Samwere gokuhova 22:1-23
22 Kutunda opo, Ndafita ta tjwayukire mekombombo lyomoAduramu. Apa va yi zuvhire vakuru vendi nepata lyoguhwe, tava zi va ka mu gwane.
2 Vantu navenye ava va kere noudigu nava va kere nomakongo ntani ava va guvire, kwa zire kwendi ava pitisire. Sivaro sovagara owo kwa kere 400.
3 Konyima, Ndafita ta zi koMisipa moMowaba, ta ka tantera hompa gwaMowaba asi: “Pulisira oyina notate va kare kumwe nove dogoro ngani dive eyi nga ruganena nge Karunga.”
4 Makura Ndafita ta sigi vakondi vendi va kare nahompa gwaMowaba ntani awo kwa kere nage siruwo nasinye esi ga kere Ndafita kevango eli ga ka vende.
5 Konyima, muporofete Gada ta tantere Ndafita asi: “Tunda mevango eli ono vanda o ze kosirongo sorudi rwaJuda.” Makura Ndafita ta katuka ta zi momusitu gwaHereti.
6 Sauru ta zuvhu asi Ndafita novakwayita ava ga kere nawo vana va gwana. Posiruwo oso, Sauru kwa kere moGibeya ntani kwa hingilire mositji sotamalisiki kondundu. Age kwa kwatererere egonga, awo vakareli vendi vana mu kundurukida.
7 Makura Sauru ta tantere vakareli vendi ava va mu kundurukidire asi: “Purakeneni one womorudi rwaMbenyameni. Ngoso munalsayi kuvhura nage nga mu pe namuvenye mapya noyikunino yomandjembere ndi? Age kuvhura a mu ture mu pitisire vantu mayovi novantu mafere ndi?
8 Namuvenye kwa genda nge konhi. Kwato ogu ga tanterere nge apa ga tulisire po munange egwanekero* namunalsayi. Kwato ogu ga hara nge mokatji keni, morwa kapi mwa tantera nge asi munange ga ninkisa mukareli gwange a rwanese nge ngwendi moomu yina kuhoroka neina.”
9 Makura Doyegi goMuedomu ogu ga pitisilire vakareli vaSauru, ta limburura asi: “Ame na mwene munalsayi apa ga wizire moNobo kwaAhimereki zaAhitubu.
10 Ahimereki kwa pulire Jehova yipo a vyukise Ndafita ntani kwa mu pere nondya. Age kwa mu pere hena rufuro rwaGolyata goMufilisiti.”
11 Makura Sauru ta tumu vantu va ka zigide mupristeli Ahimereki zaAhitubu ntani vapristeli navenye vemembo lyoguhwe ava va kere moNobo, makura navenye tava zi kwahompa.
12 Sauru ta tanta asi: “Purakena ove munaAhitubu!” Makura Ahimereki ta limburura asi: “Kuna kupurakena hompa gwange.”
13 Sauru ta tanta asi: “Morwasinke mwa gendera nge konhi nove namunalsayi? Ove kwa mu pere nomboroto norufuro ntani yiyo wa pulire Karunga a mu vyukise. Age kurwanesa nge ntani kuvandera nge yipo a homokere nge, ngwendi moomu yina kuhoroka ngesi.”
14 Makura Ahimereki ta limburura asi: “Kwato mukareli goge ogu wa huguvara* ngwendi Ndafita. Age tamweyi zoge ntani yige a pitisire vantu ava ava kutakamesa. Age hena kwa mu fumadeka membo lyoge.
15 Esi kapisi sikando sokuhova kani mu pulilire ko kwaKarunga a mu vyukise. Ame kapi tani vhuru kukurwanesa! Hompa, wa ha pa nge usima ame mukareli goge nepata lyotate, yeeyi kapi nina diva eyi yina kuhoroka.”
16 Nye hompa ta tanta asi: “Naina to fu kumwe novantu navenye vemepata lyoguho.”
17 Makura hompa ta tantere vakwayita* ava va mu kundurukidire asi: “Dipageni vapristeli vaJehova, yeeyi awo kwa kwatesa ko Ndafita. Awo va yi divire asi Ndafita kwa tjwayuka, nye kapi va tanterere nge.” Nye vakareli vaSauru kapi va here kudipaga vapristeli vaJehova.
18 Makura hompa ta tantere Doyegi asi: “Zende o ka dipage vapristeli.” Makura Doyegi goMuedomu ta zi a ka dipage vapristeli. Mezuva olyo, age kwa dipagere vagara 85 ava va dwere yikoverero yopomapepe.
19 Age kwa homokerere hena sitata sovapristeli saNobo ntani age kwa dipagere norufuro vagara, vakadi, vanona, vakeke, nontwedu, yindongi ntani nonzwi.
20 Nye munaAhimereki zaAhitubu gedina Abiyatara ta henduka, ta dukire kwaNdafita.
21 Abiyatara ta ka tantera Ndafita asi: “Sauru ana dipaga vapristeli vaJehova.”
22 Makura Ndafita ta tantere Abiyatara asi: “Apa na mwene Doyegi ezuva lina, ame na yi divire asi ta ka tantera Sauru. Nyame nina hwedesa vantu navenye vemepata lyoguho va va dipage.
23 Kara kumwe name ntani wa ha tjira, yeeyi nkenye ogu ana hara kukudipaga nyame ana hara kudipaga. Ame ngani kupopera.”
