1. Yinki nguizani bantu ya kukuikama lenda vuanda na yau na Yehova?

DIBUTA ya bansambidi ya Yehova mesangisa Yesu, yina kele ‘muana ya ntete ya bisemua nionso,’ mpe mafunda ya bambasi. (Kol. 1:15; Nk. 103:20) Ntangu Yesu vuandaka na ntoto, yandi monisaka ti bantu ya kukuikama lenda tadila Yehova lokola Tata na bau. Ntangu yandi vuandaka solola na banlonguki na yandi, Yesu vuandaka sadila bampova lokola ‘Tata na munu mpe Tata na beno’ samu na kutubila Yehova. (Yoa. 20:17) Mpe ntangu beto kekukipesaka na Yehova mpe beto kebakaka mbotama, beto kekotaka na kati ya dibuta ya nzola ya bampangi ya babakala mpe ya banketo.—Mar. 10:29, 30.

2. Yinki beto ketadila na disolo yayi?

² Bantu yankaka kemonaka mpasi samu na kutadila Yehova lokola Tata ya nzola. Bayankaka lenda zaba ve mutindu ya kumonisa nzola na bampangi ya babakala mpe ya banketo. Na disolo yayi, beto ketadila mutindu Yesu kena kusadisa beto beto tadila Yehova lokola Tata ya nzola, muntu yina beto lenda pusana penepene na yandi. Beto kemona diaka mutindu beto lenda landa kifuani ya Yehova na mutindu beto kesadilaka bampangi ya babakala mpe ya banketo mambu.

3. Yinki mutindu kisambu ya Yesu ya kifuani kena kusala ti beto pusana penepene na Yehova?

³ Yehova kele Tata ya nzola. Yesu zola beto tadila Yehova mutindu yandi ketadilaka yandi—lokola kibuti ya mbote mpe ya nzola yina kevuandaka pete samu na kupusana penepene na yandi, kasi ve lokola muntu yina mekondua nzola to kezolaka kaka beto sala yina yandi metuba. Beto mezaba yau samu yau nde Yesu longaka banlonguki na yandi batubaka ntangu bakena kusambila.  Mpe yandi bandaka kisambu ya kifuani na bampova yayi: “Tata na beto.” (Mat. 6:9) Yesu lendaka tubila beto beto bokilaka Yehova ‘Nkua-Ngolo-Nionso,’ ‘Mvangi,’ to ‘Ntinu ya mvula na mvula’—batitre yango nionso mefuana, samu Masonukua kesadilaka yau samu na kutubila Yehova. (Kuy. 49:25; Yez. 40:28; 1Tm. 1:17) Kasi, Yesu zabisaka beto beto bokidila Yehova “Tata.”

4. Yinki mutindu beto mezaba ti Yehova zola beto pusana penepene na yandi?

⁴ Yakevuandaka mpasi samu na nge nge tadila Yehova lokola Tata ya nzola? Yakele mutindu yina samu na bantu yankaka kati na beto. Kana bibuti na beto vuandaka na nzola ve, yalenda vuanda mpasi samu na beto beto ndima ti yakele na Tata mosi yina kezolaka beto. Yakele diambu ya kukindisa kuzaba ti Yehova kebakusaka mbote banguilu na beto! Yandi zola kuvuanda penepene na beto. Yau yina Mpova na yandi kena kukindisa beto: ‘Beno pusana penepene na Nzambi, mpe yandi kepusana penepene na beno.’ (Yak. 4:8) Yehova kezolaka beto, mpe yandi metuba ti yandi kevuanda Tata ya mbote yina meluta batata nionso.

