Yinzo ya Kimfumu nionso ya Bambangi ya Yehova yakele na nkumbu ya nlongo ya Nzambi. Yau yina, beto kemonaka ti kupesa maboko samu na kutanina yau yavuanda bunkete, kitoko mpe mbote yau kele diambu ya lukumu mpe ya mfunu mingi na nsambudulu na beto. Beto nionso lenda pesa maboko.

Pesa maboko samu na kutula bunkete na manima ya lukutakanu. Na manima ya lukutakanu nionso, bampangi ya babakala mpe ya banketo bakevuandaka na kiese ya kutula mua bunkete na Yinzo ya Kimfumu. Mbala mosi na sabala, beto ketulaka bunkete mingi kuluta na Yinzo ya Kimfumu ya mvimba. Nkulutu mosi to kisadi na bisalu mosi ketuadisaka bisalu yango. Mbala mingi, yandi ketadilaka liste ya mambu yina fueti salama. Kana yau mefuana, bampangi yankaka kekikupesaka samu na kukombola yau, kusukula yau, kupangusa bameza, bakiti, to bisika yankaka ya kuvuanda, kubongisa bakiti, kusukula bafenetre mpe matalatala, kuloza doti na kisika na yau, mpe kusala bunkete na nganda mpe na kati ya lupangu. Beto keponaka ata kilumbu mosi na mvula samu na kutula bunkete mbotembote kuluta na Yinzo ya Kimfumu. Beto kepesaka diaka bana na beto mua bisalu ya kusala samu na kulonga bau bazitisa kisika na beto ya nsambudulu.​—Longi 5:1.

Pesa maboko kana yamelomba kubongisa kima mosi yina mebeba. Mvula na mvula, beto ketalaka mbotembote Yinzo ya Kimfumu ya beto, yavuanda na kati to na nganda. Yau kesadisaka beto beto bongisaka yau mbala na mbala samu yavuanda ntangu nionso mbote, mpe samu beto bebisa mbongo mpambampamba ve. (2 Bansangu 24:13; 34:10) Yinzo ya Kimfumu yina kele ya kuvedila mpe yina metaninua mbote yakele kisika yina mefuana samu na kusambila Nzambi ya beto. Kana beto kena kupesa maboko na kisalu yango, beto kemonisa ti beto kezolaka mpenza Yehova mpe kisika ya beto ya nsambudulu. (Nkunga 122:1) Yau kesala diaka ti bantu kumisa nsambudulu ya beto.​—2 Bakorinto 6:3.

• Samu na yinki beto fueti baka na bansaka ve diambu metala kutula bunkete na kisika ya beto ya nsambudulu?

• Yinki kele bankubukulu samu na kutanina Yinzo ya Kimfumu ya beto?