Baklisto kendimaka ti Yesu kufuaka samu na masumu ya bantu. (1 Piere 3:18) Nzokande, samu na kuvuka yasuka kaka ve na kundima ti Yesu kele mvuluzi na beto. Na kifuani, bademo mezaba ti Yesu kele ‘Muana ya Nzambi’, kasi bakevuka ve bakebebisama.—Luka 4:41; Yude 6.

•  Yinki munu fueti sala samu na kuvuka?

•  Yinki beto lenda tuba samu na “kisambu ya muntu ya masumu”?

•  Wapi kisika “kisambu ya muntu ya masumu” katukaka?

•   Ndima ti Yesu pesaka luzingu na yandi lokola nkayilu samu na masumu na beto. (Bisalu 16:30, 31; 1 Yoane 2:2) Nge fueti ndima diaka ti Yesu vuandaka mpenza muntu mpe nionso yina Biblia metuba samu na yandi kele kedika.

•   Sosa kuzaba yina Biblia kena kulonga. (2 Timoteo 3:15) Biblia metuba ntumua Paulo mpe Silasi ndimisaka nkengidi mosi ya buloko ti: ‘Ndimina Mfumu Yesu, mpe nge kevuka.’ Na manima, balongaka bakala yango ‘ mpova ya Yehova’ a (Bisalu 16:31, 32). Yau kena kumonisa ti nkengidi ya buloko lendaka ndimina mpenza Yesu ve kondua kubakusa ntete malongi ya ngudi ya Mpova ya Nzambi. Yalombaka yandi baka “nzayilu ya sikisiki” ya masonukua ya Nzambi.—1 Timoteo 2:3, 4.

•   Balula ntima. (Bisalu 3:19) Nge fueti balula diaka ntima, to kumona kiadi ya ngolo samu na mabanza ya yimbi to mambu ya yimbi yina nge salaka. Bantu yankaka kezaba ti nge mebalula ntima na mutindu nge kebika kusala mambu yina Nzambi keyinaka mpe nge kesala ‘bisalu yina kemonisa ti nge mebalula ntima.’—Bisalu 26:20.

•   Baka mbotama. (Matayo 28:19) Yesu tubaka ti bantu yina kebaka mbotama kekuma banlonguki na yandi. Nkengidi ya buloko yina beto mekatuka tubila bakaka mbotama. (Bisalu 16:33) Mutindu mosi mpe, ntangu ntumua Petelo longaka kedika samu na Yesu na bantu mingi, ‘bayina ndimaka mpova na yandi na kiese nionso bakaka mbotama.’—Bisalu 2:40, 41.

•   Zitisa malako ya Yesu. (Baebreo 5:9) Bantu yina ‘kezitisaka mambu nionso’ yina Yesu tindaka beto sala kemonisaka na luzingu na bau ti bakele banlonguki na yandi. (Matayo 28:20) Bakele ‘bantu yina kezitisaka mpova.’—Yakobo 1:22.

•   Kanga ntima tii na nsuka. (Marko 13:13) Banlonguki ya Yesu ‘fueti kanga ntima’ samu bavuka. (Baebreo 10:36) Na kifuani, ntangu ntumua Paulo kumaka Muklisto, yandi kumaka kuzitisa malongi ya Yesu mpe yandi bikanaka ya kukuikama na Nzambi ntangu nionso. Atako yandi kutanaka na banzomono, kasi yandi kangaka ntima tii na lufua na yandi.—1 Bakorinto 9:27.

 Mambundu yankaka kelongaka bantu yankaka ti basala bisambu lokola “kisambu ya muntu ya masumu” to “Kisambu ya luvulusu.” Na bisambu yango, bakendimaka ti bakele bantu ya masumu mpe bakepesaka Yesu matondo mutindu yandi kufuaka samu na masumu na bau. Bakelombaka Yesu kuiza na bantima na bau mpe yandi sala na luzingu na bau. Kasi Biblia tuba ata kisika mosi ve ti beto sala mutindu ya “kisambu ya muntu ya masumu.”

 Bantu yankaka kekanisaka ti kana bamesala “kisambu ya muntu ya masumu” bakekukindimisaka ti bakevuka samu na mvimbamvimba. Kasi kisambu yau mosi kepesaka ve kivuvu ya luvuluzu. Lokola beto kele bantu ya kukondua kukoka, beto kesalaka mbala mingi banzimbala. (1 Yoane 1:8) Yau yina Yesu longaka beto beto sambilaka mbala na mbala samu na kulomba nlemvo ya masumu na beto. (Luka 11:2, 4) Diaka, Baklisto yankaka yina vuandaka na kivuvu ya kuvuka samu na mvimbamvimba bazimbisaka kivuvu yango samu balembaka kuzitisa Nzambi.—Baebreo 6:4-6; 2 Piere 2:20, 21.

 Bantu ya mayele na istware pesa ve mvutu ya mutindu mosi na kiuvu yango. Bantu yankaka kekanisaka ti kuvuanda na kifu ya kusala “kisambu ya muntu ya masumu” bandaka ntangu dibundu ya Protestant vambanaka na dibundu ya Catholique. Bantu yankaka kekanisaka ti mabundu ya siekle ya 18 mpe ya 19 nde bandisaka mumeseno yango. Yavuanda mutindu yina to ve, Biblia lomba ve beto sala “kisambu ya muntu ya masumu.” Kutu, Biblia metuba beto bika vutukila bisambu yina mesonamaka.