5. Na kutadila Luka 10:22, yinki mutindu Yesu lenda sadisa beto beto pusana penepene na Yehova?

⁵ Yesu lenda sadisa beto beto pusana penepene na Yehova. Yesu mezaba Yehova mbote mpe yandi kemonisaka bikadulu na Yandi na mutindu ya kukoka, yau yina yandi tubaka: ‘Muntu yina memona munu memona mpe Tata.’ (Yoa. 14:9) Lokola mpangi ya bakala ya mbuta, Yesu kelongaka beto mutindu ya kuzitisa mpe kutumamina Tata na beto, mutindu beto fueti kusepedisa Yandi, mpe kundimama na Yandi. Kasi luzingu ya Yesu awa na ntoto kemonisaka beto mingi mingi ti Yehova kele mbote mpe nzola. (Tanga Luka 10:22.) Beto tadila ndambu ya bifuani.

6. Pesa bifuani yina kena kumonisa ti Yehova kuwaka bisambu ya Yesu.

⁶ Yehova kekuwaka bana na yandi. Tadila mutindu Yehova kuwaka Muana na yandi ya ntete. Yehova kuwaka bisambu mingi ya Muana na yandi ntangu yandi vuandaka na ntoto. (Luka 5:16) Yandi kuwaka Yesu ntangu yandi sambilaka samu na banzengolo ya mfunu, na kifuani ntangu yandi ponaka bantumua na yandi 12. (Luka 6:12, 13) Yehova kuwaka diaka Yesu ntangu yandi sambilaka samu na mitungisi na yandi.  Tekila bateka yandi, Yesu sambilaka ngolo Tata na yandi na diambu metadila kumekama ya mpasi yina yandi vuandaka pene ya kukutana ya yau. Yehova kuwaka kaka ve kisambu ya Yesu, kasi yandi tindaka diaka mbasi samu na kukindisa Muana na Yandi ya nzola.—Luka 22:41-44.

7. Yinki mutindu beto fueti kukimona na kuzabaka ti Yehova kekuwaka bisambu na beto?

⁷ Bubu yayi, Yehova kena kutatamana kuwa bisambu ya bisadi na yandi, mpe yandi kepesaka bau bamvutu na ntangu yina mefuana mpe na mutindu mosi ya mbote. (Nk. 116:1, 2) Beto tadila kifuani ya mpangi mosi ya nketo na Inde yina monaka mutindu Yehova pesaka mvutu na bisambu na yandi. Yandi vuandaka na diambu ya mpasi yina vuandaka tungisa mpenza makanisi na yandi, mpe yandi vuandaka sambila Yehova na ntima na yandi ya mvimba samu na diambu yango. Yandi mesonika: “Emision ya TV JW ya ngonda ya Mai 2019 yina tubilaka mutindu ya kununga mitungisi mpe yau kuizaka na ntangu yina mebonga. Yau vuandaka mvutu na bisambu na munu.”

8. Na yinki mitindu Yehova monisaka ti yandi kezolaka Yesu?

⁸ Yehova kezolaka beto mpe yandi ketudilaka beto dikebi, mutindu kaka yandi vuandaka zola Yesu mpe yandi vuandaka tudila yandi dikebi ntangu yandi kutanaka na mambu ya mpasi awa na ntoto. (Yoa. 5:20) Yandi kokisaka nsatu nionso ya Yesu ya kimpeve, ya makanisi, mpe ya kinsuni. Mpe Yehova zabisaka Muana na yandi ti yandi kezolaka yandi mpe yandi kesepelaka na yandi. (Mat. 3:16, 17) Lokola yandi vuandaka tudila Tata na yandi ya nzola yina kele na dizulu ntima, Yesu kukimonaka ata fioti ve ti yandi kele yandi mosi.—Yoa. 8:16.

