Yesu mpe bantumua na yandi zengisaka lubuaku ya Kidrone samu na kukuenda na mongo ya Olive. Midi ya mpipa lutaka deja, mpe ngonda vuandaka ya mvimba. Ntangu bakumaka na bilanga ya Getesemane, Yesu tubilaka bau: “Beno bikana awa mpe beno tatamana kukenga.” Na manima Yesu kuendaka mua ntama na kati ya bilanga yango mpe yandi fukamaka. Na kiadi ya ngolo, yandi sambilaka Yehova: “Bika luzolo na nge salama.” Na manima Yehova tindaka mbasi mosi samu na kukindisa Yesu. Ntangu Yesu vutukaka kisika bantumua vuandaka, yandi kutaka bantumua yango tatu kena kuleka. Yandi tubaka: ‘Beno lamuka! Yayi kele ve ntangu ya kuleka! Ntangu mekoka samu munu pesama na maboko ya bambeni na munu.’

Yazingilaka ve Yudasi kuizaka, yandi nataka grupe ya bantu mingi yina vuandaka na mipanga mpe bayinti. Yandi zabaka kisika ya kumonina Yesu samu bavuandaka kuiza na bilanga yango mbala na mbala. Yudasi tubilaka basoda ti yandi kesadisa bau samu bazaba Yesu. Yandi pusanaka kisika Yesu vuandaka mpe yandi tubaka: ‘Mbote, Nlongisi,’ mpe yandi pesaka yandi bizu. Yesu tubaka: ‘Yudasi, nge kena kuteka munu na bizu?’

Yesu pusanaka mpe yandi yuvusaka grupe yango ya bantu: “Nani beno kena kusosa?” Batubaka: ‘Yesu muntu ya Nazareti.’ Na manima yandi tubilaka bau: “Munu yayi,” mpe bantu yango vutukaka na manima mpe bakubuaka na ntoto. Yesu yuvusaka diaka grupe yango ya bantu: “Nani beno kena kusosa?” Batubaka diaka: ‘Yesu muntu ya Nazareti.’ Yesu tubilaka bau: ‘Munu metubila beno ti munu yayi. Beno bika bantu yayi bakuenda.’

Ntangu Petelo monaka mambu yina vuandaka salama, yandi bimisaka mupanga mpe yandi zengaka dikutu ya Malakusi, nanga mosi ya nganga-nzambi ya nene. Kasi Yesu simbaka dikutu ya muntu yango mpe yabelukaka. Na manima yandi tubilaka Petelo: ‘Vutula mupanga na nge. Kana nge menuana na mupanga, nge  kekufua na mupanga.’ Basoda bakaka Yesu, bakangaka yandi maboko, mpe bantumua tinaka. Grupe yango ya bantu nataka Yesu na Anasi, nganga-nzambi mfumu. Anasi yuvusaka Yesu biuvu mpe yandi tindaka yandi na yinzo ya Nganga-nzambi ya nene Kaifa. Kasi yinki kuminaka bantumua?