Nganga-nzambi ya nene Eli vuandaka na bana zole ya babakala yina vuandaka sala lokola banganga-nzambi na tabernakle. Bankumbu na bau vuandaka Hofni mpe Finehase. Bavuandaka zitisa ve bansiku ya Yehova, mpe bavuandaka sadila bantu mambu ya yimbi mpenza. Ntangu Bayisaele vuandaka nata bankayilu na Yehova, Hofni mpe Finehase vuandaka katula misuni ya mbote samu na bau mosi. Eli kuwaka mambu yina bana na yandi vuandaka sala, kasi yandi vuandaka sala kima mosi ve. Yehova bikaka mambu yango tatamana kaka plina?

Atako Hofni mpe Finehase vuandaka mpenza bambuta ya Samuele, Samuele landaka ve kifuani na bau. Yehova sepelaka na Samuele. Na mpipa mosi ntangu yandi vuandaka ya kuleka, Samuele kuwaka ndinga mosi kena kubokila nkumbu na yandi. Yandi lamukaka, yandi kuendaka na nsualu na Eli, mpe yandi tubaka: ‘Munu yayi!’ Kasi Eli tubaka: ‘Munu bokila nge ve. Vutuka na kuleka.’ Samuele vutukaka na kuleka. Na manima ndinga yango bokilaka yandi diaka. Ntangu Samuele kuwaka ndinga yango samu na mbala ya tatu, Eli bakusaka ti Yehova nde vuandaka bokila Samuele. Yandi tubilaka Samuele ti kana yandi mekuwa diaka ndinga yango, yandi fueti tuba: ‘Tuba, Yehova. Kisadi na nge kena kuwa.’

Samuele vutukaka na kuleka. Na manima yandi kuwaka diaka ndinga yango kena kubokila yandi: ‘Samuele! Samuele!’ Yandi tubaka: ‘Tuba,  samu kisadi na nge kena kuwa.’ Yehova tubilaka yandi: ‘Tubila Eli ti munu kepesa yandi mpe dibuta na yandi kitumbu. Yandi mezaba ti bana na yandi kena kusala mambu ya yimbi na tabernakle na munu, kasi yandi kena kusala kima mosi ve.’ Na sunka yina landaka, Samuele zibulaka baporte ya tabernakle, mutindu kaka yandi vuandaka sala. Yandi vuandaka banga kutubila nganga-nzambi ya nene mambu yina Yehova tubaka. Kasi Eli bokilaka yandi mpe yandi yuvusaka yandi: ‘Muana na munu, yinki Yehova tubilaka nge? Tubila munu mambu nionso.’ Na yau Samuele tubilaka Eli mambu nionso.

Ntangu Samuele vuandaka kula, Yehova tatamanaka kuvuanda kintuadi na yandi. Na buala ya mvimba, Bayisaele nionso zabaka ti Yehova ponaka Samuele samu yandi vuanda mbikudi mpe zuzi.