Yoane vuandaka mbikudi ya Nzambi. (Luka 1:76) Yandi butukaka kaka tekila nsuka ya siekle ya ntete T.N.B. mpe yandi zingaka na siekle ya ntete N.B. Nzambi pesaka yandi kiyekua ya kubongisa nzila samu na Masiya, to Klisto. Yoane salaka yau na kusamunaka nsangu ya Nzambi na bampangi na yandi Bayuda samu bavutula bantima na bau na Nzambi.—Marko 1:1-4; Luka 1:13, 16, 17.

 Nsangu ya Yoane sadisaka bantu ya mbote yina vuandaka kuwa yandi samu bazaba ti Yesu ya Nazareti kele Masiya yina lakamaka. (Matayo 11:10) Yoane kindisaka bantu yina vuanda kuwa yandi babalula ntima na masumu na bau mpe babaka mbotama lokola kidimbu ya kubalula ntima na bau. (Luka 3:3-6) Lokola yandi pesaka bantu mingi mbotama, Yoane kumaka kubokudulua Mbotiki. Mbotama yina meluta mfunu yina Yoane pesaka vuandaka yina ya Yesu. a—Marko 1:9.

Na disolo yayi

•  Yinki suasikisaka Yoane Mbotiki na bantu yankaka?

•  Banani vuandaka bibuti ya Yoane Mbotiki?

•  Nani fuisaka Yoane Mbotiki?

•  Yoane Mbotiki mpe Yesu vuandaka welana?

•  Bantu yikua na Biblia kele na nkumbu ya Yoane?

 Basamunaka deja kisalu yina yandi fueti sala: Na nzila ya kisalu na yandi ya kusamuna, Yoane kokisaka mbikudulu yina tadilaka Nati-nsangu ya Yehova. (Malaki 3:1; Matayo 3:1-3) Yandi monisaka ti yandi kele muntu yina fueti ‘bongisila Yehova bantu yina kele ya kubongama’—yazola monisa, yandi bongisilaka bampangi na yandi Bayuda nzila samu bandima nsangu ya Yesu Klisto, monisi ya ntete ya Yehova Nzambi.—Luka 1:17.

 Kivuvu na yandi: Yesu tubaka ti, ‘yakele ve na muntu yina meluta Yoane Mbotiki na nene, kasi muntu ya fioti na Kimfumu ya dizulu kele nene kuluta yandi.’ (Matayo 11:11) Lokola Yoane vuandaka kaka ve mbikudi kasi mpe ‘nati-nsangu’ yina samunuaka, kisadi mosi ve ya Nzambi yina zingaka na ntuala na yandi lendaka luta yandi. Bampova ya Yesu memonisa diaka ti yandi kevuanda ve na kati ya bantu yina keyadila na Kimfumu ya dizulu. b Mbikudi yango ya kukuikama kufuaka tekila Klisto zibula nzila samu na bantu na kukuenda na dizulu. (Baebreo 10:19, 20) Kasi, Yoane kevuanda awa na ntoto na yinsi ya luyalu ya Kimfumu ya Nzambi, na kivuvu ya kuzinga mvula na mvula na Paradiso.—Nkunga 37:29; Luka 23:43.

 Bibuti ya Yoane vuandaka bankuelani mosi na nkumbu ya Zekaria mpe Elizabeti. Zekaria vuandaka nganga-nzambi Muyuda. Kubutuka ya Yoane vuandaka kimangu, samu mama na yandi vuandaka kisita, to yandi vuandaka na dikoki ya kubuta bana ve. Diaka, yandi na Zekaria vuandaka ‘binunu.’—Luka 1:5-7, 13.

 Ntinu Erode Antipasi lombaka bazenga Yoane yintu. Yandi salaka yau samu nketo na yandi Erodiade, lombaka na nzila ya muana na yandi ya nketo bakufua Yoane. Erodiade vuandaka yina Yoane, samu Yoane tubaka na Erode, yina vuandaka tuba ti yandi kele Muyuda, ti dikuela na yandi na Erodiade kele dikuela yina ndimama ve na bansiku ya Bayuda.—Matayo 14:1-12; Marko 6:16-19.

 Diambu mosi ve na kati ya Biblia kena kumonisa ti Yoane mpe Yesu vuandaka welana. (Yoane 3:25-30) Kutu, Yoane zabaka mbotembote ti yandi vuandaka na kiyekua ya kubongisila masiya nzila, kasi ve ya kuwelana na yandi. Yoane tubaka: ‘Munu kuizaka botika bantu na maza samu yandi monana na Yisaele.’ Mpe yandi buelaka: ‘Muntu yayi kele Muana ya Nzambi.’ (Yoane 1:26-34) Yau yina Yoane sepelaka mingi ntangu yandi kuwaka ti kisalu ya Yesu kena kubuta mbuma.