Yesu kuizaka na ntoto samu na kusamuna nsangu ya mbote ya Kimfumu ya Nzambi. Samu na kumonisa mambu yina Yesu kesala ntangu yandi kekuma Ntinu, Yehova pesaka yandi mpeve ya nlongo samu na kusala bimangu. Yandi vuandaka belusa maladi ya mitindu nionso. Konso kisika yina yandi vuandaka kuenda, bantu ya maladi vuandaka kuiza samu yandi sadisa bau, mpe yandi vuandaka belusa bau nionso. Bantu ya kufua meso vuandaka mona, bantu ya kufua makutu vuandaka kuwa, bantu yina vuandaka tambula ve tambulaka, mpe bantu yina vuandaka na bademon, bademon yango bikaka bau. Bantu vuandaka beluka ata kana bemesimba kaka nsongi ya kinkuti na yandi. Bantu vuandaka landa Yesu konso kisika yina yandi vuandaka kuenda. Ata ntangu yandi vuandaka na nsatu ya kuvuanda kaka yandi mosi, Yesu vuandaka manga ve kuyamba bantu kana bamekuiza.

Kilumbu mosi, ntangu Yesu vuandaka na yinzo mosi, bantu natinaka yandi muntu mosi yina ketambulaka ve. Kasi bantu fulukaka na yinzo yango, na yau banungaka ve kukota. Na yau batobolaka yinzo yango na zulu mpe bakitisaka muntu yango tii kisika Yesu vuandaka. Na manima Yesu tubilaka muntu yango: ‘Telema mpe tambula.’ Ntangu yandi tambulaka, bantu kamuaka.

Kilumbu yankaka, ntangu Yesu vuandaka kota na buala mosi, bantu 10 yina vuandaka na maladi ya buazi telemaka na ntama mpe bavuandaka ganga: ‘Yesu, sadisa beto!’ Na ntangu yina, bantu ya buazi vuandaka na yinsua ve ya kupusana pembeni ya bantu yankaka. Yesu tubilaka bantu yango bakuenda na tempelo, mutindu kaka Bansiku ya Yehova tubaka samu na bantu ya buazi kana maladi na bau memanisa. Ntangu bavuandaka kuenda, babelukaka. Ntangu mosi ya bantu yango ya buazi monaka ti yandi mebeluka, yandi vutukaka samu na kupesa Yesu  matondo mpe kukumisa Nzambi. Na kati ya bantu kumi yango, kaka muntu yango nde pesaka Yesu matondo.

Nketo mosi yina salaka bamvula 12 na maladi, vuandaka diaka ve na kivuvu ya kubeluka. Yandi kuizaka na manimamanima ya Yesu na katikati ya kimvuka ya bantu mingi mpe yandi simbaka nsongi ya kinkuti ya zulu ya Yesu. Mbala mosi, nketo yango belukaka. Ntangu diambu yango salamaka, Yesu yuvusaka: “Nani mesimba munu?” Nketo yango bangaka, kasi yandi lutaka na ntuala ya Yesu mpe yandi tubaka ti yandi nde mesimba Yesu. Yesu bombaka yandi na kutubaka: ‘Muana na munu, kuenda na kiyenge.’

Soda mosi na nkumbu ya Yairusi lebaka Yesu: ‘Kuiza na yinzo na munu! Muana na munu ya nketo ya fioti kena kubela ngolo.’ Kasi tekila Yesu kuma na yinzo ya Yairusi, muana yango kufuaka. Ntangu Yesu kumaka, yandi monaka bantu mingi yina kuizaka dila kintuadi na dibuta yango. Yesu tubilaka bau: ‘Beno dila ve; yandi kena kuleka kaka pongi.’ Na manima, yandi simbaka diboko ya muana yango mpe yandi tubaka: “Muana, telema!” Na mbala mosi muana yango telemaka, mpe Yesu tubilaka bibuti na yandi bapesa yandi kima ya kudia. Kanisa ntete mutindu bibuti ya muana yango kukimonaka!