DILONGI 32
Kimfumu ya Nzambi kena kuyala bubu yayi!
Kimfumu ya Nzambi bandaka kuyala na dizulu na mvula 1914. Na ntangu yango nde bilumbu ya nsuka ya luyalu ya bantu bandaka. Yinki mutindu beto mezabila yau? Kutadila bambikudulu ya Biblia, mambu yina kena kusalama, mpe bikadulu ya bantu yina kena kumonisa ti Kimfumu ya Nzambi bandaka kuyala na mvula 1914.
1. Yinki Biblia samunaka?
Mukanda ya Daniele monisaka ti Kimfumu ya Nzambi kebanda kuyala na nsuka ya ntangu bakebokidilaka ‘bantangu nsambuadi.’ (Daniele 4:16, 17) Basiekle na manima, Yesu tubilaka kaka ntangu yango lokola ‘bantangu yina bametulaka ya makanda,’ mpe yandi monisaka ti ntangu yango manisaka ntete ve. (Luka 21:24) Mutindu beto kemona yau, bantangu nsambuadi manisaka na mvula 1914.
2. Yinki mambu mpe bikadulu ya bantu yina kena kumonana banda 1914?
Banlonguki ya Yesu yuvusaka yandi: ‘Yinki kevuanda kidimbu ya kumonana na nge mpe ya nsuka ya mambu ya ntangu yayi?’ (Matayo 24:3) Na mvutu yina yandi pesaka, Yesu samunaka mambu mingi yina kesalama na manima ya kubanda na yandi kuyala lokola Mfumu ya Kimfumu ya Nzambi na dizulu. Mambu yango kele bamvita, bansatu, mpe kuningana ya ntoto. (Tanga Matayo 24:7.) Biblia samunaka diaka bikadulu ya bantu na “bilumbu ya nsuka” yina kesala ti luzingu vuanda “bantangu ya mpasi.” (2 Timoteo 3:1-5) Mambu ya mpasi yango mpe bikadulu ya bantu bandaka kumonana mingi mingi banda 1914.
3. Samu na yinki yinza bebaka diaka mingi kuluta banda Kimfumu ya Nzambi bandaka kuyala?
Ntangu fioti na manima ya kukuma ya Yesu Mfumu ya Kimfumu ya Nzambi, yandi nuanaka mvita na dizulu na Satana mpe bademo na yandi. Satana nungaka ve mvita yango. Biblia metuba ti ‘balozaka yandi na ntoto, mpe balozaka yandi na yinsi mpe bambasi na yandi.’ (Kusonga 12:9,10,12) Satana kele na nganzi ya ngolo samu yandi mezaba ti ntangu fioti mebikana samu bakufua yandi. Yau yina yandi kena kubuela bampasi awa na ntoto. Yakele diambu ya kukamua ve kumona mutindu mambu kena kubeba mingi na ntoto! Kasi, Kimfumu ya Nzambi kemanisa bampasi yango nionso.
KOTA NA MPINDA
Tadila mutindu beto mezabila ti Kimfumu ya Nzambi bandaka kuyala na mvula 1914 mpe yina yazola monisa samu na beto.
4. Badati ya Biblia yina kena kumonisa ti Kimfumu ya Nzambi bandaka kuyala na 1914
Nzambi lotisaka Nebukadenezare Ntinu ya Babiloni ndozi. Mbikudi Daniele sasilaka ti ndozi yango vuandaka tubila mambu yina kesalama na kimfumu ya Ntinu Nebukadenezare mpe na Kimfumu ya Nzambi.—Tanga Daniele 4:17. a
Tanga Daniele 4:20-26, mpe sadila ankandre samu na kupesa bamvutu na biuvu yayi melanda:
-
(A) Yinki Ntinu Nebukadenezare monaka na ndozi na yandi?—Tala verse 20 mpe 21.
-
(B) Yinki kekumina yinti?—Tala verse 23.
-
(C) Yinki kesalama na nsuka ya ‘bantangu nsambuadi’?—Tanga verse 26.
Yinki nguizani kele kati na yinti ya ndozi mpe Kimfumu ya Nzambi
MBIKUDULU (Daniele 4:20-36)
Kimfumu
(A) Yinti ya nene
Kimfumu memanisa
(B) ‘Beno zenga yinti yango,’ mpe beno bika ‘bantangu nsambuadi luta’
Kimfumu mevutuka
(C) ‘Kimfumu kevuanda diaka ya nge’
Kukokisama ya ntete ya mbikudulu . . .
-
(D) Yinti vuandaka monisa nani?—Tala verse 22.
-
(E) Yinki ntangu Kimfumu manisaka?—Tanga Daniele 4:29-33.
-
(F) Yinki kuminaka Nebukadenezare na nsuka ya ‘bantangu nsambuadi’?—Tanga Daniele 4:34-36.
KUKOKISAMA YA NTETE
Kimfumu
(D) Nebukadenezare, ntinu ya Babilone
Kimfumu memanisa
(E) Na manima 606 T.N.B., Nebukadenezare kumaka kilawu mpe yandi lendaka diaka ve kuyala bamvula nsambuadi (7)
Kimfumu mevutuka
(F) Nebukadenezare vutukilaka mayele na yandi mpe yandi bandaka diaka kuyala
Kukokisama ya zole ya mbikudulu . . .
