Saulo vuandaka muntu ya Roma samu yandi butukaka na mbanza ya Tarse. Yandi vuandaka Mufarisai, yandi zabaka Bansiku ya Bayuda mbote mpenza, mpe yandi vuandaka yina Baklisto. Yandi vuandaka kota na bayinzo ya Baklisto samu na kubimisa bau mpe kuloza bau na buloko. Kutu, yandi vuandaka vana mpe yandi vuandaka tala mutindu bantu yina fuemaka vuandaka bula Stefano mabanga samu na kufua yandi.

Kasi Saulo sukaka kaka ve na kukanga Baklisto ya Yerusaleme. Yandi lombaka nganga-nzambi ya nene yandi tinda yandi na mbanza ya Damasi samu yandi kuenda niokola mpe Baklisto yankaka kuna. Ntangu Saulo kumaka pene ya mbanza yango, kukia mosi ya ngolo biminaka yandi na kintulumukina, mpe yandi kubuaka na yinsi. Yandi kuwaka ndinga mosi metuba: ‘Saulo, samu na yinki nge kena kuniokola munu?’ Saulo yuvusaka: ‘Nge kele nani?’ Mpe ndinga yango vutusaka: ‘Munu Yesu. Kuenda na Damasi, mpe baketubila nge mambu yina nge fueti sala.’ Na mbala mosi, meso ya Saulo kufuaka, mpe muntu yankaka simbaka yandi na diboko samu na kunata yandi na Damasi.

Kuna na Damasi, yavuandaka na Muklisto mosi ya kukuikama na nkumbu ya Ananiasi. Yesu tubilaka yandi na vizion ti: ‘Kuenda na yinzo ya Yudasi na balabala yina bakebokidilaka Kusungama, mpe sosa Saulo.’ Ananiasi tubaka: ‘Mfumu, munu mezaba bakala yango mbote! Yandi kena kuloza bantu na nge na buloko!’ Kasi Yesu tubaka: ‘Kuenda na yandi. Munu mepona yandi samu yandi samuna nsangu ya mbote na makanda mingi.’

Ntangu Ananiasi monaka Saulo, yandi tubilaka yandi: ‘Saulo, mpangi, Yesu metinda munu munu zibula meso na nge.’ Na mbala mosi, Saulo bandaka diaka kumona. Yandi longukaka mambu metadila Yesu mpe yandi kumaka nlonguki na yandi. Lokola Saulo bakaka mbotama mpe yandi kumaka Muklisto, yandi bandaka kulonga na basinagoga kintuadi na Baklisto yankaka. Bayuda monaka yimbi ntangu bavuandaka  mona Saulo kena kulonga bantu mambu ya Yesu! Batubaka: ‘Yandi yayi ve bakala yina vuandaka niokola banlonguki ya Yesu?’

Saulo longaka bantu na Damasi bamvula tatu. Bayuda yinaka yandi mpe bavuandaka sosa mutindu ya kufua yandi. Kasi bampangi bakusaka diambu yango mpe batinisaka yandi. Batulaka yandi na kitunga mosi mpe babimisaka yandi na didusu yina vuandaka na kibaka ya mbanza yango.

Ntangu Saulo kuendaka na Yerusaleme, yandi mekaka kukuenda na bampangi yina vuandaka kuna. Kasi, bavuandaka banga yandi. Na manima nlonguki mosi ya kimpombo na nkumbu ya Barnabasi nataka Saulo na bantumua mpe yandi tubilaka bau ti Saulo sobaka mpenza. Saulo bandaka kusamuna nsangu ya mbote na vema kintuadi na kimvuka yina vuandaka na Yerusaleme. Na manima, yandi zabanaka mingi na nkumbu ya Paulo.