BENO TATAMANA KUKENGA!
Mvita ya yinza ya mvimba kesalama diaka ntama mingi ve?—Yinki Biblia metuba?
Na bamvula 30 yayi meluta, bantu mingi monaka ti nguizani ya mbote vuandaka kati na babuala mingi mpe nguizani yango vuandaka kuma kaka ngolo. Nzokande, mambu mekatuka salama na yinza kena kumonisa ti mfunu ya kubanga kele.
“Na ntangu bantu kena kubanga ti mvita ya Gaza muangana na babuala yankaka, Israël mpe Hezbollah mebanda kubulana minduki na bandilu ya buala Liban.”—Reuters, 6 janvier 2024.
“Buala Iran yina kena kupesa binuanunu ya nene ya nikleere mpe kupesa maboko na babuala yankaka samu na bamvita, yakena kubangisa babuala mingi ya Occident. Katula yau, mbala yayi Chine mpe Russie kele na ndambu na yandi.”—The New York Times, 7 janvier 2024.
“Russie kena kutatamana kunuanisa Ukraine.”—UN News, 11 janvier 2024.
“Mumbongo mpe binuanunu ya Chine kena kutatamana kumonte, Taïwan kena kutatamana kunuanina yinsua na yau, Chine mpe États-Unis kena kutatamana kubendana na mutindu yina lenda sala ti mvita banda na pete nionso.”—The Japan Times, 9 janvier 2024.
Yinki Biblia metuba samu na mambu ya kubangisa yina beto kena kumona bubu yayi? Yakena kunata na mvita ya yinza ya mvimba?
Biblia samunaka mambu yina kena kusalama na yinza
Biblia samunaka ve mosi ya bamvita kati na bamvita yina beto kena kumona bubu na yinza. Kasi, yasamunaka nde bamvita kevuanda mingi na ntangu na beto mpe yakesala ti ‘yakatula kiyenge na ntoto.’—Kusonga 6:4.
Mukanda ya Daniele samunaka ti “na ntangu ya nsuka,” babuala ya kilendo ya yinza ‘kebulana,’ to kusosa kuyadila buala yankaka. Babuala yango kesosa diaka kumonisa na babuala yankaka binuanunu na yau ya nsomo mpe bakebimisa ‘bima ya ntalu,’ to mbongo mingi samu na kusumba minduki.—Daniele 11:40, 42, 43.
Mvita mosi yina beto kena kuvingila
Biblia memonisa ti mambu ya yinza kebeba diaka ngolo tekila yinza bonga. Yesu samunaka ti ‘yakevuanda na mpasi mosi ya nene yina salama ntete ve banda ebandeli ya yinza.’ (Matayo 24:21) ‘Mpasi ya nene’ yango kenata na mvita mosi yina bekebokidilaka Armagedoni, yina memonusua lokola ‘mvita ya kilumbu ya nene ya Nzambi Nkua-ngolo nionso.”—Kusonga 16:14, 16.
Nzokande, Armagedoni kevukisa bantu, kasi yakebebisa bau ve. Na nzila ya mvita yango, Nzambi ketula nsuka na luyalu ya bantu, yina mefuisa bantu mingi na bamvita. Samu na kuzaba mutindu Armagedoni kenata kiyenge ya mvimba mvimba, tanga masolo yayi melanda:
Tala diaka...
MALONGI YA NGUDI YA BIBLIA
Samu na yinki Nzambi semaka ntoto?
Yinza na beto kele ya kufuluka na bima ya kitoko. Distance yina mekabula yau na muini kele mpenza ya kufuana, yatuluaka na angle mosi ya mbote, mpe yakebalukaka na vitesi ya mbote. Samu na yinki Nzambi bimisaka ngolo nionso yina samu na kusala ntoto?
BAMVUTU NA BIUVU YA BIBLIA
Biblia lenda bomba munu?
Baverse ya Biblia yina bombaka bantu mingi yina kena kukutana na mambu ya mpasi mpe bayina kena kutungisama na makanisi.
MAMBU YINA METADILA BETO
Lomba muntu mosi kuiza tala nge
Tubila kiuvu mosi ya Biblia, to longuka kuzaba mambu mingi yina metadila Bambangi ya Yehova.
