Vakolinte wokuhova 9:1-27
9 Nani kapi na manguruka? Nani ame kapisi mupositoli? Nani kapi na mona Jesus Hompa gwetu? Nani one kapisi yitundwamo yosirugana sange mwaHompa?
2 Nampili ngomu na dira kukara mupositoli kwava wopeke, kweni ame mupositoli. Yeeyi one nyone sinongweneso sange asi ame mupositoli mwaHompa.
3 Kwava ava pangura nge tani va pura asi
4 nani kapi va tu pulisira* kulya nokunwa ndi?
5 Nani kapi va tu pulisira kukwara vakadi wovapuli noku za nawo mosirugana setu ngwendi vapositoli vakwetu novamumbya vaHompa Jesus naKefasa?*
6 Ndi name tupu naBaranabasa wokuvhura kurugana yipo tu paruke?
7 Yilye ogu ga kara rumwe mukwayita moyimaliwa yamwene? Yilye a tapeke sindjembere a dire kulya ko kenyango lyaso? Ndi yilye a lisa siunda a dire kulya mo masini?
8 Kapi nina kuuyunga yininke eyi kuliza nomagazaro govantu nye Veta nazo za yi uyunga, ndi kapisi yimo?
9 Yeeyi Veta zaMosesa kwa tanta asi: “Walye o manga ntwedu kokana apa azi hwaga mbuto.” Nontwedu sili ga tembe Karunga ndi?
10 Ndi age kwa yi uyungilire eyi mwarwetu? Ayo mwarwetu va yi tjangera morwa mugara ogu a purura nogu a hwaga kuyiruganena yipo a gwane mfeto.
11 Nsene asi ose twa kuna yininke yaKarunga mweni, kapi nayi wapa nsene tu mu pura mu tu kwafe ndi?
12 Nsene asi wopeke kugwana ekwafo kweni, nani ngano kapisi nyose nomu kwafa po unene? Nampili ngoso, ose kapi twa yi rugana oyo, nye ose kwa lididimika mwanayinye yipo tu dire kudonganesa mbudi zongwa zokuhamena Kristusa.
13 Kapi mwa diva asi ava ava rugana yirugana yomontembeli kulya eyi ya hamena kontembeli ndi? Ntani kapi mwa diva asi ava ava rugana kosizambero kugwana eyi ya va tumbukira?
14 Monkedi zangesi, Hompa kwa pangerere ava ngava udisa mbudi zongwa va parukire mombudi zongwa.
15 Nye ame kapi na ruganesa mawapaiko ogo. Ame kapi na tjangera yininke eyi asi yipo ngomu yi ruganene nge, yeeyi hansa kwange kufa kupitakana kugusa nge unankondo wange wokulikangangera sirugana esi.
16 Nsene tani zuvhisa mbudi zongwa, kapi na hepa kulikanganga, yeeyi aso situmbukira va pa nge. Nye nane vakwetu nsene ni dira kuzuvhisa mbudi zongwa!
17 Nsene ni yi rugana nomutjima nagunye, ngani gwana mfeto nye nsene ni dira kuyirugana nomutjima nagunye, simpe na kara nositumbukira esi va pa nge.
18 Mfeto musinke nye ngani gwanena po? Mfeto zange kuna kara kuzuvhisa mbudi zongwa na hana kugwanena mo yuma. Monkedi ezi kapi ngani mu pura eyi mwa fira kupa nge mokuzuvhisa mbudi zongwa.
19 Nampili ngomu na manguruka kovantu navenye, ame kwa lininka nyamwange ni kare mupika gwanavenye yipo ni vatere vantu wovanzi.
20 KoVajuda ame ngwendi Mujuda yipo ni vatere Vajuda, ano kwava ava kwama veta name yiyo na kara ngwendi gogu a kwama veta nampili ngomu ani dili kukwama veta, yipo ni vatere ava ava kwama veta.
21 Kwava ava dili kukwama veta, ame kwa ya kara ngwendi gogu a dili kukwama veta, yipo ni va vatere, nampili ngomu ame ani kwama veta zaKristusa.
22 Kwava va dira nonkondo, name ngwendi gogu ga dira nonkondo. Ame kwa liza nawo mwanayinye, yipo ni vatere po nampili vamwe.
23 Nye ame kuyiruganena eyi morwa mbudi zongwa, yipo ni tantere ko wopeke mbudi ezi.
24 Kapi mwa yi diva asi vaduki navenye kuduka momarumbasano nye gumwe tupu a gwana po mfeto ndi? Dukeni monkedi ezi nazi mu ninkisa mu ka gwane mfeto.
25 Nkenye ogu a lihameke momarumbasano* kulipangera mwanayinye. Awo kuyiruganena va ka gwane mfeto ezi azi dili kukarerera nye ose kuyiruganena tu ka gwane mfeto ezi azi karerere.
26 Yipo nye asi ame kapi nina kuduka na hana sitambo, kapi nina kutoona nonyongo ngwendi googu ana kutoona mompepo
27 nye ame kupangera* rutu rwange ngwendi moomu ava pangere mupika, yipo asi apa ngani mana kuzuvhisira wopeke, Karunga nga dire kunyoka nge.
Nonkango dokonhi
^ MoRugereka asi “nonkondo.”
^ Eli edina limwe hena lyomupositoli Peturusa.
^ Ndi “nkenye muduki.”
^ Ndi “kutengeka.”
