DILONGI 28
Beto monisa butondi samu na yina Yehova mpe Yesu salaka samu na beto
Yinki mutindu nge kekukimonaka kana nkundi mosi mepesa nge kado mosi ya kitoko? Kondua ntembe, nge kevuandaka mpenza na kiese mpe nge kevuandaka na nsatu ya kuvutudila yandi matondo samu na kado yango. Yehova mpe Yesu mepesa beto kado yina meluta na valere: Nkudulu. Yinki mutindu beto lenda monisina bau butondi?
1. Yinki kele mutindu mosi ya kumonisa butondi na Nzambi mpe Klisto samu na diambu yina basalaka samu na beto?
Biblia mepesa nsilulu ya luzingu ya mvula na mvula na ‘konso muntu yina kemonisa kiminu na [Yesu]’. (Yoane 3:16) Kasi kumonisa kiminu zola monisa yinki? Yakele kaka ve kundima Yesu. Kiminu kemonanaka na banzengolo yina beto kebakaka mpe na bisalu na beto. (Yakobo 2:17) Ntangu kiminu na beto kena kumonana na mambu yina beto kesalaka mpe yina beto ketubaka, nguizani na beto na Yesu mpe Tata na yandi, Yehova, kekuma ngolo.—Tanga Yoane 14:21.
2. Yinki diambu yankaka ya mfunu kemonisaka ti beto kena vutudila Yehova mpe Yesu matondo samu na diambu yina basalaka?
Na nkokila ya kilumbu ya nsuka yina yandi lutisaka na banlonguki na yandi, Yesu monisaka mutindu yankaka ya kumonisa butondi na beto samu na nkayilu na yandi. Yandi lombaka basala mua nkinzi mosi yina Biblia kebokidilaka ‘Madia ya nkokila ya Mfumu,’ mpe beto kebokidilaka yau diaka Mbambukulu ya lufua ya Klisto. (1 Bakorinto 11:20) Mbambukulu yango sadisaka bantumua ya Yesu—mpe Baklisto nionso ya kedika na manima na bau—bazimbakanaka ve ti yandi pesaka luzingu na yandi samu na bantu. Na kutadila diambu yango, Yesu pesaka ntumu ti: ‘Beno tatamana kusala yau samu na kukanisa munu.’ (Luka 22:19) Kana nge mekuenda na Mbambukulu, nge kemonisa ti nge kele na butondi samu na nzola ya nene yina Yehova mpe Yesu kele na yau samu na beto.
KOTA NA MPINDA
Tadila mbotembote mitindu ya kumonisa butondi samu na nzola ya nene yina Yehova mpe Yesu monisaka. Sosa kuzaba samu na yinki Mbambukulu ya lufua ya Yesu kele mfunu.
3. Yina beto fueti sala samu na kumonisa ti beto kele na butondi
Kanisa ntete muntu mosi mevukisa nge ntangu nge vuandaka dinda na maza. Nge kezimbakana diambu yina yandi salaka samu na nge? To nge kesosa mutindu ya kumonisa ti nge kele na butondi samu na diambu yina yandi salaka?
Na kupesaka Muana na yandi lokola nkayilu, Yehova vukisaka luzingu na beto. Tanga 1 Yoane 4:8-10, mpe na manima tadila biuvu yayi:
-
Samu na yinki nkayilu ya Yesu kele kado mosi ya nene?
-
Yinki mutindu nge kekukimonaka samu na diambu yina Yehova mpe Yesu salaka samu na nge?
Yinki mutindu beto lenda monisa butondi na Yehova mpe Yesu samu na diambu yina basalaka samu na beto? Tanga 2 Bakorinto 5:15 mpe 1 Yoane 4:11; 5:3. Na manima ya kutanga konso verse, tadila kiuvu yayi:
-
Na kutadila baverse yango, yinki mutindu beto lenda monisa butondi na beto?
