera pepi noyimpu.
11 Ndafita tava mu tantere eyi ga rugene Lisipa sihora* saSauru. Lisipa kwa kere munaAiya.
12 Makura Ndafita ta zi a ka simbe yisupa yaSauru neyi yamunendi Jonatana kovapitisili womoJabesi-giliyata. Awo kwa veke yimpu yawo eyi va mangerere Vafilisiti pevango eli ava pongere vantu moBete-sani. Vafilisiti kwa zenzeresere Sauru naJonatana mezuva eli va dipagere Sauru moGiliboa.
13 Ndafita kwa ka simbire yisupa yaSauru neyi yamunendi Jonatana ntani kwa ninkire hena vantu va pongaike yisupa yovagara ava va dipagere.*
14 Makura tava horeke yisupa yaSauru neyi yamunendi Jonatana mosirongo sorudi rwaMbenyameni moSera. Awo kwa yi horekere montoko zoguhwe Kisi. Ano konyima zapa va rugene eyi ga va pangerere hompa, Karunga ta rugana eyi va mu hundilire kuhamena sirongo sawo.
15 Vafilisiti noVaisraeli tava ru hena yita. Makura Ndafita novakareli vendi tava zi va ka rwise Vafilisiti, nye Ndafita kwa rorokere unene.
16 Mugara gomoruvharo roVarefa gedina Isebi-benobu kwa kere negonga lyongoporo lyonokilograma 3,42* ntani kwa kere norufuro rorupe yipo a dipagese ko Ndafita.
17 Makura Abisayi munaSeruya ta wiza a ya vatere Ndafita ntani ta dipaga Mufilisiti ogo. Posiruwo oso vantu vaNdafita tava gana asi: “Kapi tuna hara ramba zaIsraeli ngava zi dimise! Yipo nye, kapisi ngo ze hena nose koyita!”
18 Konyima, Vaisraeli tava ru hena yita noVafilisiti moGobo. Posiruwo oso, Sibekayi gomoHusa ta dipaga Safa gomoruvharo roVarefa.
19 Vaisraeli tava ru hena yita noVafilisiti moGobo, ano Elihanani munaJaire-oregimu gomoBeterehema ta dipaga Golyata gomoGata, ogu ga kere negonga eli lya kere nositji esi sa fene ngwendi nkambo ezi ava honzere.
20 Konyima, tava ru hena yita moGata omu ga kere mugara getundusika. Age kwa kere nononyara ntazimwe komawoko gendi nagenye nokonompadi dendi. Sivaro sado kwa kere 24 ntani nage kwa kere gomoruvharo roVarefa.
21 Age kwa swawire Vaisraeli, makura Jonatana munaSimeyi ta mu dipaga. Simeyi kwa kere mukurwaNdafita.
22 Vagara navenye ava vane kwa kere womoruvharo roVarefa ntani awo kwa tungire moGata. Awo kwa va dipagere Ndafita novakareli vendi.
Nonkango dokonhi
^ MoRuhebeli asi “ngatu va tura poruzera (nokuteza mawoko nomaguru gawo).”
^ Ndi nampo asi “vaMerabu.”
^ Kwa tamba kombuto zokufana ngwendi rukokotwa.
^ Tara koMauzera.
^ MoRuhebeli asi “ava va tulire poruzera.”
^ MoRuhebeli asi “ronoshekel 300.” Tara App. B14.