-
(G) Yinti vuandaka monisa nani?—Tanga 1 Bansangu 29:23.
-
(H) Yinki mutindu kimfumu na yandi manisaka? Yinki mutindu beto mezabila ti kimfumu yango vuandaka yala kaka ntangu Yesu vuandaka awa na ntoto?—Tanga Luka 21:24.
-
(I) Yinki ntangu mpe yinki kisika kimfumu yango vutukaka?
KUKOKISAMA YA ZOLE
Kimfumu
(G) Bantinu ya Yisaele yina kena kumonisa Kimfumu ya Nzambi
Kimfumu memanisa
(H) Yerusaleme bebisamaka, mpe kuzengana ya luyalu ya bantinu ya Yisaele salaka bamvula 2520
Kimfumu mevutuka
(I) Yesu mebanda kuyala lokola Ntinu ya Kimfumu ya Nzambi
Bantangu nsambuadi zingilaka bantangu yikua?
Bitini yankaka ya Biblia kesadisaka beto samu beto bakusa bitini na yau yankaka. Na kifuani, mukanda ya Kusonga (Nzaikusu) metuba ti bantangu tatu na ndambu (3,5) mekokana na bilumbu 1260. (Kusonga 12:6, 14) Nge meka tanga 1260 mbala zole, nge kebaka bantangu nsambuadi to bilumbu 2520. Bantangu yankaka Biblia kesadilaka kilumbu mosi samu na kumonisa mvula mosi. (Ezekiele 4:6) Na yau, na mukanda ya Daniele—bantangu nsambuadi kemonisaka bamvula 2520.
5. Yinza sobaka kubanda mvula 1914
Yesu samunaka mutindu mambu kekuma ntangu yandi kebaka Kimfumu. Tanga Luka 21:9-11, mpe na manima tadila kiuvu yayi:
-
Na mambu nionso bametanga awa, yinki nge kena kumona to nge kena kuwa?
Ntumua Paulo tubilaka diaka bikadulu yina bantu kemonisa na bilumbu ya nsuka ya luyalu ya bantu. Tanga 2 Timoteo 3:1-5, mpe na manima tadila kiuvu yayi:
-
Yinki bikadulu nge kena mona na bantu bubu yayi?
6. Luyalu ya Kimfumu ya Nzambi kena kupesa beto ngolo
Tanga Matayo 24:3, 14, mpe na manima tadila biuvu yayi:
-
Yinki kisalu ya mfunu kena kumonisa ti Kimfumu ya Nzambi kena kuyala?
-
Yinki mutindu nge lenda pesa maboko na kisalu yango?
Kimfumu ya Nzambi kena kuyala, mpe ntangu fioti kaka mebikana samu yabanda kuyadila ntoto. Tanga Baebreo 10:24, 25, mpe na manima tadila kiuvu yayi:
-
Yinki beto fueti sala lokola beto kena ‘kumona kilumbu kena kupusana’?
Kana nge mezaba diambu mosi yina lenda sadisa to kukatula bantu na kivonza, yinki nge kevuanda na nsatu ya kusala?
BANTU YANKAKA METUBA: “Samu na yinki Bambangi ya Yehova ketubilaka mingi mvula 1914?”
-
Yinki mvutu nge kepesa?
BUNKUFI
Bambikudulu ya Biblia, badati, mpe mambu yina kena kusalama na yinza kena kumonisa ti bubu yayi Kimfumu ya Nzambi kena kuyala. Beto kemonisaka ti beto kena kundima diambu yango ntangu beto kesamunaka mpe ntangu beto kekuendaka na balukutakanu.
Mvutukulu
-
Yinki mambu salamaka na nsuka ya bantangu nsambuadi yina mbikudi Daniele samunaka?
-
Yinki kena kundimisa nge ti Kimfumu ya Nzambi bandaka kuyala na mvula 1914?
-
Yinki mutindu nge lenda monisa ti nge kena kundima ti Kimfumu kena kuyala bubu yayi?
SOSA
Tadila mambu yina bantu ya istuare mpe mambu yina bantu yankaka metuba na yina metadila bansobolo yina salamaka na yinza kubanda 1914.
“Ntango nini bizaleli ya bato ekómaki Mpenza kobeba?” (Lamuká! ya Avril 2007)
Tanga yinki mutindu mbikudulu ya Matayo 24:14 sobaka luzingu ya muntu mosi.
“Nalingaki lisano ya Baseball koleka eloko nyonso!” (Linɔ́ngi ya Mosɛnzɛli No. 3 2017)
Yinki mutindu beto mezabila ti mbikudulu ya Daniele kikapu 4 metadila Kimfumu ya Nzambi?
Yinki kena kumonisa ti ‘bantangu nsambuadi’ bametubila na Daniele manisaka na mvula 1914?
a Tala diaka masolo zole ya kitini “Sosa” ya dilongi yayi.
Tala diaka...
BIUVU YINA BANTU KEYUVUSAKA MINGI
Yinki mutindu Bambangi ya Yehova kelongukaka Biblia na bantu?
Na nzila ya programe ya ndongokolo ya kusolola ofele na Bambangi ya Yehova, nge lenda sadila konso mbangudulu ya Biblia. Nge kele na yinsua ya kubokidisa dibuta na nge ya mvimba to bankundi na nge bakuiza sangana na nge.
