Na kusuasana na bantu nionso, Yesu vuandaka na luzingu na dizulu lokola kisemua ya kimpeve tekila yandi kuiza butuka awa na ntoto. (Yoane 8:23) Yandi vuandaka kisemua ya ntete ya Nzambi, mpe yandi pesaka Nzambi maboko samu na kusala bima nionso yankaka. Yandi kaka salamaka mbala mosi na Yehova, yau yina bamebokidila yandi Muana “kubutuka-kaka mosi” ya Nzambi. (Yoane 1:14, NWT) Yesu kele diaka Ntubidi ya Nzambi. Yau yina bamebokidila yandi “Mpova.”​—Tanga Bingana 8:22, 23, 30; Bakolosai 1:15, 16.

Nzambi tindaka Muana na yandi awa na ntoto na mutindu yandi katulaka luzingu na yandi na dizulu mpe yandi kotisaka yau na kivumu ya Maria, muana nketo mosi Moyuda yina zabaka ntete babakala ve. Na yau, tata ya Yesu vuandaka muntu ve. (Luka 1:30-35) Yesu kuizaka na ntoto (1) samu na kulonga kedika metala Nzambi, (2) samu na kupesa beto kifuani mutindu ya kusala luzolo ya Nzambi, yavuanda beto kele na mpasi, mpe (3) samu na kupesa luzingu na yandi ya kulunga lokola “nkudulu.”​—Tanga Matayo 20:28.

Nkudulu kele kima ya mfunu yina mefutama samu na kukula muntu yina bamezengila kitumbu ya lufua. (Kubasika 21:29, 30) Ntangu Nzambi salaka bantu, luzolo na yandi vuandaka ve ti bantu bakuma biboba mpe bakufua. Yinki mutindu beto mezabila yau? Nzambi tubilaka Adamu, bakala ya ntete, kana yandi mesala disumu, yandi kekufua. Yau yina kana Adamu salaka disumu ve, yandi zolaka kufua ve. (Kuyantika 2:16, 17; 5:5) Biblia metuba ti lufua “kotaka” na yinza samu na Adamu. Na yau, Adamu bikilaka bana na yandi nionso disumu mpe kitumbu na yau, lufua. Beto kele na  nsatu ya nkudulu samu na kukatula beto na kitumbu ya lufua yina Adamu bikilaka beto.​—Tanga Baroma 5:12; 6:23.

Nani lendaka futa nkudulu samu na kukula beto na lufua? Ntangu beto kekufuaka, beto kefutaka kaka samu na kitumbu ya masumu ya beto mosi. Muntu mosi ve ya kukondua kulunga lenda futa samu na masumu ya bantu ya nkaka.​—Tanga Nkunga 49:7-9.

Yesu vuandaka mutindu mosi ve na beto. Yandi vuandaka muntu ya kulunga. Na yau, yandi lendaka kufua ve samu na masumu na yandi, samu yandi salaka ata disumu mosi ve. Nzokande, Yesu kufuaka samu na masumu ya bantu yankaka. Nzambi monisaka nzola ya nene yina yandi kele na yau samu na bantu na mutindu yandi tindaka Muana na yandi kufua samu na beto. Yesu mpe monisinaka beto nzola mutindu yandi zitisaka Tata na yandi mpe yandi pesaka luzingu na yandi samu na masumu na beto.​—Tanga Yoane 3:16; Baroma 5:18, 19.

Tala video Samu na yinki Yesu kufuaka?

Ntangu Yesu vuandaka awa na ntoto, yandi vukisaka bantu ya maladi, yandi futumunaka bantu ya kufua, yandi vukisaka bantu yina vuandaka na bisumbula. Kusalaka mutindu yina, yandi monisaka yina yandi kesala na bilumbu kena kuiza samu na bantu nionso ya luzitu. (Matayo 15:30, 31; Yoane 5:28) Yesu kufuaka, kasi Nzambi futumunaka yandi na luzingu lokola kisemua ya kimpeve. (1 Piere 3:18) Na manima, yandi vingilaka na diboko ya kibakala ya Nzambi tii ntangu Yehova pesaka yandi ngolo ya kuyadila lokola Mfumu na ntoto ya mvimba. (Baebreo 10:12, 13) Bubu yayi, Yesu kele Mfumu mpe yandi kena kuyadila na dizulu. Mpe awa na ntoto, balongoki na yandi kena samuna nsangu yango ya mbote na yinza ya mvimba.​—Tanga Daniele 7:13, 14; Matayo 24:14.

Yamebikana fioti, Yesu kesadila ngolo na yandi ya Kimfumu samu na kumanisa bampasi nionso mpe bayina kebimisaka yau. Bantu nionso kena monisa kiminu na Yesu mpe kena zitisa yandi bakevuanda na luzingu na paladiso awa na ntoto.​—Tanga Nkunga 37:9-11.