Ntangu Yesu vuandaka kintuadi na bantumua na yandi na shambre ya zulu, yandi tubilaka bau: ‘Beno nionso, beno kesundola munu na mpipa ya bubu yayi.’ Petelo tubaka: ‘Ve! Ata kana bantu nionso yankaka mesundola nge, munu kesundola nge ata fioti ve.’ Kasi Yesu tubilaka Petelo: ‘Tekila nsusu kokola, nge kewangana munu mbala tatu.’

Ntangu basoda nataka Yesu na yinzo ya Kaifa, mingi ya bantumua na yandi tinaka. Kasi zole kati na bau landaka kimvuka yango ya bantu. Mosi na bau vuandaka Petelo. Yandi kotaka na lupangu ya yinzo ya Kaifa mpe yandi vuandaka yotila tiya. Lokola tiya vuandaka pesa kukia, kisadi mosi ya nketo monaka yilungi ya Petelo mpe yandi tubaka: ‘Munu mezaba nge! Nge vuandaka kintuadi na Yesu!’

Petelo tubaka: ‘Ve, munu vuandaka ve na yandi! Munu zaba kutu ve diambu nge kena kutuba!’ Yandi kuendaka na porte ya lupangu. Kasi ntangu fioti na manima kisadi yankaka ya nketo monaka yandi mpe yandi tubilaka grupe ya bantu yina vuandaka vana: ‘Muntu yayi vuandaka kintuadi na Yesu!’ Petelo tubaka: ‘Munu zaba kutu ve Yesu yango!’ Bakala mosi tubaka: ‘Nge kele mosi kati na bau! Ata ntubulu na nge kena kumonisa ti nge kele muntu ya Galile, lokola Yesu.’ Kasi Petelo levaka ndefi: ‘Munu zaba yandi ve!’

Na ntangu yango, nsusu kokolaka. Petelo monaka mutindu Yesu balukaka mpe talaka yandi. Yandi bambukaka na bampova ya Yesu, mpe yandi kuendaka na nganda mpe yandi dilaka ngolo.

Kaka na ntangu yango, Sanedrina bakaka nzengolo ti basambisa Yesu na kati ya yinzo ya Kaifa. Babakaka deja nzengolo ya kufua Yesu, kasi ntangu yayi bakena kusosa nde bamfunu ya kufua yandi. Atako plina, bakokaka ve kumona mfunu yina balendaka fundila yandi. Nsukansuka, Kaifa yandi mosi yuvusaka Yesu: ‘Nge kele Muana ya Nzambi?’ Yesu tubaka: ‘Ee.’ Kaifa tubaka: ‘Beto kele diaka ve na mfunu ya kusosasosa kidimbu yankaka. Yayi kele kifingu!’ Bantu ya Sanedrina ndimaka na kutubaka: ‘Bakala yayi fueti kufua.’ Babulaka Yesu bambata, balozilaka  yandi mete, bafukaka yandi meso, mpe babulaka yandi, na kutubaka: ‘Kana nge kele mbikudi, tubila beto nani mebula nge!’

Ntangu sunka kokaka, banataka Yesu na Sanedrina mpe babandaka kuyuvusa yandi diaka: ‘Nge kele Muana ya Nzambi?’ Yesu tubaka: ‘Beno mosi kena kutuba ti munu kele Muana ya Nzambi.’ Na manima, bamonaka ti yandi mefinga Nzambi mpe banataka yandi na Ponse Pilate, guvernere ya Roma. Yinki salamaka na manima? Beto kemona yau na disolo melanda.