9. Yinki mutindu beto mezaba ti Yehova kezolaka beto?

⁹ Mutindu mosi na Yesu, beto nionso beto memonaka nzola ya Yehova na mitindu mingi. Kanisa ntete: Yehova bendaka beto na ntadisi na yandi mpe yandi pesaka beto bampangi mingi yina kele na nzola mpe bakepesaka beto kiese mpe bakekindisaka beto ntangu beto kena kutungisama na makanisi. (Yoa. 6:44) Yehova kepesaka beto diaka yina beto kele na yau nsatu samu na kukumisa kiminu na beto ngolo. Mpe yandi kesadisaka beto diaka konso kilumbu samu na kubaka bima ya kinsuni yina beto kele na yau nsatu. (Mat. 6:31, 32) Kana beto kena kukanisa nzola yina Yehova kele na yau samu na beto, nzola na beto samu na yandi kekula.

10. Yinki dilongi beto lenda baka na mutindu Yehova kesadilaka bampangi ya babakala mpe ya banketo mambu?

¹⁰ Yehova kezolaka bampangi na beto ya babakala mpe ya banketo. Kasi yakevuandaka mpasi samu na beto kuzola bau mpe kumonisina bau nzola. Yakevuandaka mpasi bantangu yankaka samu beto kele na nzingulu yina mesuasana mpe beto yundukaka mutindu mosi ve. Mpe beto nionso kesalaka banzimbala yina kesepedisa ve bantu yankaka mpe yina kelembisaka bau nzutu. Kasi, konso muntu kena diambu yina yandi lenda sala samu yandi kumisa nzola ya dibuta ya kimpeve ngolo. Yinki mutindu? Na kulandaka kifuani ya Tata na beto ya kumonisa nzola na bampangi na beto ya babakala mpe ya banketo. (Efe 5:1, 2; 1 Yoa. 4:19) Beto tala yina beto lenda longuka na kifuani ya Yehova.

11. Yinki mutindu Yesu landaka kifuani ya ‘kiadi ya nene’ ya Yehova?

¹¹ Yehova kena kumonisa ‘kiadi ya nene.’ (Luka 1:78) Muntu ya kiadi kele muntu yina kana yandi memona bantu yankaka kena kuniokuama; yandi kesosaka mutindu ya kupesa bau lusadusu mpe kubomba bau. Yesu landaka kifuani ya kiadi ya Yehova na mutindu yandi vuandaka sadila bantu mambu. (Yoa. 5:19) Na diluaku mosi yandi monaka kimvuka mosi ya bantu, Yesu ‘wilaka bau kiadi samu bavuandaka niokuama mpe basundulamaka lokola mememe yina mekondua mvungi.’ (Mat. 9:36) Yesu vuandaka suka kaka ve na kumona kiadi, yandi vuandaka sala diambu  mosi samu na kusadisa bau. Yandi belusaka bantu ya maladi mpe yandi sadisaka bantu yina vuandaka ‘mona mpasi mpe yina vuandaka nata kilo ya mingi.’—Mat. 11:28-30; 14:14.

12. Pesa kifuani mosi ya mutindu beto lenda monisina bampangi na beto kiadi.

¹² Kana beto kena kukanisa na mambu ya mpasi yina bampangi na beto kena kukutana na yau, beto kevuanda na dikoki ya kumonisina bau ntima kiadi. Na kifuani, mpangi mosi ya nketo lenda vuanda na mitungisi ya mavimpi. Yandi ketubilaka kutu ve mpasi na yandi, kasi yandi lenda vuanda na kiese kana muntu mosi mesadisa yandi. Yinki mutindu yandi kena kukokisa bansatu ya kinsuni ya dibuta na yandi? Beto lenda sadisa yandi na kukuenda lambila yandi madia to na kubongisila yandi yinzo? To mpangi mosi ya bakala lenda zimbisa kisalu na yandi. Beto lenda pesa yandi mbongo, mbala yankaka kondua kutubila yandi ti yamekatuka nde na beto, beto kesadisa yandi samu yandi baka kisalu yankaka?

13-14. Yinki mutindu beto lenda monisa kikadulu ya kukaba lokola Yehova?

