Nzambi zola ti bantu yangalala na luzingu awa na ntoto. Yandi salaka ntoto mpe bima nionso yina kele na ntoto samu yandi kezolaka bantu. Ntama mingi ve, yandi kesala diambu mosi samu bantu ya babuala nionso bavuanda na luzingu ya mbote na bilumbu kena kuiza. Nzambi kekatula mambu nionso yina kesalaka bantu mpasi.​—Tanga Yeremia 29:11.

Guvernema mosi ve menunga kumanisa kimpumbulu, bimbevo, to lufua. Kasi, yakele na nsangu mosi ya mbote: ntama ve, Nzambi kekatula baguvernema nionso ya bantu, mpe na kisika na yau, yandi ketula yina ya yandi mosi. Guvernema yango keyadila bantu yina kevuanda na kiyenge mpe na mavimpi ya mbote.​—Tanga Yezaya 25:8; 33:24; Daniele 2:44.

Bampasi kemanisa kaka ntangu Nzambi kekatula bantu nionso ya yimbi awa na ntoto. (Sofonia 2:3) Yinki ntangu yandi kesala yau? Mpova ya Nzambi samunaka banda ntama mambu yina kena kusala bantu mpasi bubu yayi. Mambu ya yimbi yina kena kusalama bubu yayi kena kumonisa ti fioti kaka mebikana, Nzambi ketula nsuka na yinza yayi.​—Tanga 2 Timoteo 3:1-5.

Beto fueti longuka mambu ya Nzambi na nzila ya Biblia, Mpova na yandi. Yau kele lokola mukanda yina tata ya nzola mesonikina beto. Yau kena kutubila beto mutindu ya kuvuandila na luzingu ya mbote bubu yayi, mpe mutindu ya kubaka luzingu ya mvula na mvula awa na ntoto na bilumbu kena kuiza. Yau kele kedika ti bantu yankaka lenda sepela ve nge longuka Biblia. Kasi lokola Nzambi mepesa beto nsilulu ya luzingu ya mbote na bilumbu kena kuiza, beto fueti bikila bantu nzila ve bapekisa beto kulonguka Biblia.​—Tanga Bingana 29:25; Kusonga 14:6, 7.