Nsangu metadila mbanza ya Yeriko muanganaka na babuala yankaka na Kanana. Bantinu na bau bakaka nzengolo ya kusangana samu na kunuanisa Bayisaele. Kasi bantu ya Gibeoni sadilaka mayele yankaka. Bavuataka bilele ya kubebabeba, bakuendaka na Yosua mpe batubaka: ‘Beto mekatuka na yinsi ya ntama. Beto mekuwa nsangu ya Yehova mpe mambu nionso yina yandi salaka na Ezipito mpe na Moabe. Pesa beto nsilulu ti beno kenuanisa beto ve, mpe beto kekuma bisadi na beno.’

Yosua ndiminaka bau mpe yandi babaka nzengolo ya kumanga kunuanisa bau. Na manima ya bilumbu tatu, yandi kuizaka zaba ti bakatukaka ve na buala ya ntama. Bakatukaka na buala ya Kanana. Yosua yuvusaka bantu ya Gibeoni: ‘Samu na yinki beno vunaka beto?’ Bapesaka mvutu: ‘Beto bangaka! Beto mezaba ti Yehova Nzambi na beno kena kunuana samu na beno. Beto melomba beno beno bika kufua beto.’ Yosua zitisaka nsilulu na yandi mpe yandi bikaka bau na luzingu.

Yazingilaka ve, bantinu tanu ya Kanana mpe basoda na bau kuizaka nuanisa bantu ya Gibeoni. Yosua mpe basoda na yandi  tambulaka mpipa ya mvimba samu na kuvukisa bau. Mvita bandaka sunkasunka mpenza. Bantu ya Kanana bandaka kutina konso kisika. Bisika nionso yina batinaka, Yehova buisilaka bau mabanga ya nene. Na manima, Yosua lombaka Yehova telemisa muini. Samu na yinki yandi lombaka Yehova telemisa muini, nzokande diambu ya mutindu yina salaka salama ntete ve? Samu Yosua tudilaka Yehova ntima. Muini lekaka ve kilumbu yango tii Bayisaele nungaka bantinu ya Kanana mpe basoda na bau.