¹³ Yehova kekabaka. (Mat. 5:45) Beto fueti vingila ve ti bampangi na beto lomba beto lusadusu tekila beto monisina bau kiadi. Mutindu mosi na Yehova, beto lenda sala diambu mosi samu na bau tekila balomba beto yau. Yandi kebimisaka muini samu na beto konso kilumbu kukondua kutu beto lomba yandi yau! Mpe mosi mosi na beto kebakilaka muini mambote, ata bantu yina mekondua butondi. Na kupesaka beto bima yina beto kele na yau nsatu, Yehova kemonisaka beto ti yandi kezolaka beto? Beto kezolaka Yehova mingi samu yandi kele na kimpombo mpe yandi kekabaka!

¹⁴ Bampangi na beto mingi kelandaka kifuani ya Yehova na kumonisaka kikadulu ya kukaba. Na kifuani, na 2013, mupepe mosi ya ngolo bakebokidilaka Typhon Haiyan bimisaka bivonza ya nene na Philippines. Bampangi mingi zimbisaka bayinzo mpe bima na bau. Kasi dibuta na bau ya kimpeve na yinza ya mvimba pesaka bau lusadusu na nsualu. Bampangi mingi pesaka mbongo mpe bayankaka pesaka maboko samu na kubongisa mpe kutunga bayinzo 750 kaka na mvula mosi! Na ntangu ya maladi yayi ya yimbi ya COVID-19, Bambangi ya Yehova kena kusala ngolo samu na kupesa bampangi na bau lusadusu. Kana beto kena pesa na nsualu lusadusu na dibuta na beto ya kimpeve, beto kemonisa bau ti beto kezolaka bau.

15-16. Na kutadila Luka 6:36, yinki kele mutindu ya mbote yina beto lenda landa kifuani ya Tata na beto ya dizulu?

 ¹⁵ Yehova kekuwaka kiadi mpe yandi kenlemvukilaka. (Tanga Luka 6:36.) Tata na beto ya dizulu kemonisinaka beto kiadi. (Nk. 103:10-14) Banlonguki ya Yesu vuandaka bantu ya kuzanga kukoka; kasi, yandi monisinaka bau ntima kiadi mpe nlemvo. Yandi vuandaka pene ya kupesa luzingu na yandi nkayilu samu Nzambi lenvukila masumu na beto. (1 Yoa. 2:1, 2) Lokola Yehova mpe Yesu kele na ntima kiadi mpe bakenlemvukilaka, yakena kutinda beto ve beto pusana penepene na bau?

¹⁶ Beto kekumisaka nzola ya dibuta na beto ya kimpeve ngolo ntangu beto ‘kenlemvukilaka na ntima ya mvimba.’ (Efe 4:32) Ya kedika kunlemvukila bantu kevuandaka mpasi na bantangu yankaka. Mpangi mosi ya nketo monaka disolo mosi na Linɔ́ngi ya Mosɛnzɛli yina metuba “Tólimbisanaka na motema moko” mpe yasadisaka yandi. * Yandi metuba: “Kulonguka disolo yango sadisaka munu mubakusa mutindu kunlemvukila bantu yankaka kesadisa munu. Zulunalo yango tubaka ti kunlemvukila bantu yankaka zola monisa ve kuvuanda na makanisi ti diambu ya yimbi yina bamesala nge kele kuandi diambu ya mbote to yasalaka nge kuandi mpasi ve. Kasi kunlemvukila zola monisa kukatula nganzi samu na muntu yango mpe na manima kuvuanda na kiyenge na ntima.” Kana beto menlemvukila na ntima ya mvimba bampangi na beto ya babakala mpe ya banketo, beto kemonisa ti beto kezolaka bau mpe beto kena kulanda kifuani ya Tata na beto, Yehova.

