Bamvita mpe kuwelana kati na basoda kena kutatamana kaka na yinza. Na yau, O.N.U mpe bankubukulu yankaka kena kutatamana kusala ngolo ya kusosa kutula kiyenge a, na kifuani baketindaka bamonisi na yau na bisika yina bamvita kele. Kivuvu na bau kele batula kiyenge mpe luvuvamu na bisika yina bamvita kele. António Guterres, yina kele Secrétaire général ya O.N.U metuba: “Basoda ya O.N.U kezimbakanaka ve lukanu yina beto kele na yau, kusala ti yinza kuma kisika mosi ya kiyenge.”

 Na bamvula nionso yayi meluta, mambu yina bakesalaka samu na kusosa kutula kiyenge menunga na bisika yankaka. Na kifuani, bataninaka bana ya buala yina kele basoda ve, bavutulaka bantu yina ketinaka bamvita na babuala na bau, bapesaka bantu bima ya kudia mpe bima yankaka yina kesadisa bau, mpe batungaka bayinzo yina bebisamaka. Kasi bakena kukutana na mambu mingi ya mpasi yina kena kusala ti ngolo na bau ya kutula kiyenge bika nunga. Kilumbu yankaka solision mosi kevuanda yina kesala ti kiyenge ya kedika vuanda samu na mvimbamvimba na yinza? Yinki bamvutu Biblia mepesa?

Mambu ya mpasi na diambu metadila kusosa kutula kiyenge mpe basolision yina Biblia mepesa

 Diambu ya mpasi: kukondua kuwizana. Yakevuandaka ntangu nionso pete samu na bankubukulu yina ketadilaka basoda mpe yina ketadilaka bana ya buala yina kele ve basoda ya babuala yina mesuasana bawizana. Na bantangu yankaka, yavuandaka mpasi samu bankubukulu yango sala kintuadi samu na matata mpe kusosa mambote na bau mosi.

 Solision ya Biblia: ‘Nzambi ya dizulu ketula kimfumu mosi . . . mpe yakesukisa bimfumu yango nionso [baguvernema ya bantu], yau mosi kebikana samu na mvimbamvimba.’—Danyele 2:44.

 Diambu ya mpasi: bima yina bantu lenda sadila mpe makoki na bau samu na kutula kiyenge kele na ndilu. Mbala mingi bankubukulu yina baketulaka samu na kusosa kutula kiyenge kevuandaka ve na bantu mingi, mbongo, to bima yankaka, yakesalaka ti bavuanda na ndilu ya kusala yina bakele na nsatu ya kusala. Yakelombaka diaka na bantu yina kena kusosa kutula kiyenge bakuenda na bisika ya mpasi mpe ya bivonza.

 Solision ya Biblia: “Nzambi ya mfumu na beto Yesu Klisto . . . vuandisaka [Yesu] na diboko na yandi ya kibakala na bisika ya dizulu, na zulu mpenza kuluta guvernema nionso mpe kimfumu mpe kilendo.”—Baefese 1:17, 20, 21.

 Yehova, b Nzambi Nkua-Ngolo-Nionso pesaka bima nionso yina mebonga na Yesu, yina meponama lokolo Ntinu ya Kimfumu ya Nzambi. (Danyele 7:13, 14 c) Nzambi pesaka Yesu kilendo, nzayilu, nduenga, mpe lusuasukusu mingi—yina meluta na ntama baguvernema to bankubukulu ya bantu. (Yisaya 11:2) Yesu kele diaka na bambasi mingi ya kilendo yina yandi lenda sadila. (Emoniseli 19:14) Yakele na diambu mosi ve yina kele mpasi samu na yandi.

 Diambu ya mpasi: bipekiseli yina mekatuka na minsiku. Mbala mingi, bantu yina kesalaka na bankubukulu yina kesosaka kutula kiyenge, bakevuandaka ve na dikoki ya kusala mambu yina bakele na nsatu ya kusala samu bakevuandaka ve na malako ya puelele yina metadila mambu yina bafueti sala, to samu na bipekiseli yina bametudila bau. Yakesalaka ti babika vuanda mpenza na makoki ya kutanina bantu yankaka to kukokisa balukanu na bau.

 Solision ya Biblia: “Bamepesa [Yesu] kimfumu nionso na dizulu mpe na ntoto.”—Matai 28:18.

 Nzambi peska Yesu malako ya puelele samu na kutula kiyenge na yinza mpe yandi pesaka Yesu kimfumu nionso samu na kukokisa yau. (Yoane 5:22) Yesu kesala ata fioti ve mambu na mutindu ya kukondua lunungu to kukuma muntu yina kendimaka kaniaka. (Yisaya 11:3-5) Na yau, yakele mpenza na mfunu Biblia bokidila Yesu “Ntinu ya kiyenge,” yina Kimfumu na yandi ketula ‘lunungu mpe kukuikama.’—Yisaya 9:6, 7.

Kimfumu ya Nzambi kenata kiyenge ya kedika

 Baguvernema ya bantu lenda nata mua kiyenge fioti mpe kumanisa mua matata ya basoda na kizunga mosi. Kasi balenda katula ve diambu yina kesalaka ti kinkesi bima—kuyina yina kevuandaka na bantima ya bantu samu na bantu yankaka.

 “Diambu ya ngudi kele kiyenge ya kutula kele ve.”—Dennis Jett, ambasadere ya ntama ya États-Unis.

 Na ndambu yankaka, Kimfumu ya Nzambi nde mebonga mpenza kutula kiyenge samu yakena kusadisa bantu bakatula kuyinana na bantima na bau. Na kifuani, simba ti ntangu Yesu vuandaka na ntoto, yandi longaka banlonguki na yandi na bampova mpe na kupesaka bau kifuani samu na mutindu ya kutula kiyenge mpe kumonisina bantu yankaka nzola:

 Yesu tubaka diaka ti bantu yina Kimfumu ya Nzambi keyadila kezabana na nzola yina bakele na yau samu na bantu yankaka. Biblia memonisa puelele ti Kimfumu ya Nzambi keyadila ve bantu yina keyinaka bantu yankaka:

 Yehova Nzambi, yina salaka bantu, mezaba mutindu meluta mbote—mutindu kaka mosi—ya kutula kiyenge na yinza. Kimfumu na yandi kevuanda na makoki ya kusala mambu yina bantu, ata mpe bankubukulu yina kesosaka kutula kiyenge nungaka ve kusala.