Bilumbu kumi na manima ya kuvutuka ya Yesu na dizulu, banlonguki na yandi bakaka mpeve ya nlongo. Yavuandaka na Pantekote ya mvula 33 N.B., mpe bantu ya bisika mutindu na mutindu kuizaka na Yerusaleme samu na nkinzi yango. Banlonguki ya Yesu kana 120 kutakanaka na shambre ya zulu ya yinzo mosi. Na kintulumukina, diambu mosi ya kukamua salamaka. Kima mosi, yina vuandaka lokola mua tiya monanaka na zulu ya yintu ya konso nlonguki, mpe bau nionso bandaka kutuba na bandinga yina mesuasana. Makelele mosi ya ngolo yina vuandaka lokola makelele ya mupepe ya ngolo fulukaka na yinzo yango.

Banzenza yina kuizaka na Yerusaleme kuwaka makelele yango, mpe bazawulaka na yinzo yango samu na kuzaba diambu yina vuandaka luta. Bakamuaka kumona ti banlonguki kena kutuba na bandinga na bau. Batubaka: ‘Kasi bantu yayi kele bantu ya Galile. Yinki mutindu bakena kutuba na bandinga na beto?’

Na manima Petelo mpe bantumua yankaka telemaka na ntuala ya kimvuka yango ya bantu. Petelo sasilaka bantu mutindu bakufuaka  Yesu mpe mutindu Yehova futumunaka yandi. Petelo tubaka: ‘Ntangu yayi, Yesu kele na dizulu, na diboko ya kibakala ya Nzambi, mpe yandi mepesa mpeve ya nlongo yina yandi lakaka. Yau yina beno kena kuwa mpe kumona bimangu yayi.’

Bampova ya Petelo simbaka mpenza bantima ya bantu yango, mpe bayuvusaka: “Yinki beto fueti sala?” Yandi tubilaka bau: ‘Beno balula ntima na masumu na beno mpe beno baka mbotama na nkumbu ya Yesu. Beno diaka, beno kebaka mpeve ya nlongo.’ Na kilumbu yango, bantu kana 3 000 bakaka mbotama. Banda na ntangu yango, banlonguki vuandaka buelama na nsualu mpenza na Yerusaleme. Na lusadusu ya mpeve ya nlongo, bantumua salaka bimvuka mingi samu na kulonga banlonguki mambu nionso yina Yesu pesaka ntumu.