17. Na kutadila Matayo 5:16, yinki mutindu beto lenda pesa lokumu na Tata na beto ya dizulu?

¹⁷ Yakele diluaku ya nene ya kuvuanda na kati ya dibuta ya nzola ya yinza ya mvimba. Beto zola bantu mingi kuiza sangana na beto samu na kusambila Nzambi na beto. Kana beto melunda yau na makanisi, beto kesala nionso samu beto bika sala diambu yina ketinda bantu bavuanda na makanisi ya yimbi samu na Yehova to bisadi na yandi. Beto sosa kuvuanda na kikadulu yina kebenda dikebi ya bantu na nsangu ya mbote.—Tanga Matayo 5:16.

18. Yinki lenda sadisa beto beto samuna kondua kubanga?

¹⁸ Na bantangu yankaka, bantu lenda kuvueza  to kuniokola beto samu beto kena kuzitisa Tata na beto ya dizulu. Yinki beto lenda sala kana beto kena kutubila bantu yankaka bindimeli na beto? Beto lenda ndimisama ti Yehova mpe Yesu kesadisa beto. Yesu tubilaka banlonguki na yandi ti bakukitungisa ve samu na diambu metadila yinki mutindu baketubila mpe yinki baketuba. Samu na yinki? Yesu sasilaka: ‘Mambu yina beno ketuba bakepesa beno yau na ntangu yina, samu bantu yina kena kutuba kele kaka beno ve, kasi yakele mpeve ya Tata na beno yina kena kutuba na nzila na beno.’—Mat. 10:19, 20.

19. Pesa kifuani ya muntu mosi yina samunaka na kibakala nionso.

¹⁹ Beto tadila kifuani ya Robert. Ntangu yandi vuandaka nlonguki ya Biblia mpe yandi zabaka mambu mingi ve ya Biblia, yandi kuendaka samba na tribinale ya basoda na Afrique du Sud. Yandi sasilaka na kibakala nionso na tribinale yango ti yandi memanga kusala kisalu ya kisoda samu yandi kezolaka bampangi na yandi Baklisto. Yandi vuandaka sepela na kisika yina yandi kele na yau na kati ya dibuta ya kimpeve! Zuzi yuvusaka yandi na kintulumukina: “Banani kele bampangi na nge?” Robert zabaka ve ti bakeyuvusa yandi kiuvu yango, kasi kikapu ya kilumbu yango kuizilaka yandi mbala mosi na makanisi. Yavuandaka Matayo 12:50, yina ketubaka: ‘Konso muntu yina kesala luzolo ya Tata na munu yina kele na dizulu, yandi nde muntu kele mpangi na munu ya bakala, mpe mpangi na munu ya nketo, mpe tata na munu.’ Atako Robert vuandaka nlonguki ya Biblia, mpeve ya Yehova sadisaka yandi yandi pesa mvutu na kiuvu yina bayuvusaka yandi mpe biuvu mingi yankaka yina yandi kanisaka ve. Yehova sepelaka mpenza na yandi! Mpe Yehova kesepelaka na beto kana beto kena kutudila yandi ntima samu na kupesa kimbangi na kibala nionso na ntangu ya mpasi.

20. Yinki nzengolo beto fueti baka? (Yoane 17:11, 15)

²⁰ Beto kele na butondi mingi lokola beto kele na kati ya dibuta ya kimpeve mpe ya nzola. Beto kele na Tata yina meluta mbote mpe bampangi mingi yina kezolaka beto. Beto fueti vuanda ntangu nionso na butondi samu na yau. Satana mpe bademo na yandi kena kusosa ti beto bika ndimina nzola yina Yehova kele na yau samu na beto mpe kubebisa bumosi na beto na bampangi. Kutu, Yesu sambilaka samu na beto, yandi lombaka Tata na beto yandi tanina beto samu dibuta na beto vuanda na bumosi. (Tanga Yoane 17:11, 15.) Yehova kena kupesa mvutu na kisambu yango. Lokola Yesu, beto lenda tula ntembe ve ti Tata na beto ya dizulu kezolaka beto mpe kesadisaka beto. Beto baka nzengolo ya kutatamana kuvuanda pene ya dibuta na beto ya kimpeve.