Bambangi ya Yehova kena kubaka mikanda mingi yina ketubilaka Biblia mpe bavideo na nzila ya Internet kuluta bamvula meluta. Kasi na bisika mingi na yinza, bampangi na beto kele na makoki ve ya kusadila Internet. Bayankaka kevuandaka na bisika yina Internet kebebaka mingi, Internet kesalaka malembe malembe, to Internet kele kutu ve.

 Nzokande, bampangi na beto mingi lenda banda bubu yayi kutelesharje mikanda na nzila ya Internet ata kana koneksion ya Internet kele ve! Yinki mutindu yalenda salama?

 JW Box kele kisadulu mosi ya fioti yina mepesama na bimvuka yina kele na bisika yina Internet kele mpasi. Yakele na routeur mosi yina basumbaka na konpani mosi yina ketekaka bima, routeur yango bongisamaka na departema ya informatiki ya bethel, mpe mikanda na Internet, mpe bavideo na jw.org. Konso kesi yango ya JW Box kele na ntalu ya badolare pene na 75.

 Na bayinzo ya Kimfumu, bampangi kesadilaka batelefone na bau samu na kukota na JW Box na nzila ya wifi mpe baketelesharjeke mikanda mpe bavideo. Ata bayina kele na batelefone yina mekuma ya ntama mpe yina kele ya ntalu ve lenda kota. Kasi kana kimvuka mosi kele na koneksion ya Internet ve, yinki mutindu JW Box lenda kotisa mikanda ya yimpa? Filiale ketindaka mbala na mbala na bimvuka ba clés USB (flash disque) yina kele na ntalu ya badolare pene na 4 yina bamekotisa mikanda ya yimpa yina kele na jw.org mpe na manima balenda kotisa mikanda yango na JW Box.

 Yinki mutindu JW Box kena kusadisa bampangi na beto? Nathan Adruandra, tata mosi ya dibuta yina kezingilaka na République démocratique du Congo, metuba: “Mbala mingi mukemekaka kutelesharje bafilme lokola Ee Yehova, . . . natyeli yo motema mpe Kanisá mwasi ya Lota. Kasi yakesimbaka kaka ve, mpe yalembisaka munu nzutu. Bubu yayi mulenda telesharje bavideo yango na telefone na munu, mpe yakena kusadisa beto bibuti beto longa bana na beto mbote.”

 Mpangi mosi yina kesadisaka bimvuka ya Nigeria samu na kutula JW Box metuba: “Bampangi kemonaka JW Box lokola dikabu mosi ya kedika yina mekatuka na Yehova. Bubu yayi, bakele na kiese mingi ya kutelesharje na pete mikanda mpe bavideo ya bisadulu na beto ya kulonga.”

 Bakesi kuluta 1 700 tindamaka na Afrique, Oceanie, mpe Amerique du sud, mpe bankubukulu bakamaka samu na kutinda yau na bimvuka mingi yankaka. Yinki mutindu mbongo kebakamaka samu na kusala yau? Na nzila ya makabu yina kepesamaka samu na kupesa maboko na kisalu ya kusamuna na yinza ya mvimba, mingi ya makabu yango kepesamaka na nzila ya donate.jw.org. Matondo mingi samu na kikadulu na beno ya kukaba.