Beto Bambangi ya Yehova beto kesalaka nionso beto zangisa ve balukutakanu ya beto, yavuanda muini ya ngolo, mvula, madidi ya ngolo, to ata kana yamelomba beto zengisa mfinda ya nene to maza. Samu na yinki beto kesalaka ngolo beto kutakana kintuadi na bampangi ya beto ata kana beto kele na bampasi ya luzingu, to beto melemba na manima ya kisalu?

Yau kele samu na mambote ya beto mosi. Ntumua Paulo sonikaka samu na bayina beto kekutakanaka na bau na kimvuka ti: “Beto banzila bantu ya nkaka na kati na beto.” (Baebreo 10:24) Mpova yina memonisa ti beto fueti sosa kuzabana mbotembote na bayankaka. Ntangu beto kena kusosa kuzaba bampangi yankaka ya kimvuka, beto kemona ti bayankaka kati na bau nungaka bampasi yina mekokana na ya beto, mpe diaka balenda sadisa beto tonunga.

Yau kekudisaka kinkundi ya beto. Bantu beto kekutakanaka na bau na balukutakanu ya beto bakele mpenza bankundi na beto, kasi kaka ve bantu yina beto mezabana na bau. Ntangu yankaka, beto kelutisaka ntangu na bampangi samu na kuyangalala kintuadi na mutindu yina mefuana. Yinki mambote beto kebakaka? Yau kesadisaka beto beto zaba mpe beto sepela diaka na bikadulu ya mbote ya bampangi na beto, mpe yau kekudisaka nzola na beto. Na manima, kana bampangi ya beto mekutana na mambu ya mpasi, beto kezingilaka ve samu na kusadisa bau, samu beto mekumaka mpenza bampangi. (Bingana 17:17) Kana beto kena mesana na bampangi nionso ya kimvuka, beto kemonisa ti beto nionso beto ketulanaka dikebi​—1 Bakorinto 12:25, 26.

Beto kena kukindisa nge nge pona bankundi yina kena kusala luzolo ya Nzambi. Nge kebaka bankundi ya mutindu yina na kati ya Bambangi ya Yehova. Kubika ata kima mosi ve pekisa nge kukutakana na beto.

• Samu na yinki kukutakana kintuadi na balukutakanu kele samu na mambote ya beto?

• Yinki kilumbu nge kesepela kukuiza tala kimvuka na beto?