Lukutakanu ya nene ya nkubukulu ya ONU yina ketadilaka kusoba ya klima, COP27 (Convention-cadre des Nations unies sur les changements climatiques) manisaka na kilumbu ya lumingu, 20 novembre 2022. Atako bamfumu mpe bantu ya mayele yina kutakanaka na lukutakanu yango ndimaka kupesa mbongo na babuala yina kele na makoki mingi ve samu na kusadisa bau na bivonza yina kusoba ya klima kebimisaka, bantu mingi memona ti yau ve kemanisa diambu yango.

•   Na kilumbu ya 19 novembre 2022, António Guterres, secrétaire général ya ONU tubaka: “Munu kele na kiese na mutindu beto bakaka nzengolo ya kutula mua mbongo pembeni samu na kusadisa bantu yina kena kukutana na bivonza ya kusoba ya klima, kasi beto mezaba ti yafuana kaka ve. . . samu planeti na beto kele mpenza na kivonza.”

•   Na kilumbu ya 20 novembre 2022, Mary Robinson, prezidan ya ntama ya buala ya Irlande mpe ya nkubukulu mosi ya ONU (Haut-commissaire aux droits de l’homme), tubaka: “Ntama mingi ve, kusoba ya nene ya klima lenda salama na kintulumukina mpe yalenda bimisa bivonza ya nene na yinza.”

 Bantuenia kena kukitungisama mingi samu na diambu yina lenda kumina planeti na beto na bilumbu kena kuiza. Kasi, makanda lenda sala kintuadi samu na kukokisa nsilulu na bau samu na kubongisa diambu metadila kusoba ya klima? Yinki Biblia metuba?

 Biblia memonisa ti ata kana makanda mesangana mpe bamesala bangolo na luzolo nionso samu na kubongisa diambu metadila klima, bakekoka ve kumanisa yau nionso. Samu na yinki? Beto tadila bamfunu yayi zole:

•   ‘Kima yina kele ya kuvenga lenda sungama ve.’—Longi 1:15.

   Yazola monisa: Baguvernema kele ve na dikoki ya kusala nionso yina bamekana kusala, samu bantu kele ve na dikoki ya kukituadisa bau mosi. (Yeremia 10:23) Ata kana makanda mesangana mpe bamesala nionso yina balenda, bakevuanda kaka ve na dikoki ya kubongisa mambu metadila yinza yayi.

•   ‘Samu bantu kevuanda bantu yina kekukizolaka, bantu yina kezolaka mbongo, . . . bantu yina kezolaka ve kusala na nguizani.’—2 Timoteo 3:2, 3.

   Yazola monisa: Biblia mesamunaka na busikisiki ti bantu mingi na bilumbu na beto kevuanda bantu yina kesosaka kaka mambote na bau mosi mpe bakezolaka ve kusala kintuadi samu na mambote ya bantu yankaka.

 Nzokande, bansilulu ya baguvernema kekoka ve kubongisa planeti na beto na bilumbu kena kuiza. Nzambi metula N’yadi mosi ya makoki yina keyadila yinza ya mvimba, Yesu Klisto. Biblia metuba mutindu yayi samu na yandi:

•   ‘Luyalu kevuanda na zulu ya mapeka na yandi. Bakebokidila yandi Ndongisi ya Mayele, Nzambi ya Ngolo, Tata ya Kukondua Nsuka, Mfumu ya Kiyenge.’—Yezaya 9:6, noti ya yinsi ya paje.

 Yesu kele Ntinu ya Kimfumu ya Nzambi, to guvernema ya dizulu. (Matayo 6:10) Yandi kele na kilendo, na nduenga, mpe na nsatu ya ngolo ya kutanina planeti na beto mpe bantu yina kezingaka kuna. (Nkunga 72:12, 16) Na yinsi ya luyalu na yandi, guvernema yango ya dizulu kekufua bantu nionso yina ‘kena kubebisa ntoto’ mpe yakebongisa ntoto ya mvimba.—Kusonga 11:18, noti na yinsi ya paje; Yezaya 35:1, 7.

 Samu na kuzaba mambu mingi yina metadila solision ya mbote yina metadila kusoba ya ngolo ya klima, tanga disolo “Kusoba ya klima mpe luzingu na beto na bilumbu kena kuiza—Yina Biblia metuba.”