Ntangu ntumua Yoane vuandaka na buloko na ile ya Patmose, Yesu monisaka yandi bavizion 16 ya bilumbu kekuiza. Bavizion yango monisaka mutindu nkumbu ya Yehova kekuma nlongo, mutindu Kimfumu na yandi kekuiza, mpe mutindu luzolo na yandi kesalama na ntoto mutindu yakesalamaka na dizulu.

Na vizion mosi, Yoane monaka Yehova mevuanda na kiti na yandi ya Kimfumu yina mefuluka na nkembo na dizulu, mpe bankulutu 24 yina mevuata bilele ya mpembe mpe bayimpu ya kimfumu ya wolo na bayintu na bau mezinga yandi. Bantiemo mpe makelele ya bakake vuandaka katuka na kiti yango ya kimfumu. Bankulutu yango 24 fukamaka na ntuala ya Yehova mpe bavuandaka sambila yandi. Na vizion yankaka, Yoane monaka kimvuka mosi ya nene ya bantu yina mekatuka na makanda nionso, na babuala nionso, mpe na bandinga nionso kena kusambila Yehova. Muana Dimeme, yazola tuba Yesu, kena kutuadisa bau mpe yandi kena kunata bau na maza ya luzingu. Na manima, na vizion yankaka, Yesu bandaka kuyadila lokola Ntinu na dizulu, kintuadi na bankulutu yango 24. Na vizion yina landaka, Yoane monaka Yesu kena kunuana na dragon, yazola tuba Satana, mpe bademon na yandi. Yesu kukaka bau na dizulu, mpe yandi lozaka bau na ntoto.

 Na manima Yoane monaka kifikula mosi ya kitoko ya Muana Dimeme mpe bantu 144 000 yina metelema na zulu ya mongo Siona. Yandi monaka diaka mbasi mosi kena kupumbua nzinganzinga ya ntoto; yandi kena kutubila bantu babanga Nzambi mpe bapesa Yandi nkembo.

Na vizion yankaka yina landaka, yandi monaka mvita ya Armagedoni. Na mvita yango, Yesu mpe basoda na yandi nungaka yinza ya yimbi ya Satana. Na vizion ya nsuka, Yoane monaka dizulu mpe ntoto mekuma na nguizani ya kukoka. Satana mpe bantu na yandi mekufua. Bisemua nionso na dizulu mpe na ntoto kena kukumisa nkumbu ya Yehova nlongo mpe kena kusambila kaka yandi.