4. Landa kifuani ya Yesu
Mutindu yankaka ya kumonisa ti beto kena kusepela na nkudulu kele na kulanda kifuani ya Yesu. Tanga 1 Piere 2:21, mpe na manima tadila kiuvu yayi:
-
Na yinki mitindu beto lenda landa mbotembote kifuani ya Yesu?
Yesu zolaka Mpova ya Nzambi, yandi samunaka nsangu ya mbote, mpe yandi sadisaka bantu yankaka
5. Kuendaka na Mbambukulu ya lufua ya Yesu
Samu na kuzaba mutindu lukutakanu ya ntete ya Madia ya nkokila ya Mfumu lutilaka, tanga Luka 22:14, 19, 20. Mpe tadila biuvu yayi:
-
Yinki mutindu lukutakanu ya ntete ya Madia ya nkokila ya Mfumu lutilaka?
-
Dimpa mpe vinu kena kumonisa yinki?—Tala verse 19 mpe 20..
Yesu pesaka ntumu na banlonguki na yandi na kusalaka Mbambukulu ya lufua na yandi mbala mosi na mvula, na dati yina yandi kufuaka. Bambangi ya Yehova kekutakanaka konso mvula samu na kukanisa lufua ya Yesu. Lukutakanu yango ya mfunu kesalamaka mutindu kaka Yesu salaka yau na ebandeli. Samu na kuzaba mambu yina metadila lukutakanu yango ya mfunu, tula VIDEO. Mpe tadila kiuvu yayi melanda.
-
Yinki mambu kesalamaka na Mbambukulu ya lufua ya Yesu?
Dimpa mpe vinu kele kaka bifuanusu. Dimpa kena kumonisa nzutu ya kukoka ya Yesu yina yandi pesaka samu na beto, mpe vinu kena kumonisa menga na yandi
BANTU YANKAKA METUBA: “Diambu yina nge fueti sala samu na kuvuka, kele kaka kundimina Yesu.”
-
Yinki mutindu nge lenda sadila Yoane 3:16 mpe Yakobo 2:17 samu na kumonisa ti yafueti suka kaka ve na kundimina Yesu?
BUNKUFI
Beto kemonisaka butondi samu na yina Yesu salaka samu na beto na kumonisaka kiminu na yandi mpe na kukuendaka na Mbambukulu ya lufua na yandi.
Mvutukulu
-
Yinki zola monisa kumonisa kiminu na Yesu?
-
Yinki mutindu nge kemonisaka butondi na nge samu na yina Yehova mpe Yesu salaka samu na nge?
-
Samu na yinki yakele mfunu kukuenda na Mbambukulu ya lufua ya Klisto?
SOSA
Yinki lufua ya Klisto kena kutinda beto beto sala?
Yandi sadilaka nzutu na yandi samu na kukumisa Yehova (9:28)
Longuka mbotembote mambu yina metadila kiminu mpe mutindu nge lenda monisa yau.
“Monisá kondima na bilaka ya Yehova” (Linɔ́ngi ya Mosɛnzɛli ya Octobre 2016)
Na disolo ya luzingu “Nakómi na bomoi ya malamu mpe ya esengo,” tala mutindu kulonguka nkayilu ya Klisto sadisaka luzingu ya nketo mosi.
“Biblia ebongolaka bato” (Linɔ́ngi ya Mosɛnzɛli ya 1 Août 2011)
Tadila samu na yinki bantu fioti kaka kekudiaka dimpa mpe kekunuaka vinu na Mbambukulu.
Tala diaka...
BIUVU YINA BANTU KEYUVUSAKA MINGI
Yinki mutindu Bambangi ya Yehova kelongukaka Biblia na bantu?
Na nzila ya programe ya ndongokolo ya kusolola ofele na Bambangi ya Yehova, nge lenda sadila konso mbangudulu ya Biblia. Nge kele na yinsua ya kubokidisa dibuta na nge ya mvimba to bankundi na nge bakuiza sangana na nge.
